UKPEPN̄KPỌ 12
Nso Idin̄wam Fi Aka Iso Ekpep Bible?
Enen̄ede ọfọn ikpep Bible. Edi imọdiọn̄ọ ke ndikpep Bible idịghe ekpri n̄kpọ. Ndusụk ini emekeme ndikere ke udûkemeke ndika iso n̄kpep Bible. Edi ntak emi ọfọnde anam se ekekeme man aka iso ekpep Bible? Nso idin̄wam fi okûtre ndikpep Bible idem ke ini mîmemke?
1. Ntak emi ọfọnde ekpep Bible?
“Ikọ Abasi enyene uwem onyụn̄ enyene odudu.” (Mme Hebrew 4:12) Bible ayan̄wam fi ọdiọn̄ọ se Abasi aduakde ye adan̄a nte enye amade fi. Bible ayan̄wam fi ọdiọn̄ọ ediwak n̄kpọ, oyonyụn̄ anam fi enyene ọniọn̄ ye idotenyịn. Se ifọnde ikan edi ke Bible ayan̄wam fi enen̄ede ekpere Abasi—edi ufan esie. Nte afo osụk ekpepde Bible, yak Bible an̄wam fi okpụhọde.
2. Ntak emi ọfọnde ọdiọn̄ọ se akpanikọ emi Bible ekpepde ekemede ndinam nnọ fi?
Akpanikọ emi odude ke Bible enen̄ede ọfọn, etie nte n̄kpọuto. Enye esịn Bible ọdọhọ ete, “Dep akpanikọ kûnyụn̄ unyam enye.” (Mme N̄ke 23:23) Edieke idiọn̄ọde adan̄a nte akpanikọ Bible ọfọnde eketre, iyanam se ikekeme man ika iso ikpep Bible, idem ke ini n̄kpọ anamde ọsọn̄ nnyịn ndikpep Bible.—Kot Mme N̄ke 2:4, 5.
3. Nso ke Jehovah edinam man an̄wam fi aka iso ekpep Bible?
Jehovah oyom fi enen̄ede ọdiọn̄ọ imọ, sia enye okobot fi; ti ke enye edi Ufan fo. Enye ekeme ndinọ fi “odudu” ekpep Ikọ esie. (Kot Philippi 4:13.) Ọwọrọ ini ekededi emi idem ememde fi, enye ekeme ndinọ fi odudu ekpep Bible m̀mê anam se ekpepde. Enye onyụn̄ ekeme ndinọ fi odudu ebe idomo ekededi onyụn̄ ọyọ ukọbọ ekededi. Sibọn̄ akam ben̄e Jehovah Abasi ete an̄wam fi aka iso ekpep Bible.—1 Thessalonica 5:17.
SỊN IDEM KPEP
Se se idin̄wamde fi okûtre ndikpep Bible idem ke ini enyenede ediwak n̄kpọ ndinam m̀mê ke ini ẹkọbọde fi. Oyokụt n̄ko nte Jehovah edin̄wamde fi aka iso ekpep Ikọ esie.
4. Da ndikpep Bible nte ata akpan n̄kpọ
N̄kpọ esiwak ọnọ nnyịn ndusụk usen tutu etie nte ini idụhe se ikpepde Bible. Nso idin̄wam fi ekpetie ntre? Kot Philippi 1:10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ekere ke nso ye nso idi “akpan n̄kpọ ikan” ke uwem emi?
-
Nso ke akpanam man ndikpep Bible edi akpan n̄kpọ ọnọ fi?
-
Edieke ebemde iso ọdọn̄ ntan ke bọket mbemiso ọdọn̄de ikpọ itiat, bọket oro ididụkke ediwak ikpọ itiat
-
Edieke ebemde iso ọdọn̄ ikpọ itiat mbemiso ọdọn̄de ntan, ediwak ntan oyodụk. Ukem ntre, ekpebem iso anam “se idide akpan n̄kpọ ikan,” ini oyosụhọ se adade anam mme n̄kpọ eken
Ke ini ikpepde Bible, oro owụt ke ‘imokop biọn̄ ye nsatitọn̄ edinen ido’—ke imenen̄ede iyom ndidiọn̄ọ Abasi nnyụn̄ nnam n̄kpọ esie. Kot Matthew 5:6, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ufọn ke isidia ima ida ndikpep Bible nte akpan n̄kpọ?
5. Ka iso kpep N̄wed Abasi ọkpọkọm ẹkọkọbọ fi
Ndusụk ini mme owo ẹkeme ndinam n̄kpọ man afo etre ndikpep Bible. Se se iketịbede inọ Francesco. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ke vidio oro, nso ke mme ufan Francesco ye eka esie ẹkenam ke ini enye eketịn̄de se enye ekpepde ọnọ mmọ?
-
Nso ikeditịbe ke ntak emi enye mîketreke ndikpep Bible?
Kot 2 Timothy 2:24, 25, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi mbon ubon mbufo ye mme ufan fo ẹma se afo ekpepde ke Bible?
-
Itie Bible emi ọdọhọ fi anam n̄kpọ didie edieke mme owo ẹyatde esịt ke ntak emi afo ekpepde Bible? Ntak ọfọnde anam ntre?
6. Yak Jehovah an̄wam fi
Nte nnyịn ikperede Jehovah, ntre ke edinen̄ede idọn̄ nnyịn ndinam se enye amade. Edi ekeme ndisọn̄ nnyịn ndikpụhọde ndusụk n̄kpọ ke uwem nnyịn man idu uwem nte Jehovah amade. Ekpedi oro etịbe ọnọ fi, kûyak idem emem fi. Jehovah ayan̄wam fi. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ke vidio oro, nso ke Jim okokpụhọde ke uwem esie man esịt enem Jehovah?
-
Nso ke enen̄ede ama ke mbụk esie?
Kot Mme Hebrew 11:6, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ke Jehovah edinam ọnọ “mbon oro ẹnen̄erede ẹyom enye”—mbon oro ẹnamde se ẹkekeme man ẹnen̄ede ẹdiọn̄ọ enye ẹnyụn̄ ẹnam se inemde enye esịt?
-
Ndi itie Bible emi owụt ke esinem Jehovah enye ama okụt nte afo esịnde idem ekpep Bible? Nso inam ọdọhọ ntre?
NDUSỤK OWO ẸKEME NDIBỤP: “Nso inam fi ekpep Bible ye Mme Ntiense Jehovah?”
-
Nso ke ọkpọbọrọ utọ owo oro?
SE IKPEPDE
Ndikpep Bible idịghe ekpri n̄kpọ. Edi kpa ye oro, ndikpep Bible ekeme ndinam fi odu ata uwem ke nsinsi. Ka iso beri edem ke Jehovah sia enye iditreke ndidiọn̄ fi.
Se M̀mê Emeti
-
Nso inam fi enen̄ede ama akpanikọ emi ekpepde ke Bible?
-
Nso idin̄wam fi anam “se idide akpan n̄kpọ ikan”?
-
Ntak emi anade eben̄e Jehovah ete an̄wam fi aka iso ekpep Bible?
KPEP N̄KPỌ EN̄WEN
Se n̄kpọ inan̄ emi an̄wamde ediwak owo ẹkûbaha ini mmọ.
Se nte Jehovah akan̄wamde mma kiet emi ebe esie mîkamaha enye anam se enye ekpepde ke Bible.
Se ufọn emi ete kiet adiade ke ntak emi n̄wan esie mîketreke ndikpep Bible.
Ndusụk owo ẹsidọhọ ke Mme Ntiense Jehovah ẹsisasuan ubon. Ndi akpanikọ?
“Ndi Mme Ntiense Jehovah Ẹsisasuan Ubon M̀mê Ẹsinanam Ẹdiana Kiet?” (Odu ke jw.org)
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
