Òó íe gã́bug bélè lọl ló gè nó Kpá Káí. Sõò, náa é bọọgẹ̀ válí ní ló gè olòó nò. Sìgà tṍó òó láá ié bùlà kọọ̀ náa é válìẹ̀ ní ló gè olòó nó Kpá Káí. Sõò éé ní ea náa òó kilsĩ́ gè nó Kpá Káí é? Éé ní ea é láá nvèè bá nè ni kọ ó kilsĩ́ gè nó Kpá Káí kọbèè tṍó ea tavàlà ge naa vó é?

1. Éé ní ea náa gè nó Kpá Káí é dọ bélè nè ni ẽ́?

“Moǹ bel Bàrì di dùm vaá ié kói.” (Híbrù 4:12) Kpá Káí é láá nvèè bá nè ni boo béè kọọ̀ à kọ́ bùlà e Bàrì íe kìlmà ní ló nè bé ea vulè ni naa. Àé nveè bá nè ni kọ ó ié dã̀ ból ló nu, kàà nyìmànù, nè ból dẽesĩ́. Ní ea palàge bọọ dú kọọ̀ Kpá Káí é láá nvèè bá nè ni kọ ó dú kóò Jìhóvà. Tṍó eo nóò Kpá Káí, ò gé sọtọ́ deè kọọ̀ kpóó ea di mm̀ Moǹ Bel Bàrì á nyaaná o dùm naamá lé.

2. Éé ní ea náa vaá à bọló kọ ó nyimá bé e gbò kà kà bel ea di mm̀ Kpá Káí dú bíi naa ẽ́?

Gbò kà kà bel ea di mm̀ Kpá Káí bélí gyọ́ e ka di ló. Níà nú ea náa vaá Kpá Káí à kọ é “zalí kà kà bel vaá [é] gá oo” é. (Próvẹẹ̀b 23:23) Tṍó e nyímà bé e gbò kà kà bel ea di mm̀ Kpá Káí dú bíi naa, àé náa kọọ̀ é pììgà bé e bẹẹ kpóó sim tùlà naa gè olòó nò—kọbèè à gá náa è kpeesĩ́ ló ẹ̀bmà.—Bugi Próvẹẹ̀b 2:4, 5.

3. Mósĩ́ deè ní e Jìhóvà é láá nvèè bá nè ni kọ ó kilsĩ́ gè nó Kpá Káí é?

Jìhóvà ea dú Neǹ Dèmnù ea bọọ lọ̀l vaá à lee nè o Kóò, gbĩ́ gè nvèè bá nè ni kọ ó láá nó nú ea kilìèé ló. Àé láá naa kọ ó ié ‘tàn vaá naa nú ea léémáe.’ (Bugi Fílipaì 2:13.) Vóà naa, be à gá náa vaá à ié tṍó eo kpáà ié bíi ló tàn ge noomá Kpá Káí àbèè ge tú nú eo nóò siimá tóm, ẹlẹ é láá nvèè bá nè ni. Be ò kpáà ié bíi ló kói gè bé èlbá ànà-ànà àbèè nàà uú boo, ẹlẹ é láá nè ni. Olòó tã̀àgã ló Jìhóvà kọ á nvèè bá neè ni kọ ó láá kilsĩ́ gè nó Kpá Káí.—1 Tẹ̀sàlónaikà 5:17.

 KPÁÁ NÓ BỌ̀Ọ̀VẸ̀

4. Tú gè nó Kpá Káí kolmá nu

Sìgà tṍó, è ólò di mm̀ kíìli-kíìli vaá tuumá kọọ̀ née íè tṍó gè noomá Kpá Káí. Éé ní ea é láá nvèè bá nèi ẽ́? Bugi Fílipaì 1:10, vaá ò gbóó aalai gbò bíbví:

• Gbò éé ní eo bulà kọọ̀ à dú ‘gbò nú ea palàge dú bíi’ mm̀ dùm ẽ?

• Éé ní eo é láá naa gè zogè kọọ̀ ge nó Kpá Káí palàge bọọ́ ní ló é?

1. Be ò zẹ́ẹ́ tú sãa nvee mm̀ bọ́kẹ̀t vaá gbóó gbĩ́ gè nvèè kpò dem boo, òó mon kọọ̀ dénè demá náa é bã́ m

2. Be ò zẹ́ẹ́ tú kpò dem nvee m, òé mon kọọ̀ kiẽ́e e gã́bug sãa é bã dì. Mm̀ tẽ̀ènè sĩ́deèá, be à gá náa ò tú gè naa ‘gbò nú ea palàge dú bíi’ naamá túá kà nú mm̀ o dùm, òó láá naa gbò nú ea dú bíi vaá ié tṍó gè naamá dõòna kà gbò nu

Ge nó Kpá Káí é nveè bá nèi kọ é láá nyimá ló Bàrì vaá nèe fã̀, vaá gè naa vó é náa kọọ̀ é láá ié kà lé gbaa ló kìlmàé ló. Bugi Máátìù 5:3, vaá ò gbóó aalai nakà bíbví:

• Mósĩ́ deè ní eé íe bélè lọl ló gè tú gè nó Kpá Káí kolmá nu ẽ́?

 5. Kilsĩ́ gè nó Kpá Káí kèbá nàà uú boo

6. Dẹ̀ẹ̀a boo nvèè bá ea aa bá Jìhóvà

 NÚ E NI NÓ

Náa ólò bọọgẹ̀ valí gè nó Kpá Káí, sõò ge nó Kpá Káí é láá nvèè bá nè ni kọ ó dé kpéè ló dùm dọ̀ọ̀mà dè-dè. Kilsĩ́ gè dẹẹ̀a boo Jìhóvà, mè àé né ni kpẽ́.

Ge Òòa Boo

• Éé ní ea náa vaá ò nvèè ka ló gbò kà kà bel ea di mm̀ Kpá Káí é?

• Mósĩ́ deè ní eo é láá naa ‘gbò nú ea palàge dú bíi’ é?

• Éé ní ea náa vaá à dú bíi kọ ó bàn Jìhóvà kọ á nveenìè bá neè ni kọ ó láá kilsĩ́ gè nó Kpá Káí é?