Bibulukalan nafa ka bon. Nka, o koo tɛ ɲɛ jijali kɔ. Tuma dɔw la, n’a sɔrɔ i b’i yɛrɛ ɲininga n’i bena se ka taga ɲɛ n’i ka bibulukalan ye. Mun na kuun b’a la i ka banba ka taga ɲɛ n’i ka bibulukalan ye? Mun lo bena i dɛmɛ i k’i jija gwɛlɛyaw bɛɛ n’a ta?

1. Mun na bibulukalan nafa ka bon?

“Ala ka kuma ɲanaman lo, fanga b’a la.” (Eburuw 4:12). Bibulu nafa ka bon sabu a be se k’i dɛmɛ ka Ala ka miiriyaw lɔn. Ka fara o kan, a b’a yira ko Ala b’i kanu. A b’i dɛmɛ ka lɔnniya sɔrɔ. Nka, o dɔrɔn tɛ. A b’i dɛmɛ fana ka hakilitigiya sɔbɛ sɔrɔ ani ka kɛ ni jigiya ye. Min yɛrɛ kɔrɔtanin lo kosɔbɛ, o ye ko Bibulu be se k’i dɛmɛ i ka kɛ Jehova teri ye. N’i be Bibulu kalan, o kalan be nɔɔba to i kan. O bena kɛ sababu ye i ka ɲɛnamaya kɛcogo be fisaya.

2. Mun na an ka ɲi ka Bibulu ka kalanw jati fɛɛn nafamanbaw ye?

Tiɲɛnkalan minw be Bibulu kɔnɔ, u be i n’a fɔ nafolofɛn nafamanbaw. O kama, Bibulu b’an jija ko an ka “tiɲɛ san,” an “kana a feere.” (Talenw 23:23, Bible senuma). N’an y’a to an hakili la ko Bibulu ka kalanw nafa ka bon, an bena an jija ka to k’a kalan hali ni koo dɔw wala mɔgɔ dɔw b’a fɛ k’an bali o la.—Talenw 2:4, 5 kalan.

3. Jehova be se k’i dɛmɛ cogo di i ka taga ɲɛ i ka kalan na?

Komi Jehova ye i Danbaga n’i teri ye, ani sebagayabɛɛtigi lo, a b’a fɛ k’i dɛmɛ i k’ale lɔn. A be se ‘k’o kɛli nigɛ don i la k’a kɛ see di i ma.’ (Filipikaw 2:13 kalan). O kama, n’i mako be jijali la tuma dɔw la walisa ka Bibulu kalan, wala k’o kalan sira tagama, a be se k’i dɛmɛ. N’i mako be fanga la fana walisa ka see sɔrɔ gwɛlɛyaw wala kɔrɔbɔliw kan, a be se k’o di i ma. Jehova deli tuma bɛɛ a k’i dɛmɛ i ka taga ɲɛ n’i ka bibulukalan ye.—1 Tesalonikaw 5:17.

 A ƝINI KA DƆ LƆN TUGUN

4. Bibulukalan koo kɛ i ɲɛnako fɔlɔ ye

Tuma dɔw la, a be se ka kɛ an ɲɛɛ na ko an bolo degunnin lo kojugu fɔɔ wagati yɛrɛ t’an fɛ ka bibulukalan kɛ. N’o lo, mun lo be se k’i dɛmɛ? Bibulu b’a fɔ ko: “Aw k’a filɛ fɛɛn minw kɔrɔtanin lo kosɔbɛ walisa aw ka kɛ jalakibaliw ye ani aw kana mɔgɔ si kunnatiɲɛ fɔɔ Krista ka loon na.” (Filipikaw 1:10, NW). A’ ye ɲiningali nunu kɛ ani ka baro kɛ u kan:

• E ka miiri la, “fɛɛn minw kɔrɔtanin lo kosɔbɛ” an ka ɲɛnamaya la, o ye jumanw lo ye?

• Cogo juman na i be se k’i ka bibulukalan koo kɛ i ɲɛnako fɔlɔ ye?

1. N’i ye cɛncɛn nin don soon na, ani i b’a fɛ ka kabakuru nunu fara a kan, o kabakuruw bɛɛ tɛna donyɔrɔ sɔrɔ.

2. N’i kɔnna ka kabakuruw lo don, cɛncɛn fanba bena donyɔrɔ sɔrɔ. O cogo kelen na, “fɛɛn minw kɔrɔtanin lo kosɔbɛ,” n’i y’olu kɛ i ɲɛnako fɔlɔ ye, i bena wagati sɔrɔ k’u kɛ ani ka fɛɛn wɛrɛw fana kɛ.

Adamadenw danna cogo min na, u mako b’a la ka Ala lɔn ani k’a bato. O tɛ se ka kɛ n’an ma bibulukalan kɛ. Matiyo 5:3 kalan. O kɔ, a’ ye ɲiningali nin kɛ ani ka baro kɛ o kan:

• N’an be bibulukalan koo kɛ an ɲɛnako fɔlɔ ye, o b’an nafa cogo di?

 5. Kana i fari faga hali ni dɔw b’i kɛlɛla i ka kalan kosɔn

6. I jigi la Jehova kan walisa a k’i dɛmɛ

 MIIRIYA JƆNJƆN

Ka bibulukalan kɛ, o man nɔgɔ tuma bɛɛ. Nka, o be se k’i dɛmɛ ka ɲɛnamaya kɛ hɛɛrɛ la fɔɔ abada. To k’i jigi la Jehova kan, a bena i duga o kosɔn.

I ye mun lo faamu?

• Mun na Bibulu ka kalanw nafa ka bon kosɔbɛ ele fɛ?

• I be se k’a yira cogo di ko bibulukalan ye koo ye min kɔrɔtanin lo kosɔbɛ e fɛ?

• Mun na i ka ɲi ka Jehova deli a k’i dɛmɛ i kana bibulukalan dabila?