A álilliséch óm káé ewe Paipel, nge eli esap mecheres iteitan. Fán ekkóch, eli kopwe ekieki ika kopwe chúen tongeni sópwósópwóló le káé. Nge pwata a aúchea óm kopwe sópwósópwóló le káé? Met a tongeni álisuk le fókkun achocho inaamwo ika a wor met a áweiresuk?

1. Pwata a aúchea óm káé ewe Paipel?

“Än Kot kapas a manau o manaman.” (Ipru 4:12) A aúchea ewe Paipel pokiten a áiti ngonuk usun án Kot ekiek me an memmeef usum. Ese chék álisuk le alapaaló óm sile, nge a pwal álisuk le eáni ewe tipachem seni Kot me awora ngonuk ápilúkúlúk. Nge lap seni meinisin, a álisuk le wiliti chiechien Jiowa. Atun ka káé ewe Paipel, ka mut ngeni manamanan an epwe émúrinnéló manawom.

2. Pwata a lamot ach sipwe mirititi aúchean ewe enlet lón ewe Paipel?

Ekkewe pwóróus mi enlet lón ewe Paipel, ra usun pisek aúchea. Ina popun ewe Paipel a pesekich ach sipwe ‘kamö let, nge sisap amömöla.’ (Än Salomon Fos 23:23) Atun sia chemeni úkúkún aúchean ewe enlet lón Paipel, sia fókkun achocho le sópwósópwóló le káé inaamwo ika a wor met a áweiresikich.​—Álleani Än Salomon Fos 2:4, 5.

3. Ifa usun Jiowa a tongeni álisuk le sópweló le káé?

Pokiten Jiowa i ewe Chón Féruketá mi unusen manaman, me i Chiechiom, iwe a mochen álisuk le káé usun i. A tongeni fang ngonuk óm ‘mochen me om tufichin apwönüetä letipan.’ (Álleani Filipi 2:13.) Ina minne ika fán ekkóch ka meefi pwe kese mochen káé are apwénúetá met ka káé, i a tongeni álisuk. Ika a pwal lamot ngonuk péchékkúl ren óm kopwe pworacho ngeni óm kewe weires are riáfféú, i a tongeni apéchékkúlok. Kopwe kan tittingorei Jiowa an epwe álisuk le sópweló lón óm káé.​—1 Tesalonika 5:17.

 KÚTTAFICHI

4. Akkomwa óm káé ewe Paipel

Fán ekkóch sia fókkun tawengaw, iwe usun itá ese wor ach fansoun káé. Met a tongeni álisikich? Álleani Filipi 1:10, me mwirin pwóróusfengen wóón ekkeei kapas eis:

• Óm ekiek nge ikkefa ekkóch ekkewe mettóch mi “fokun mürina” are fókkun aúchea lón manawach?

• Ifa usun ka tongeni akkomwa óm káé?

1. Ika kopwe amasouolóng ppi lón eú pwokit me pwal sótun uwoulóng faú, iwe ina esap kuchulóng ekkena faú

2. Ika ka akkomw uwoulóng faú lón ewe pwokit, iwe epwe kuchulóng lape ngeni ewe ppi. Pwal ina usun, ika ka akkomwa “mine a fokun mürina” are aúchea lón manawom, iwe epwe taweéch minne ka féri, me epwe pwal wor óm fansoun fán iten pwal ekkóch mettóch

Ach káé ewe Paipel a ámenemenéchúkich lón pekin ngún, weween ach meefi lamoten ach sipwe silei Kot me fel ngeni. Álleani Mateus 5:3, me mwirin pwóróusfengen wóón ei kapas eis:

• Ifa usun sia tongeni feiéch seni ach akkomwa ach káé Paipel?

 5. Likiitú chék lón óm káé inaamwo ika aramas rese sani

6. Lúkúlúk pwe Jiowa epwe álisuk

 MENLAPAN

Inaamwo ika ese kan mecheres óm káé ewe Paipel iteitan, nge óm káé a tongeni álisuk le eáni manaw mi pwapwa tori feilfeiló. Sópweló le lúkúlúk wóón Jiowa me i epwe efeiéchuk.

Enniwili

• Pwata ka aúcheani ekkewe pwóróus mi enlet lón ewe Paipel?

• Ifa usun ka tongeni “filätä mine a fokun mürina” are aúchea lón manawom?

• Pwata a lamot óm kopwe tingorei Jiowa an epwe álisuk le sópweló lón óm káé Paipel?