GURUY NI 11

Rogon ni Ngari Yib Angin e Bible Ngom

PLAY

Bay ba ngiyal’ ni kam lemnag ni ngam rin’ reb e maruwel nib ga’, machane ga be lemnag ni kaygi mo’maw’, fa? Rayog ni kam fal’eg boch yang riy nge m’ay, mfin kum man ko gin migid ya nge mom. Ere ku arrogon e beeg Bible. Sana ga ra fith ni lungum, ‘Uw e nggu tabab riy?’ U lan e re guruy ney e gad ra weliy riy boch ban’en nib mom nrayog ni ngam rin’ nra ayuwegem ni ngam adag e beeg Bible nge fol Bible.

1. Mang fan nsusun e ngaud beeged e Bible ni gubin e rran?

Be’ ni ma beeg e Bible ara “motochiyel rok Somol” ni gubin e rran e ra felfelan’ ma urngin e tin ma rin’ e ra yan i aw nib fel’. (Mu beeg e Psalm 1:1-3.) Som’on e rayog ni ngam beeg u lan in e minit ni gubin e rran. Ra mecham ngom ni ngaum beeg e Thin rok Got, ma aram e ga ra adag ni ngaum beeg e Bible.

2. Uw rogon ni nge yib angin ngom e beeg Bible ni ga ma tay?

Ra ngari yib angin ngodad e beeg Bible ni gad ma tay, mab t’uf ni ngad talgad ngad ‘lemnaged’ e n’en gad be beeg. (Psalm 119:97) Nap’an ni ga be beeg e Bible, mag fithem ni nge lungum: ‘Mang e be yog e re n’ey ngog u murung’agen Jehovah Got? Uw rogon ni nggu fanay e re n’ey nga lan e yafos rog? Ma uw rogon ni nggu fanay e pi thin ney ni nggu ayuweg yugu boch e girdi’ ngay?’

3. Uw rogon ni ngam pirieg e tayim ni ngam beeg e Bible?

Gur, ba mo’maw’ ni ngam pirieg e tayim ni ngam beeg e Bible, fa? Boor i gadad e ba mo’maw’ ngak. Mu guy rogon ni ngam “maruwel ko tayim rom nib fel’ rogon.” (Efesus 5:16, NW) Rayog ni ngam rin’ e re n’ey ni aram e ngam tay ba ngiyal’ u gubin e rran ni ngam beeg e Bible. Boch e girdi’ e yad ma beeg e Bible nri kakadbul. Ma boch e yad ma dugliy ni ngar beeged ni ke misiw’ boch, nrayog nu nap’an ni kar talgad ko misiw’ ni ngar abichgad. Ma boch e girdi’ e yad ma beeg e Bible ni blayal’ u m’on ni ngar molod. Me gur, mingiyal’ e ga be lemnag nib fel’ ni ngam beeg e Bible rom?

KUM FIL BOCH BAN’EN U MURUNG’AGEN

Mu fil rogon ni ngam adag e beeg Bible ni ga ma tay, nge rogon ni ngam fal’eg rogom nib fel’ rogon ya nge yag ni yib angin ngom e fol Bible ni ga be un ngay.

Rayog ni ngad filed rogon ni ngad adaged e beeg Bible ni bod nrayog ni ngad filed rogon ni ngad adaged ni ngad ked boch e ggan nib thilthil

4. Mu fil rogon ni ngam adag e beeg Bible

Rayog nde mom ni ngam tabab i beeg e Bible rom. Machane rayog ni ngam fil rogon ni ngam adag e beeg Bible ni bod nrayog ni ngam adag ni ngam kay ba mit e ggan ndawor mu kay bayay. Mu beegew e 1 Peter 2:2, mi gimew weliy e fulweg ko re deer ni baaray:

Ga be lemnag ni faanra um beeg e Bible ni gubin e rran, ma ireray ban’en ni ga ra adag ni ngaum rin’, fa?

Mu yaliyew e re VIDEO ney ni be dag rogon ni tabab boch e girdi’ ni ngar adaged e beeg Bible. Tomuren mi gimew weliy e fulweg ko pi deer ni baaray.

VIDEO: Youths Learning to Love God’s Word (5:33)

Mang boch e magawon ni mada’nag fapi fel’ yangaren ni kan dag yaarad ko fare video ni yag ni ngar gelgad ngay?
Mang e ayuwegrad ni ngar ululgad ni ngaur beeged e Bible ni gubin e rran?
Mang e rrin’ed ya nge yag nra adaged e n’en yad be beeg u Bible?

Boch ban’en nra ayuwegem ni ngam tabab:

Mmel’eg ba ken e Bible nib puluw e thin riy ma kun pilyeg ni yibe fanay e thin ni yima yog e ngiyal’ ney. Mu beeg fare New World Translation ni faanra kan pilyeg ko thin rom ara yugu reb e thin ni ga manang.
Mu tabab i beeg e yungin ni ga be guy ni ga baadag. Rayog ni ngam guy fare chart ni “Mu Tabab ko Beeg Bible.”
Mu tay fanam i yan ko n’en kam beeg. Mu fanay fare chart ni “Mu Tay Fanam i Yan ko Gin Kam Beeg u Bible” ni bay ko re ke babyor ney.
Mu fanay fare app ni JW Library^®. Demtrug e gin ga bay riy, ma rayog ni ngam fanay e re app ney ni ngam beeg ara ngam motoyil ko thin nu Bible ko cellphone ara tablet rom.
Mu fanay fare ke babyor ni Boch Ban’en Nra Ayuwegdad u Nap’an e Fol Bible. Bay boch e map nge chart riy nra ayuwegem ni ngam adag e beeg Bible ni ga be tay.

5. Mu fal’eg rogom ni fan ko fol Bible ni ga be un ngay

Mu beegew e Psalm 119:34, mi gimew weliy e fulweg ko re deer ni baaray:

Mang fan nib fel’ ni ngam meybil u m’on ni ngam beeg e Bible ara u m’on ni ngam fal’eg rogom ni fan ko fol Bible ni ga be un ngay?

Uw rogon ni ngari yib angin ngom e fol Bible ni ga be un ngay? Nap’an ni ga be fal’eg rogon reb e guruy, mag guy rogon ni ngam rin’ e pi n’en baaray:

Mu beeg e pi paragraph ni bay u tabolngin fare guruy.
Mu beeg e pi thin nu Bible riy, mag guy rogon nib peth ko n’en bay ko re guruy nem.
Mu tay e pow ko pi thin riy ni be pi’ e fulweg ko pi deer ni bay riy; re n’ey e ra ayuwegem u nap’an ni gimew be weliy e en ma fil e Bible ngom fare guruy u taabang.

Baaray murung’agen ban’en

Bay in ken e Bible ni i fanay e Pi Mich Rok Jehovah kafram. Machane ri gamad baadag fare New World Translation of the Holy Scriptures ni bochan e ba puluw e thin riy, mab tamilang, ma bay fithingan Got riy.—Mu guy fare article ni bay ko website ni kenggin e “Do Jehovah’s Witnesses Have Their Own Bible?”

MA GAAR BOCH E GIRDI’: “Kaygi gel e maruwel riy ni nggu fil e Bible. Kaygi yoor pa’ u puluwog ara kaygi aw parawog ni nggu fil e Bible.”

Uw rogon e re n’ey u wan’um?

N’EN KAN FIL

Ra ngari yib angin e Bible ngom, ma ngaum tay e tayim ni ngam beeg, mag meybil ya nge yag nim nang fan e n’en ga be beeg, mag fal’eg rogom ni fan ko fol Bible ni ga be un ngay.