BAG I 12

Ke zʼa ywimdʼo nenèn mbwe ne nke nziʼde Ñwaʼni Nsi à?

Bin yàm be là neziʼde Ñwaʼni Nsi, ndaʼndù tsemoʼ ngelañ a keʼ be fiag. Moʼndù o num mbètte wul o a be zʼoaʼ kuʼni nenèn mbwe bo ziʼde ke tsin nà. Numke a mbʼa mbwô ju nekagtùn nenèn mbwe ke tsin à? Ke zʼa kuʼni neywimdʼo nenèn mbwe a be be ndù a keʼ fiag à?

1. Neziʼde Ñwaʼni Nsi bʼa ju ndùb à numke?

Nummbe “ntshob Nsi bʼa ntùn, mba neta.” (Héber 4:12) Ñwaʼni Nsi bʼa ju ndùb nummbe a num ndaʼde mba Nsi num njen benntùn nyiañtu là, mbèn ndaʼde nkwade mi mfà num bo. A keʼ be tswide ben à ndaʼ ba tshu, a num mbèn njwimde be neghù zenu bo nywinde. Ju ndùb bʼa mbe Ñwaʼni Nsi num njwimdʼo nebe nshun Yaweh Nsi. Ne nke nziʼde Ñwaʼni Nsi aʼ ghù mbe yôg so bèn mbwô nèn mbwe.

2. Nelèn mbe nenùn a be ntùm Ñwaʼni Nsi là tanjoñ bʼa ju ndùb à numke?

Ba nenùn tsʼa be ntùm Ñwaʼni Nsi là bʼa mba fuʼ tsʼa tanjoñ neshu là. A ju zʼa ghù Ñwaʼni Nsi nke ntshob ben mbe “jun nenùne, ke bèn nswèn i.” (Tànkùt 23:23) A be zʼo lèn mbe nenùn a be ntùm Ñwaʼni Nsi bʼa ju tanjoñ nà, mba oaʼ kagtùn nenèn mbwe neziʼdʼé mba ngelañ ngùtni te nsi là.—Siañ Tànkùt 2:4, 5.

3. Be Yaweh Nsi ywimdʼo nenèn mbwe bo ziʼde Ñwaʼni Nsi à ndùke?

Mbʼa be ngabom ben mbèn mbe nganeta ntshùade là, Yaweh Nsi kô neywimdʼo o ziʼde tshu mfà num i. A kuʼni nefà “nzi mba neta” wù. (Siañ Filipi 2:13.) Ndùlà, a be zʼo num ndiag neta num neziʼde ke neze taʼ ju zʼo ziʼde là, mbʼa kuʼni neywimdʼo. O kô neta zʼa tshùade là num nemaʼ tsho ngùtni mba netshoʼ nku kebàn ntshùa, mba Nsi kuʼni neywimdʼo. Nke ndeʼde Yaweh Nsi njoñ ngelañ fa a ywimdʼo nenèn mbwe ne nke nziʼde Ñwaʼni Nsi.—1 Tésalônikà 5:17.

TSWEʼ NTUN MI

Yen mbʼo kuʼni nenèn mbwe neziʼde Ñwaʼni Nsi mba tà ndù o keʼ ghù ngelañ yàme, ke ngelañ bo tshwèt ntshoʼ nku mu kebàn no. Mbèn njen mba Yaweh Nsi aʼ ywimdʼo nenèn mbwe neziʼde Ñwaʼni Nsi là.

4. Fà mbwe dùʼ yu ziʼde Ñwaʼni Nsi ntùm yôg so

Tsemoʼ ngelañ, faʼ num njàm neshu kà be kwade mbe be keʼ ghù ngelañ neziʼde Ñwaʼni Nsi. Ke ze bʼa ywimde ben à? Siañ Filipi 1:10, mbèn mbùnde tshen mbètte li:

O kwade mbe “tshu tse bʼa ywimde ntùm yôg là” bʼa tsile?
O kuʼni nefà mbwe dùʼ ziʼde Ñwaʼni Nsi ntùm yôg so à ndùke?

O neʼ sansan ntùm lônga mbèn nke ndiag nekwiʼde ndoñba, mba ndoñba ke tsho yàme
Ndaʼndù o bwôgmbwe njab ndoñba ntùm lônga mba dùʼ aʼ be neneʼ sansan yàme. Be ndañndañ, o bwôgmbwe njab tshu ndùb mbwe dùʼ ntùm yôg so, mba oaʼ ghù ngelañ nefaʼ tshen tshu ndùb là mbèn ngù mba ngelañ nefaʼ tsemoʼ tshu

Neziʼde Ñwaʼni Nsi num ndunde tseben nzi num bag ywèle—tseben nzi nelèn Nsi, mba neghamdʼé. Siañ Matio 5:3, mbèn mbùnde yen bètte li:

Be fà mbwe dùʼ ziʼde Ñwaʼni Nsi ntùm yôg ben, mba zit bin be jù à?

5. Fènde mbwe netshoʼ nku kebàn

Tsemoʼ ngelañ, benntùn aʼ tèndʼo o tsin neziʼde Ñwaʼni Nsi. Yen mfiʼ Francesco. Lôde LAʼDE NETSHAÑ, mbèn mbùnde tshen mbètte li.

LAʼDE NETSHAÑ: Sa persévérance a été récompensée (5:22)

Ntùm laʼde netshañ, tunndà bo shun Francesco naʼ ngù à ndùke ngelañ a naʼ ntshob mbe a tshwèt nziʼde Ñwaʼni Nsi à?
Zit bin a naʼ njù mbʼa naʼ ndaʼde fènntù à?

Siañ 2 Timôtio 2:24, 25, mbèn mbùnde tshen mbètte li:

Yu tunndà bo shun tsho nke nkwadʼà ke num ju zʼo tshwèt nziʼdʼà?
Mba tshen nka Ñwaʼni Nsi li tshwèt ntshob là, a bètte o ghù à ndùke ngelañ mènntùn ke tshwèt nkô mbʼo ziʼde Ñwaʼni Nsi à? Numke?

6. Diag ywimde Yaweh Nsi

Oaʼ be nèn mbwe neghebte Yaweh Nsi, mba yu nzi neghù ze nekô kwiʼde. Ndaʼndù, be a ta nebade tsemoʼ mat ntùm yôg ben, num netsiañde ntù Yaweh Nsi. A be zʼa bʼa ndùlà zʼo num njuʼ wul o là, kà bot mbu. Yaweh Nsi aʼ ywimdʼo. Lôde LAʼDE NETSHAÑ, mbèn mbùnde tshen mbètte li.

LAʼDE NETSHAÑ: Jéhovah nous aide à changer (3:56)

Ntùm laʼde netshañ, Jim naʼ ghù à tsit mbade num netsiañde ntù Yaweh Nsi à?
Ke zʼa bwô o ntùm ze mfiʼ à?

Siañ Héber 11:6, mbèn mbùnde tshen mbètte li:

Ke ze Yaweh Nsi num ngù ben tse bo num “ndiag i là”—ben tse bo num nziʼde nelèn i mbèn ngù ze nekô à?
O nke njuʼ wul o à ndùke nelèn mbe o num ntsiañde ntù Yaweh Nsi mba o tshwèt nkagtùn neziʼde Ñwaʼni Nsi à?

BE MÈNNTÙN BÈTTE MBE: “O nke nziʼde Ñwaʼni Nsi à numke?”