CƐ̃́Ɛ́-ÐƐ̀ 12
Ðɛ́ Mu M̀ Gbo Kpáùn Ɓɛ́ M̀ Ké Baɓoɔ Cɛ̃́ Teeɛ́?
Baɓoɔ cɛ̃́-cɛ̃́ nyu nyɔ kpáná dyí. Kɛɛ, ɔ se xwa fɛ̃́ìn ti séín. Tiɔ̀ ɖíɛ́ ɓè ní, m̀ ɓɛ́ìn hwìɖìi poɛ̀n kɛbì nì mu Baɓoɔ cɛ̃́ɛ ɓɛ́ìn tee ní. Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ m̀ kéà dúún ku, ɓɛ́ m̀ kéà nyu teeɛ́? Ðɛ́ ɓɛ́ìn m̀ gbo kpáa, ɓɛ́ m̀ ké dúún ku kɛbì m̀ mɛ dyé fũ̀à-fṹá dyíɛ́?
1. Xwíníínɔ̀ nyɛ́ kɔ̃̀ jè Baɓo-cɛ̃́-cɛ̃́ kpaà ɖɛ kɛ́?
“Geɖepɔɔ-wùɖùɔ̀ mɔ̀ cĩ́-cĩ́-wùɖù, ké ɔ nì kũ̀à nyuɛń.” (Híìbúɖúù 4:12) Baɓoɔ kpa ɖɛ, sepoɛɖe ɔ tɛ̀mɛ̀ìn Geɖepɔɔ hwìɖìi-poìn-ɖɛ̀ ɓè kè kà ɔ hwòɖòɔ̀ nyu nìɛ̀ ɓá m̀ jè dyíɛ. Ɔ ní kpá m̀ gbo, ɓɛ́ m̀ ké ɖɛ ɓè dyuò ɖòùn pu, kɛɛ ɔ kpá m̀ gbo, ɓɛ́ m̀ ké jàà fɔ̀nɔ̀-hwòɖò kè hwòɖò-kɔ̃-dè-ɖɛ̀ ɓéɖé ɖekè. Ðɛ ɓɛ́ ɔ kpa ɖɛ mìɔ kɛɛ mɔ̀, Baɓoɔ kpá m̀ gbo ɓɛ́ m̀ ké Jɛhovaa ɓatò jù. M̀ dyi Baɓoɔ cɛ̃́ ní, m̀ wɔ̃́ìn gbo ɓɛ́ ɔ kpéɔ̀ ké m̀ kpáná dyí nyu ɖé nì cĩ́-cĩ́ɔ̀ mú.
2. Xwíníínɔ̀ nyɛ́ kɔ̃̀ jè ɔ kpaà ɖɛ, ɓɛ́ m̀ kéà dyí dyuò kà ɓɛ́ Baɓoɔ jàà-wùɖù ɓèɔ̀ kpa ɖɛ kɛ́?
Jàà ɓè nìà ɖé Baɓoɔ múɛɛ nì kà kɔ́mɔ́-ɖɛ̀ ɓè nìà kɛ. Ðɛa kɔ̃̀ jè ɖé Baɓoɔ poà à kpéí kà à mɛ ‘dɔ̃ jàà ɓɛ́ à kéɛ jè gboi kpɔ̃ kóɖó-kóɖó’ kɛ̀. (Nɔ́ɔ́ 23:23) À dyi Baɓoɔ ɖɛ kpa jè hwìɖìi pɛ̃́ìn ní, à mu dúún kuùn ɓɛ́ à kéɛ cɛ̃́ tee kɛbì à mɛ ɓéɖé dyí-gbò-ɖɛ̀ ɓèɛ.—Zà Nɔ́ɔ́ 2:4, 5 wuɖuún.
3. Xwɛ̀ Jɛhova ɓɛ́ìn m̀ gbo kpáa, ɓɛ́ m̀ ké Baɓoɔ cɛ̃́ teeɛ́?
Sepoɛɖe Jɛhova mɔ̀ Ðɛ-séín-mɛ-nyɔ̀ kè nì Ɓàto jèɛɛ, ɔ mɔ́ ɓɛ́ ɔ ké m̀ gbo kpá, ɓɛ́ m̀ ké ɔ jè cɛ̃́. Ɔ ɓɛ́ìn nyuɛ ɓɛ́ nì “hwòɖòɔ̀ ké wɔ̃́, ɓɛ́ [m̀] ké kpé ɓɛ́ìn, ɓɛ́ [m̀] ké ɖɛ ɔ hwòɖòɔ̀ po gbɔɛɛ nyu.” (Zà Fèɖópĩ̀ɔ̀ 2:13 wuɖuún.) Ɔ jèɛɛ, ɔ jù ké m̀ dyi kpé pàɖà mɔ́ tiɔ̀ ɖíɛ́ ɓè ɓaɖa, ɓɛ́ m̀ ké ɖɛ cɛ̃́ mɔɔ ɓɛ́ m̀ ké ɖɛ m̀ cɛ̃́à kɛɛ kũ̀à mú nyùìn ní, ɔ ɓɛ́ìn m̀ gbo kpáa. Ɔ jù ké m̀ dyi kpé pàɖà mɔ́, ɓɛ́ m̀ ké dyí-gbò-ɖɛ̀ ɓè mɔɔ gbo-vɔ̃-vɔ̃ ɓè wɔ̃ zi ní, ɔ ɓɛ́ìn tòɛ̀. Ɓaà Jɛhova ti séín, ɓɛ́ ɔ ké m̀ gbo kpá, ɓɛ́ m̀ ké Baɓoɔ cɛ̃́ tee—1 Tɛ̀sàɖónìà 5:27.
ÐE ÐƐ MÚIN CÁ
Cɛ̃́ kà m̀ ɓɛ́ìn Baɓoɔ cɛ̃́ɛ tee kɛbì m̀ mɛ ɓéɖé kũ̀à pàɖà mɔɔ m̀ mɛ dyé gbo-vɔ̃-vɔ̃ dyí sɔ̀ìn ɖé nyɔ tɔ̀ɔ̀ ɓè gboɛ. Nìí, dyé kà Jɛhova mu m̀ gbo kpáùn, ɓɛ́ m̀ ké dúún kuɛ.
4. Po nì Baɓo-cɛ̃́-cɛ̃́ɔ̀ kĩ́ín
Tiɔ̀ ɖíɛ́ ɓè ní, cĩ́-cĩ́ ku wɔ̃ mìɔ, ké ɔ ɓɛ́ìn nìɛ̀ kà à se ti pàɖà ɓéɖé ɓó Baɓoɔ cɛ̃́ jèɛ. Ðɛ́ ɓɛ́ìn à gbo kpáa kɛ́? Zà Fèɖópĩ̀ɔ̀ 1:10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn.
-
Nì hwòɖò ɖá ɖɛ́ mɔ̀ ɖɛ ɖíɛ́ ɓè ɓɛ́ wa mɔ̀ “ɖɛ nɔ̀mɔ̀ dyíin” ɓè ɖé à cĩ́-cĩ́ɔ̀ múɛ́?
-
Xwɛ̀ m̀ ɓɛ́ìn nì Baɓo-cɛ̃́-cɛ̃́ɔ̀ poɛ kĩ́ín nyɛ́?
-
Ɔ jù ké m̀ dyi bɔ́kè ɖò pĩ́ɔ mú dyíìn, ké m̀ dyi mɔ́ ɓɛ́ m̀ ké sɔ́ɔ́-kpò ɓè ɖé poín, sɔ́ɔ́ ɓèɔ̀ se ɖé ɓɛ́ìn mu
-
Ɔ jù ké m̀ dyi sɔ́ɔ́-kpò ɓèɔ̀ ɖé po kĩ́ín ní, nì mu pá ɓéɖéìn, ɓɛ́ m̀ ké pĩ́ɔ vò-vò ɖé po. Kà dyúáɖòɔ̀ kàà m̀ dyi “ɖɛ mɔ̀ ɖɛ nɔ̀mɔ̀ dyíin nyɛɛ” po kĩ́ín ɖé nì cĩ́-cĩ́ɔ̀ mú ní, nì mu wa nyuɛ ɓɛ́ìn, ké nì mu ti ɓéɖéìn, ɓɛ́ m̀ ké ɖɛ tɔ̀ɔ̀ ɓè nyu
Baɓoɔ cɛ̃́-cɛ̃́ dè à hwòɖò dyi—hwòɖò-dyi-dè-dè ɓɛ́ ɔ ɓá Geɖepɔɔ dyí-dyuò-dyuò kè ɔ ɓiè-ɓiè dyíɛ. Zà Máfíò 5:3 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Xwɛ̀ à ɓɛ́ìn kpáná dyéɛ ɔ jù ké à dyi à Baɓo-cɛ̃́-cɛ̃́ɔ̀ po kĩ́ín níɛ́?
5. Ku dúún ɖé gbo-vɔ̃-vɔ̃ xwaún
Tiɔ̀ ɖíɛ́ ɓè ní, nyɔ tɔ̀ɔ̀ ɓè ɓɛ́ìn vɔ̃ɔ ɓɛ́ wa kéɛ nyu ɓɛ́ m̀ ké kpéí hwɛ̀ ɓó Baɓoɔ cɛ̃́ jè. Dyé ɖɛ Fànàsésíkò zĩ̀ìn ma múɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, ɖɛ́ Fànàsésíkòɛ̀ ɓàto ɓèɔ̀ kè ɔ gbò-xwíníín-nyɔ̀ ɓèɔ̀ nyu ma ti ɔ cɛ̃ ma ɖɛ ɔ nì ma cɛ̃́ɛń nyɛɛ jè wa gbo kɛ́?
-
Xwɛ̀ ɔ nyu ma kpáná dyíɛ ɓó dúún ku jè kɛ́?
Zà 2 Tímétè 2:24, 25 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Xwɛ̀ nì gbò-xwíníín-nyɔ̀ ɓèɔ̀ kè nì ɓàto ɓèɔ̀ hwòɖò nyu nìɛ̀ ɓá ɖɛ m̀ nìà cɛ̃́ɛń nyɛɛ jè dyíɛ́?
-
Kà vɔ̀sì ɓè nìà kɛ nyuà cɛ̃ɛ kɛɛ, xwɛ̀ m̀ mɛ nyu nyɔ ɖò ɓɛ́ ɔ se nì Baɓoɔ cɛ̃́ jè múàùn dyi kpáìn nyɛɛ gɔ̃̀ jùɛ kɛ́? Xwíníínɔ̀ nyɛ́ kɔ̃̀ jèɛ́?
6. Dè Jɛhova hwòɖò kɔ̃, ɓɛ́ ɔ ké m̀ gbo kpá
Kà à muà Jɛhova bũ̀in xwɛ̃́ìn nyɛɛ, kàa à mu ɔ hwòɖò dyi dèɛ̀ mɔ́ùn mìɔ. Ɔ nì ná dyɛo, kɛɛ ɔ ɓɛ́ìn mú kàmàà, ɓɛ́ à ké ɖɛ ɓè gbo zĩàìn ɖé à cĩ́-cĩ́ɔ̀ mú, ɓɛ́ à ké ɔ mɔ́ɔ́-ɖɛ̀ nyu. Ɔ jù ké m̀ dyiɛ náa hwìɖìi poìn ní, mɔ̀ùn ɖá ɓɛ́ m̀ ké sa. Jɛhova mu m̀ gbo kpáùn. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, ɖɛ́ mɔ̀ ɖɛ ɓè ɓɛ́ Jĩ́ìn zĩàìn ma gbo, ɓɛ́ ɔ ké ma Jɛhova hwòɖò dyi dè kɛ́?
-
Ðɛ́ nɔ̀mɔ̀ m̀ hwìɖìi ɓá ɖɛ ɔ zĩ̀àɛ̀n múɛɛ jè dyíɛ́?
Zà Híìbúɖúù 11:6 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
Ðɛ́ Jɛhova mu nyuùn ɓó nyɔ ɓè ɓɛ́ wa “mɔ́ ɔ dyiɛɛ” mɔɔ nyɔ ɓè ɓɛ́ wa vɔ̃ kóɖó-kóɖó ɓɛ́ wa ké ɔ dyí dyuò kè ɓɛ́ wa ké ɔ hwòɖò dyi dè kɛɛ bììɛ́?
-
Kà vɔ̀sìɔ̀ nyuà cɛ̃ɛ kɛɛ, nì hwòɖò ɖá Jɛhova hwòɖò dè dyi, ɔ jù ké ɔ dyiɛ dyé kà m̀ ku dúún ɓó Baɓoɔ cɛ̃́ jè kɛɛ̀?
NYƆ ÐÒ ƁƐ́ÌN NÍIŃ: “Xwíníínɔ̀ nyɛ́ kɔ̃̀ jè m̀ nìà Baɓoɔ cɛ̃́ɛń nyɛ́?”
-
Xwɛ̀ nì mu ɔ gɔ̃̀ jùùn wɛ̃́?
SṸÌN-XWÍNÍÍN
Ɔ se xwa fɛ̃́ìn ti séín dyɛo, kɛɛ Baɓoɔ cɛ̃́-cɛ̃́ ɓɛ́ìn m̀ gbo kpáa, ɓɛ́ m̀ ké fɛ̀ɛ̀ múàùn dyi kpáìn ɓó sè-ná-sèɛ̀ tiín. Dè Jɛhova hwòɖò kɔ̃ kánáá pu, ké ɔ mu m̀ mana kɔ̃ poùn.
Ðɛ-kɔ̃in-kpa-kpa
-
Xwíníínɔ̀ nyɛ́ kɔ̃̀ jè Baɓoɔ jàà-wùɖù ɓè kpaà ɖɛ ɖé m̀ gbo kɛ́?
-
Xwɛ̀ m̀ ɓɛ́ìn “ɖɛ mɔ̀ ɖɛ nɔ̀mɔ̀ dyíin nyɛɛ dyí dyuòɛ̀” kɛ́?
-
Xwíníínɔ̀ nyɛ́ kɔ̃̀ jè m̀ mɛ ɓaà Jɛhova, ɓɛ́ ɔ kéà m̀ gbo kpá, ɓɛ́ m̀ kéà Baɓoɔ cɛ̃́ teeɛ́?
CƐ̃́ ÐƐ PÀÐÀ
Dyé sɛ́ɖɛ́ hĩinyɛ ɓè ɓɛ́ wa ɖà nyɔ pàɖà gbo kpá, ɓɛ́ wa ké waà ti ɓèɔ̀ kũ̀à mú nyùìn hwòɖò-fɔ̀nɔ̀-kà kɛ.
“Kà M̀ Ké Nì Tiɔ̀ Kũ̀à Mú Nyùìn Hwòɖò-Fɔ̀nɔ̀-Kà Kɛ” (Wóɖó Nyíɔún!, Fóɖó-Vĩ̀ 2014)
Dyé kà Jɛhova nyu ma màa ɖò ɓɛ́ ɔ dyú-ɓà se ma ɔ dúún-ku-ku ɓó Jɛhova hwòɖò dyi dè jèɛɛ múin wɔ̃́ kɛɛ gbo kpáa kɛ.
Dyé kà gàa ɖò nyu ma ɔ gmàà dúún-ku-kuɔ̀ kpáná kɔ̃ún dyéɛ kɛ.
Tiɔ̀ ɖíɛ́ ɓè ɓaɖaín, wa kpɔ̃ Jɛhova Zàse ɓè xwéɖé-dù mú ge jè. Kɛɛ, ɔ mɔ̀ jàà?
“Jɛhova Zàse Ɓè Zaìn Xwéɖé-Dù Ɓè Gbo Mɔɔ Wa Kùìn Wa Dyiì?” (Ðúú-kɔ̃-cèè-ɖɛ̀)
