TOLI 12

San o yeepi i fu tan sutudeli Beibel?

PEE

A omen wini we fende te we sutudeli Beibel, ma a ná ala yuu a sani ya makiliki. Son leisi, kande ye akisi iseefi taki: ‘Mi o poi tan sutudeli Beibel?’ Saide i mu meke moiti fu sutudeli Beibel go doo winsi aa makiliki? San o yeepi i fi ya gi abaa?

1. Saide a bun fu sutudeli Beibel?

Beibel taki: ‘A wowtu fu Gadu de a libi. A abi kaakiti’ (Hebrewsama 4:12). Beibel a wan pelensipali buku, bika ai soi u fa Gadu e denki. Aini Beibel we leisi taki Gadu lobi u. Te ye sutudeli Beibel, a ná leli ye leli sani namo, ma ai yeepi i fu du sani anga koni tu. Boiti dati, yo sabi san a den moin sani di Gadu paamisi taki aw du gi wi aini a ten di e kon. Ma a moo pelensipali sani, a taki Beibel o yeepi i fu toon Yehofa mati. Te ye sutudeli Beibel, aw yeepi i fu abi wan moo bun libi.

2. Saide i mu e si a sutudeli di ye sutudeli Beibel enke wan gaan sani?

Den leli fu Beibel de enke wan gudu. Neen meke Beibel taki ‘u mu bai san tuu, noiti u mu seli en’ (Odo 23:23). Efi ye si den leli fu Beibel enke gudu, yo meke ala moiti fu sutudeli ala yuu, winsi aa makiliki.—Leisi Odo 2:4, 5.

3. Fa Yehofa sa yeepi i fu tan sutudeli Beibel?

A Yehofa na a Sama di meke i. Neen na a moo gaan Mati fii. A wani yeepi i fu kon sabi en moo bun. A sa gii ‘a kaakiti di yu abi fanowdu. A sa meke i angii tu fu du sani di e meke a piisii’. (Leisi Filipisama 2:13.) A sani ya e soi taki Yehofa sa yeepi i te ai taanga gii fu sutudeli Beibel. A sa yeepi i tu te ai taanga gii fu du sai leli. Efu sama wani tapu i fu sutudeli Beibel, Yehofa sa gii a kaakiti di yu abi fanowdu fu go doo. I mu e begi Yehofa ala yuu fu a yeepi i fu tan sutudeli Beibel.—1 Tesalonikasama 5:17.

LUKU A TOLI YA MOO FINI

Wo luku san sa yeepi i fu tan sutudeli Beibel, winsi i lai sani e du, efuso te sama wani tapu i fu sutudeli. Wo si tu fa Yehofa sa yeepi i fu holidoo.

4. I mu e si a sutudeli di ye sutudeli Beibel enke wan pelensipali sani

Son yuu we lai sani e du te, da we poti a sutudeli di u mu sutudeli Beibel a wan se. Ma san sa yeepi i? Leisi Filipisama 1:10, da i luku efii poi piki den akisi ya:

San a wantu fu ‘den moo pelensipali sani’ aini i libi?
Fai sa soi taki a sutudeli di ye sutudeli Beibel pelensipali gii?

Efii lai santi aini wan boketi, peesi naw de fu poti ala den siton aini moo
Efii poti den siton aini fosi, yo man poti gaanse fu a santi aini ete. A so a de tu taki efi ye poti ‘den moo pelensipali sani’ a fesi, yo abi ten sai fu du den sani ya. Yo fende ten fu du taa sani tu

Libisama abi Gadu fanowdu. Te ye sutudeli Beibel, a sani ya e yeepi i fu kon sabi fai mu dini Gadu. Leisi Mateyesi 5:3, da i luku efii poi piki a akisi ya:

Sowtu wini wo fende te we meke ten fu sutudeli Beibel?

5. Tan sutudeli Beibel winsi sama wani tapu i

Kande son sama o wani tapu i fu sutudeli Beibel. Luku a toli fu Francesco. Pee a FELON, da i luku efii poi piki den akisi ya.

FELON: A fende wini di a holidoo (5:22)

San den famii anga den mati fu Francesco du di a taigi den san a be e leli aini Beibel?
Sowtu wini a fende di a tan sutudeli?

Leisi 2 Timotiyesi 2:24, 25, da i luku efii poi piki den akisi ya:

Fa den famii anga den mati fi ye si a sutudeli di ye sutudeli Beibel?
Te i luku san den tekisi ya e taki, da sai mu du te wan mati efuso i famii ati e boon a yu fu di ye sutudeli Beibel? Saide i mu du a sani ya?

6. I mu e biibi taki Yehofa o yeepi i

O moo ye kon lobi Yehofa, o moo yo wani du san a taki. Ma toku a ná ala yuu a makiliki fu kengi i manii. Efi ye fii enke ai taanga gii fu kengi i manii, ya mu gi abaa, Yehofa poi yeepi i. Pee a FELON, da i luku efii poi piki den akisi ya.

FELON: Yehofa yeepi u fu kengi (3:56)

San yeepi Jim fu kengi a fasi fa a be e libi?
Sai lobi fu a toli fu Jim?

Leisi Hebrewsama 11:6, da i luku efii poi piki den akisi ya:

San Yehofa o du gi den sama di e meke moiti fu sabi en, anga den sama di e meke moiti fu du san a wani?
Enke fa a tekisi ya e soi, da fa Yehofa e si a moiti di ye meke fu tan sutudeli Beibel?

KANDE SON SAMA O AKISI I TAKI: ‘Saide ye sutudeli Beibel?’

Fai be o piki den?

SAI LELI?

Winsi fa aa makiliki ala yuu fu sutudeli Beibel, toku efii holidoo, yo piisii fu teego. Efi ye fitoow Yehofa, da i go doo anga a sutudi, aw belesi i.

Sai be o piki?

Saide i lobi den sani di ye leli aini Beibel?
San o yeepi i fu ‘sabi san a den moo pelensipali sani’?
Saide i mu akisi Yehofa fu yeepi i fu tan sutudeli Beibel?

Sikiifi a dei di i kaba a pisi ya:

Puubei a sani ya

Meke moiti fu sutudeli ala wiki, winsi wan leisi wan wiki. Efii si enke i naw poi sutudeli na a dei di i be poti, meke moiti fu fende wan taa dei aini a wiki de fu sutudeli.

Taa sani di i sa puubei:

Taa sani di i sa puubei