LÉSON 12

Kisa ki ké idé ou kontinyé étidyé Labib-a ?

KOUTÈ SA

Asiré pa pitèt, étidyé Labib-a, a pi bon bagaj roun moun pouvé fè. Mé a vré ki sa pa toujou fasil. Détan, ou ké pitèt doumandé ou kò ès ou ké rivé kontinyé étidyé Labib-a. Poukisa sa enpòrtan ou fè éfòr pou kontinyé étidyé Labib-a ? Kisa ki pouvé idé ou kontinyé menm si ou gen problèm ?

1. Poukisa sa vréman enpòrtan étidyé Labib-a ?

« Paròl Bondjé-a vivan ké pwisan » (Hébreux 4:12). Étidyé Labib-a vréman enpòrtan, i ka idé nou konprann sa Bondjé ka pansé é kisa i ka rousanti pou nou. Gras a Labib-a, ou ké anprann bokou bagaj, ou lavi ké vin miyò é ou ké gen roun bèl èspwar. É sa ki pi bèl-a, Labib-a ké idé ou divini zanmi Jéova. Étidyé Labib-a pouvé chanjé ou lavi.

2. Poukisa sa enpòrtan konprann ki sa Labib-a ka di gen bokou valò ?

Vérité ki annan Labib-a kou roun trézòr. A pou sa Labib-a ka di : « Achté lavérité-a épi pa janmen vandé li » (Proverbes 23:23). Lò nou ka konprann ki sa Labib-a ka di gen bokou valò, nou ka fè éfòr pou pa janmen arété étidyé l’, menm si nou gen problèm (li Proverbes 2:4, 5).

3. Kouman Jéova pouvé idé ou kontinyé étidyé Labib-a ?

Jéova sa Kréyatèr Tou-Pwisan-an é ou Zanmi. I konnèt ou miyò pasé pyès ròt moun é i lé idé ou anprann konnèt li. Jéova pouvé bay ou « anvi aji é an menm tan fòrs pou aji » (li Philippiens 2:13). A pou sa, si détan ou ka santi ou kò dékourajé pou kontinyé étidyé Labib-a ouben ou ka trouvé sa rèd mété an pratik sa ou ka anprann, ou pouvé doumandé li idé ou. Épi, i pouvé bay ou fòrs ou bézwen pou tchenbé rèd annan nenpòrt ki éprèv ou gen. Priyè Jéova tout tan pou i idé ou kontinyé étidyé Labib-a (1 Thessaloniciens 5:17).

ANNOU FOUYÉ ANNAN LABIB-A

Annou gadé kouman ou pouvé kontinyé étidyé Labib-a menm si i gen ròt moun ki pa lé ou fè sa ouben si ou toujou gen bokou bagaj pou fè. Ou ké wè osi kouman Jéova pouvé idé ou kontinyé étidyé Labib-a.

4. Montré ki sa enpòrtan pou ou étidyé Labib-a

Détan, nou gen tèlman bagaj pou fè ki nou ka di nou kò nou pa gen tan pou étidyé Labib-a. Kisa ki pouvé idé ou ? Li Philippiens 1:10, épi kozé asou sa késyon-yan :

Dapré ou, « ki bagaj ki pi enpòrtan » annan lavi-a ?
Kisa ou pouvé fè pou montré ki étidyé Labib-a, a roun bagaj ki enpòrtan pou ou ?

Si ou ka ranpli roun syo ké sab an prémyé, ou pa ké gen asé plas pou mété ròch-ya.
Mé si ou ka mété ròch-ya an prémyé, i ké rété plas pou mété près tout sab-a. Annan lavi-a, a menm bagaj-a, si ou ka mété an prémyé « bagaj ki pi enpòrtan », i ké rété tan pou ròt bagaj-ya osi.

Kou nou bézwen Bondjé annan nou lavi, nou bézwen étidyé Labib-a pou konnèt Bondjé é adoré li. Li Matthieu 5:3, épi kozé asou sa késyon-an :

Si étidyé Labib-a vréman enpòrtan pou ou, ki bénédiksyon ou ké trapé ?

5. Pa lésé ròt moun-yan fè ou arété étidyé Labib-a

Pitèt i ké gen moun ki ké éséyé fè ou arété étidyé Labib-a. Gadé èkzanp Francesco. Gadé VIDÉYO-a, épi kozé asou sa késyon-yan.

VIDÉYO : Gras a so pèrsévérans i trapé bénédiksyon (5:22)

Kouman zanmi ké fanmi Francesco réyaji lò i di yé sa i té ka anprann ?
Kou i pa arété étidyé Labib-a, ki rékonpans Francesco rousouvwè ?

Li 2 Timothée 2:24, 25, épi kozé asou sa késyon-yan :

Kisa ou fanmi ké ou zanmi ka pansé di sa ou ka anprann annan Labib-a ?
Dapré sa vèrsé-ya, kisa ou divèt fè si roun moun pa lé ou étidyé Labib-a ? Poukisa ?

6. Konté asou Jéova pou idé ou

Pi nou pròch di Jéova, pi nou anvi fè li plézi. Magré sa ou pouvé trouvé sa rèd fè chanjman annan ou lavi pou swiv sa Jéova ka doumandé ou. Si ou ka pansé sa, tchenbé rèd pa moli. Jéova ké idé ou. Gadé VIDÉYO-a, épi kozé asou sa késyon-yan :

VIDÉYO : Jéova ka idé nou chanjé (3:56)

Annan vidéyo-a, ki chanjman Jim té divèt fè pou fè Jéova plézi ?
Annan so istwè, kisa ou pi kontan ?

Li Hébreux 11:6, épi kozé asou sa késyon-yan :

Kisa Jéova ké fè pou « sa-ya ki ka chaché l’ ké tout yé tchò », sa lé di pou sa-ya ki ka fè éfòr anprann konnèt li é fè li plézi ?
Kisa Jéova ka rousanti lò i ka wè patché éfòr ou ka fè pou étidyé Labib-a ?

SI ROUN MOUN DOUMANDÉ OU : « Poukisa ou ka étidyé Labib-a ké Témwen Jéova-ya ? »