OZUMALƐDƖYƐ 12

Mɩnla Yɛ Ɩkɔwʋwa Wʋ Ma Ɔkɔhɔlɩ Ɔzʋlɔ Okozuma Bayɩbʋlʋ Yɩ a?

BƆ́

Mfasʋ wɔ ɔzʋlɔ kɛɛ yekozuma Bayɩbʋlʋ yɩ, naasʋ̃ kɛ eɣile bela yɛ ɩyɛlɛ nɩ ɩkɛyɛ mmɛlɛkɛ a. Itwu mmɩlɩ be a, sa yɛkʋla yɛtɩ nɣanlɩ kɛɛ yɛlɔ́kʋla yɛkɔhɔ ɔzʋlɔ yekozuma Bayɩbʋlʋ yɩ eɣile bela. Mɩnla ti mɔɔ nwʋmɔ ihyinyia kɛɛ ɔbɔ mmɔdɩnɩ ɔtʋwa ɔzʋlɔ a? Mɩnla yɛ ɩkɔwʋwa wʋ ma ɔkɔdʋwa ɔzʋlɔ okozuma Bayɩbʋlʋ yɩ ɩávalɩ nwʋmɔ ndwokɔ ɛzɩzɩbɛ mɔɔ ekeyiyia nɩ a?

1. Mɩnla ti mɔɔ mfasʋ wɔ ɔzʋlɔ kɛɛ yekozuma Bayɩbʋlʋ yɩ a?

“Nyamɩnlɩ Odwokɔ ɩwɔ ɛkɛnɩ eɣile bela, na ɩyɛ egyima.” (Hibulumaa 4:12) Mfasʋ wɔ Bayɩbʋlʋ yɩ zʋ iluwakɛɛ ɩma ɔnwʋ Nyamɩnlɩ yɩ adwɩnɩ nɩɩ ɔlɔlɛ mɔɔ ɩwɔ ɩma wʋ. Kɛ nnimidi nkʋ̃ la yɛ ɩkɛma ekenyia a, mfomi ɩkɛma ekenyia nɣɛlɛbɛ nɩɩ anyɩnlɩlazʋ sʋ̃. Mɔɔ ɩtɛla ɔzɔ kʋlaa nɩ, Bayɩbʋlʋ yɩ ɩkɔwʋwa wʋ ma ɛkɛva Gyehova ɔhɔnwʋ. Bayɩbʋlʋ yɩ mɔɔ okozuma nɩ ɩkɛma wʋ ɛbɩlawɔlɛ ɩkɛyɛ baaba.

2. Mɩnla ti mɔɔ nwʋmɔ ihyinyia kɛɛ yɛnwʋ kɛɛ Bayɩbʋlʋ nu nɔhʋanlɛ ɩtʋ bʋlɔ a?

Nɔhʋanlɛ odwokɔ mɔɔ ɩwɔ Bayɩbʋlʋ nu nɩ ɩdɩ kɛɛ agyiapadɩ be mɔɔ ɩtʋ bʋlɔ. Eyi ti mɔɔ Bayɩbʋlʋ yɩ ɩhyɛ yɛ ɛzɩzɩbɛ kɛɛ ‘yɛdɔ́ nɔhʋanlɛ yɩ na áma yɛtɔnɩ yɩ kyɩ̃.’ (Ɛɣɛlɛwulɛ 23:23) Sɛ yɛdwɩnɩndwɩnɩ kezimɔ nɔhʋanlɛ odwokɔ mɔɔ ɩwɔ Bayɩbʋlʋ nu ɩtʋ bʋlɔ nɩ nwʋ a, sa ɩma yɛbɔ mmɔdɩnɩ yɛkɔ ɔzʋlɔ yesuma, ɩávalɩ nwʋmɔ mɔɔ yekeyiyia bela nɩ.—Kɩnga Ɛɣɛlɛwulɛ 2:4, 5.

3. Mɩnla ɔhʋanɩ zʋ yɛ Gyehova ɩkɔhʋla ɩkɔwʋwa wʋ ma ɔkɔhɔlɩ ɔzʋlɔ okozuma Bayɩbʋlʋ yɩ a?

Gyehova mɔɔ ɩdɩ dɩyɛ munwala Ɩwɔlɛvʋlɔ nɩɩ wʋ Ɔhɔnwʋ nɩ, ɩpɛ kɛɛ ɩbʋwa wʋ ma osuma yɩ nwʋ dɩyɛ. Sa ɩkʋla ɩma “anwʋzɩzɩbɛ” wʋ ma ɛfa osuma yɩ Odwokɔ yɩ. (Kɩnga Fɩlɩpɩmaa 4:13.) Eyi ikile kɛɛ mmɩlɩ bela mɔɔ ɛpɛ kɛɛ osuma dɩyɛ anzɛnyɩɩ ɛpɛ kɛɛ ɛfa mɔɔ osumaa nɩ edi egyima nɩ, sa ɩkʋla ɩbʋwa wʋ. Sɛ ehyinyia anwʋzɩzɩbɛ na wʋava wʋagyina ndwokɔ ɛzɩzɩbɛ anzɛnyɩɩ atɩɩtɩɩ be yɩ munwa a, sa ɩkʋla ɩfa ɩma wʋ. Wɔ wʋ mpayɩwɔlɛ nu nɩ, ɩyɛ a ta siã Gyehova kɛɛ ɩwʋwa wʋ ma ɔhɔlɩ ɔzʋlɔ ozuma Bayɩbʋlʋ yɩ.—1 Tɛsalonikamaa 5:17.

SUMÁ SƲ̃MAA

Sumá kezimɔ ɔkɔhɔlɩ ɔzʋlɔ okozuma Bayɩbʋlʋ yɩ ɩávalɩ nwʋmɔ kɛɛ éni mmɩlɩ anzɛnyɩɩ eyiyiaa atɩɩtɩɩ nɩ. Na akʋ̃ sunzu kezimɔ Gyehova ɩkɔhʋla ɩkɔwʋwa wʋ ma ɔkɔhɔlɩ ɔzʋlɔ okozuma Bayɩbʋlʋ yɩ nɩ nwʋ.

4. Ma wʋ Bayɩbʋlʋ zumalɛ nwʋ ihyinyia wʋ

Ɩyɛ a egyima ɩkʋla ibulu yɛ zʋ nkʋ̃ʋ̃ ma yɛtɩ nɣanlɩ kɛɛ yéni alagyɩ mɔɔ yɛkɛva yekozuma Bayɩbʋlʋ yɩ. Mɩnla yɛ ɩkɔhʋla ɩkɔwʋwa wʋ a? Kɩnga Fɩlɩpɩmaa 1:10 (NWT), na akʋ̃ bozunzú ndwokɔɣizialɛ eyimmɔ nwʋ:

Ekila a “nninyeni mɔɔ ihyinyia paa” wɔ ɛbɩlawɔlɛ nu nɩ, ebiye yɛ lɛ mɩnla a?
Kɛ ɛkɛyɛ na wʋama wʋ Bayɩbʋlʋ zumalɛ nwʋ iahyinyia wʋ a?

Sɛ ɛfa nyʋnwa okua bokiti nu na ɛfa awʋlɔ okua ɔzʋlɔ a, awʋlɔ yɩ ɩlɔ́kɔ nu.
Naasʋ̃ sɛ edi bɔmʋnlɩ ɛfa awʋlɔ yɩ okua numɔ a, sa ɩma enyia dɩka ɛfa nyʋnwa yɩ okua. Ɔzɔ sʋ̃ la yɛ sɛ ɛfa nninyeni mɔɔ nwʋmɔ ihyinyia nɩ edi bɔmʋnlɩ wɔ wʋ ɛbɩlawɔlɛ nu a, sa ɔkʋla edi nwʋmɔ egyima na wʋanyia mmɩlɩ sʋ̃ wʋayɛ nninyeni mvʋlɔ

Bayɩbʋlʋ zumalɛ idi ye sunzuma ɔfʋã nu ahyinyiadɩ mɔɔ mɛyɩ yɛ lɛ kɛɛ yɛkɔnwʋ Nyamɩnlɩ na yɛazʋ̃mɩ nɩ nwʋ egyima. Kɩnga Matiyu 5:3, na akʋ̃ bozunzú odwokɔɣizialɛ eyi nwʋ:

Sɛ yɛma Bayɩbʋlʋ zumalɛ nwʋ ihyinyia yɛ a, mɩnla mfasʋ yɛ yekenyia wɔ ɔzʋlɔ a?

5. Kɔ ɔzʋlɔ kyina odwodwudiyialɛ yi munwa

Ɩyɛ a, mmenii mvʋlɔ kɔwɔ mmɔdɩnɩ kɛɛ bokogolɔ wʋ abɔkɔ wɔ Bayɩbʋlʋ yɩ zumalɛ nwʋ. Kilá mɔɔ Francesco ɩyɛlɩ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.

VIDIYO: Inyianlɩ Yɩ Pindinyiigyinanlɛ Zʋ Mfasʋ (5:22)

Wɔ vidiyo yi nu nɩ, mɩnla yɛ Francesco yɩ ɔhɔnwʋmmɔ nɩɩ yɩ maamɩ bɛyɛlɩ mmɩlɩ mɔ ɩhanlɩ mɔɔ isumaa nɩ nwʋ odwokɔ ihileli bɛ nɩ a?
Mɩnla ɔhʋanɩ zʋ yɛ inyianlɩ yɩ pindinyiigyinanlɛ zʋ mfasʋ a?

Kɩnga 2 Timoti 2:24, 25, na akʋ̃ bozunzú ndwokɔɣizialɛ eyimmɔ nwʋ:

Kɛ wʋ mmusunwa nɩɩ wʋ ɔhɔnwʋmmɔ bɛtɩ nɣanlɩ wɔ mɔɔ osumaa nɩ nwʋ bese a?
Kɛmɔ ɛhɛlɛlɛ odwokɔ eyi ɩkã nɩ, mɩnla yɛ ɩsɛ kɛɛ ɛyɛ mmɩlɩ mɔ abiye yɩ anyɩ iáleli nwʋmɔ kɛɛ osumaa Bayɩbʋlʋ nɩ a? Mɩnla ti a?

6. Fá wʋ nwʋ tiã Gyehova zʋ ma ɩwʋwa wʋ

Mmɩlɩ mɔ yebikee Gyehova nɩ, nɩ ɛpɛ mɔɔ yɛwɔ kɛɛ yɛkɔzɔ yɩ anyɩ nɩ ɩyɛ kezi. Naasʋ̃, sa ɩkʋla ɩyɛ sɩ kɛɛ yɛkɛyɛ nzɩnzanlɩyɛ be wɔ yɛ ɛbɩlawɔlɛ nu ma ɩ nɩɩ Gyehova ɩpɛ ikeyiyia. Sɛ ɩyɛ na ɛtɩ nɣanlɩ ɔzɔ a, máma wʋ padi ikolɔ. Gyehova ɩkɔwʋwa wʋ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ilili ɔzʋlɔ nɩ nwʋ.

VIDIYO: Gyehova Ɩbʋwa Yɛ Ma Yɛyɛ Nzɩnzanlɩyɛ (3:56)

Wɔ vidiyo yi nu nɩ, mɩnla nzɩnzanlɩyɛ yɛ Jim ɩyɛlɩ na ama ɩazɔ Gyehova anyɩ a?
Mɩnla yɛ wʋ anyɩ ideli nwʋmɔ wɔ mɔɔ ɩyɛlɩ nɩ nwʋ a?

Kɩnga Hibulumaa 11:6, na akʋ̃ bozunzú ndwokɔɣizialɛ eyimmɔ nwʋ:

Mɩnla yɛ Gyehova ɩkɛyɛ ɩkɛma “bɛzabɛ mɔɔ bɛpɛ yɩ nɩ”—kile kɛɛ, bɛzabɛ mɔɔ bɔbɔ mmɔdɩnɩ kɛɛ bɔkɔnwʋ Nyamɩnlɩ bʋwɔ na bɛazɔ yɩ anyɩ nɩ a?
Wɔ ɛhɛlɛlɛ odwokɔ eyi nu nɩ, ekila a Gyehova yɩ anyɩ ideli nwʋmɔ kɛɛ ɩkɔnwʋ kɛɛ ɔbɔɔ mmɔdɩnɩ kɛɛ okozuma Bayɩbʋlʋ yɩ a? Mɩnla tɩ mɔɔ ɛkãã ɔzɔ a?

EBIYE A, ABIYE IKEƔIZIA KƐƐ: “Mɩnla ti mɔɔ ɛ nɩɩ Gyehova Dasɩvʋlɔmaa suma Bayɩbʋlʋ yɩ a?”

Mɩnla yɛ ɛkɛhã a?

YƖ DƆKƆWƆLƐ

Ɩwɔ numɔ kɛɛ Bayɩbʋlʋ yɩ zumalɛ ɩ́la azɩ dɩyɛ, naasʋ̃ sɛ osuma a ɩkɔhʋla ɩkɛma ekenyia anyɩnlɩlelɛ daabaa. Kɔ ɔzʋlɔ fa wʋ nwʋ tiã Gyehova zʋ, na ikeyila wʋ.

Kɛ Okowuwa Ekeze a?

Nɔhʋanlɛ ndwokɔ mɔɔ ɩwɔ Bayɩbʋlʋ yi nu nɩ ɩtʋ bʋlɔ ɩma wʋ a? Mɩnla ti mɔɔ ɛkãã ɔzɔ a?
Kɛ ɩkɛyɛ na wʋahile kɛɛ Bayɩbʋlʋ mɔɔ osumaa nɩ ɩtʋ bʋlɔ ɩma wʋ a?
Mɩnla ti mɔɔ ɩsɛ kɛɛ esiã Gyehova kɛɛ ɩwʋwa wʋ ma ɔhɔlɩ ɔzʋlɔ ozumá Bayɩbʋlʋ yɩ a?

Eɣile mɔɔ yewieli ɔfʋã eyi:

Bʋtayɩ

Bɔ mmɔdɩnɩ kɛɛ ɛkɛyɛ wʋ Bayɩbʋlʋ dɩyɛzumanlɛ yɩ, ɩáyɛ bʋwɔ kʋlaa nɩ eɣile ɔkʋ̃ wɔ dapɛnɩ bela nu. Sɛ mmɩlɩ mɔ ɛfa osuma dɩyɛ nɩ ɩsɩnza a, pɛ́ mmɩlɩ fʋlɔ fa suma.

Bʋtayɩ mvʋlɔ:

Your other goal