Womepatopo 12
Otï owepatomanopa Paipïrï poko owomeparï onipioroʼkaha oweʼchoʼme?
Opoto Papa Karetarï poko womepano opatomanen neroten moro, ekemahane kapïn te takure ororo pioko womepano ma. Amukonïmbo yako ambïako, sekïrïamba wane pioropïha Paipïrï poko wïomeparï, mïkaye. Oʼtonoʼme katu weʼkuno taropa na pioropïʼmaha weinio? Otï owepatomanopa eʼchepïʼmaha oweʼchoʼme tope yeijï seʼme?
1. Oʼtonoʼme Paipïrï poko womepano tïsan neroten na?
‹Opoto Papa Euran tonure ma, poriʼpie neroten eropa ma.› (Hebrews 4:12) Paipïrï tïsan neroten moro neiara opoko Opoto Papa wonumingarï upuhoan kombaijo oʼwa, neiara yotaporï eropa opoko. Otïkon uputïrï onïrïha neroʼkon kapïn oʼwa ma, morote tupuhone oweijï maro owohoʼtopo ïan eropa te. Ijomboro chohoinie te, Opoto Papa Karetarï owepatomano pianarïme oweijïpïa poko. Owomeparï yako, Paipïrï poriʼchorïʼwa mosepatomapoa juha owemamïrï kuramarïpïa poko iʼya.
2. Tïsanoramome neroten Paipïrï tanokon weijï uputïrï, oʼto kïposeinie na?
Opoto Papa Karetarï tanokon ipioronokon tïsanoramo neroten otïkon paʼme ma. Ijokero Paipïrï kapokumaton ‹moro ipiorono epematoʼme kïʼwainie, onekaramaha eropa kïweʼchoʼkonʼme.› (Proverbs 23:23) Tïsanoramo paneroten me yeijï uputïrï, tope kïweʼkuseinie kïpoaton kïwomeparïkon onipioroʼkaha kïweʼchoʼkonʼme—kïporoʼkasangon otïkon aʼta rorïpo.—Erupïako Proverbs 2:4, 5.
3. Neiara Jehoba owepatomanopa owomeparï onipioroʼkaha oweʼchoʼme?
Poripiïn paneroten Owekïrïnenïmbome, Opanarïme eropa, Jehoba owepatomase ma tuputïrï poko oʼwa. ‹Owomepase oweijï sanorï ïan, ekïrïtopopa poriʼchorï eropa.› (Erupïako Philippians 2:13.) Ijokero amukonïmbo yakoro ambore oyapokumarï sepa oyaʼta owomepatoʼme, ijoseha owomepatoʼkon akutoʼme, owepatomanopa Jehoba. Oporiʼchorï sepa oyaʼta oyuruʼkanamo kotaʼmatoʼme, ijoseha owomeparï poko owenonopïrï, kïnïamba oʼwa. Ekemaha roten Jehobaʼwa oturupoko owepatomatoʼme iʼya pioropïʼmaha Charetarï poko owomepatoʼme.—1 Thessalonians 5:17.
Koroʼna nekatu osaʼmichako
Upuʼko neiara pioropïʼmahame Paipïrï poko owomeparïpïa oronge rorïpo tomaminie oweijï ijoseha owenonopïrï amukonʼwa. Ijombote eneko neiara Jehobaʼwa owepatomarïpïa eʼchepïʼmaha oweijï poko.
4. Koromonenome ïko Paipïrï poko owomeparï
Amukonïmboto choho pane komaminjon kïneiyan, ijoke uwapai pore neroten Opoto Papa Karetarï poko kïwomepatoʼkon kuriʼchanorï kïseneyaton. Otï te kopatomatomba? Erupïako Philippians 1:10, ijombote enïkon woturupotoʼkon poko orupïatoko:
-
Otï mekanosan amukonïmbo ‹ambore nekatu tïsangon otïkonme› omano ta?
-
Neiara Paipïrï poko owomeparï koromonenome mïamba?
-
Moro sakau nasen aruʼkahoto oʼwa moro pokiti taka, morokon topu wotaruʼkaʼmarïpïa kapïn ma
-
Morokon topukon aruʼkaʼmahotopa nasen te oʼwa, ijomboropa pore neroten moro sakau kïnotaruʼkanopa. Piaʼme roropa, ‹morokon ambore nekatu tïsangon otïkon› poko nasen oweíʼmiahoto, mondopa eropa amukon roten otïkon poko oweʼchopo kïneiyan
Charetarï poko kïwomeparïkon, moʼko uputïse kïweʼchoʼkon Opoto Papa upuhoamba kïʼwainie, kïseinie yeijï paʼme kïweʼchoʼkonʼme. Erupïako Matthew 5:3, ijombote enï woturupotopo poko orupïatoko:
-
Neiara kopatomaton Paipïrï poko kïwomeparïkon ïrï yako kïʼwainie koromonene?
5. Oweʼchepïʼmai owenonopïrï seʼme rorïpo
Amukonïmbo yako amukon Opoto Papa Karetarï poko owomeparï poroʼkasepa oʼwa mandon. Eneko otï eíʼpio Francesco poko. Eneko moro Piʼcha, ijombote enïkon woturupotoʼkon poko orupïatoko.
-
Moro piʼchaʼme ta, oʼto Francesco panarïkon maro asakarïkon neʼchon otï poko tïwomeparï ekarichïhoto iʼya tïʼwainie?
-
Otï juhïn nieporïhome neí eʼchepïʼmaha tïweíʼpio ke?
Erupïako 2 Timothy 2:24, 25, ijombote enïkon woturupotoʼkon poko orupïatoko:
-
Neiara oyasakarïkon maro opanarïkon notapoaton owomeparï poko?
-
Enïkon verse wïkarï paʼme, oʼto oweíshe ma amu atoʼkepa Opoto Papa Karetarï poko owomeparï aʼta? Oʼtonoʼme?
6. Jehoba poko otamïʼchako owepatomatoʼme
Jehoba ponaro naka kïweijïkon mero, ambore ïpose kïweijïkon sanorï kïtainie kïneiyan. Sheʼmete, koʼye topepa kïweʼpetakamarïkon kïseneyaton ichaʼmatoʼkonïmbo paʼme komandoʼkoʼme. Amumbotoro moro pame owotaporï yako, oporopïʼmai owomeparï poko. Jehoba owepatomanopa. Eneko moro Piʼcha, ijombote enïkon woturupotoʼkon poko orupïatoko.
-
Moro piʼcha ta, otïkon ta Jim neʼpetakamaipia Jehoba ïpotoʼme tïʼwa?
-
Otï oyapoi yeʼpetakamahopa poko?
Erupïako Hebrews 11:6, ijombote enïkon woturupotoʼkon poko orupïatoko:
-
Oʼto Jehoba neiyan moʼkaron ‹einiaʼma tupiniamo› ekataka—moʼkaron tope weʼkutonon tupuʼtoʼme, tïpotoʼme eropa?
-
Otï upuhoan enï oʼwa, neiara Jehoba wotaporï poko tope oweʼkuru enerï yako Tïkaretarï poko owomepatoʼme?
Amu ambïako ïngano oʼwa: «Oʼtonoʼme Paipïrï poko momepano?»
-
Neiara meyusan?
Saniʼmieme enï womepatopo ekarichïrï
Oronge rorïpo ekemahane kapïn takure yeijï, Opoto Papa Karetarï poko owomeparï owepatomanopa oronomero towaʼpore owemamïrï poko. Ororo Jehoba poko otamïʼchako, juhïn epopoamba oʼwa.
Jamarïme
-
Oʼtonoʼme Paipïrï tanokon ipioronokon tïsanorenme neroten oʼwa na?
-
Neiara ‹morokon ambore nekatu tïsangon otïkon› koromonene mïamba?
-
Oʼtonoʼme Jehobaʼwa owoturuposepa ma owepatomatoʼme owomeparï onipioroʼkaha oweʼchoʼme?
Ambore pioko upuʼko
Okopaiʼmieme amukon epatomatoʼkon eneko juhane tïkuriʼchanorï aʼkutoʼme iʼyainie.
Eneko neiara Jehobaʼwa amu worïi epatomahopa oʼtonoʼme tïpotoʼme yeʼkuru onuputïhapai inio aʼta.
Eneko neiara amu kariʼnia wosepatomahopa eʼchepïʼmaha tïpïtï weíʼpio ke.
Amukonïmbo Jehoba poko Worupïatonon emendoaton otasakame omano anïʼmanamome. Ipioro te moro na?
“Do Jehovahʼs Witnesses Break Up Families or Build Them Up?” (Web article)
