ANG ỌJẸ́JẸ 12

Ịyẹ à Tị́ ka Dang Ụbwọ Nyọka Kịnyaa La ọ-Jẹ́ ỊBayịbụụ?

ỊBayịbụụ ọjẹ́jẹ kaa ju apyobwuna, ma ọ́ kaa chịkpẹẹ ụka myị́ ụka nyọka họ ịnyị ka. Ụka ọhẹ, ọ ka lang ujwo nyọka kịnyaa la ịBayịbụụ ọjẹ́jẹ myị́. Ịyẹ tị́ du kọ chịla nyọka maga nya ọ-kịnyaa? Ịyẹ à tị́ ka dang ụbwọ nyọka kịnyaa nanana nyori akama ji?

1. Ịyẹ tị́ du ká ịBayịbụụ ọjẹ́jẹ ju apyobwuna?

“Ẹla nya Ohe Oluhye ayịdang ri ẹla ọlẹ kọ la ọhịhị bala ọ-la ọngịrị lụmẹ.” (Ala iHiburu 4:12) ỊBayịbụụ ju apyobwuna chajị ọ chị irya ọlẹ ká Ohe la u-uhye nyang ehe. Ọ́ kaa dang ụbwọ nyọka jẹ́ ang kem ka, ma ọ kaa ya ẹla ọjẹ́jẹ nyịlẹhị bala ẹhị ọrịrịị-rịrị hang. Ọlẹ kọ tị gụgụ wuu ri, ịBayịbụụ kaa dang ụbwọ nyọka ri oligu nya iJihova. Ụka ká jẹ́ ịBayịbụụ, à wẹẹ ya iwe da kọ ka họ ká ọhịhị nyang ka há gụ ọwọwa.

2. Ịyẹ tị́ du ká baba nyọka jẹ́ apyobwuna nya ịBayịbụụ?

Ẹlịlẹhị ịlẹpwụ nya ịBayịbụụ lala ang ụdụ ị-kpịnya. Ịnyị à du ká ịBayịbụụ juhi ọhụ ahị nyị “la ẹlịlẹhị,” ahị nyị tị ‘tụ hyoo ka’ lẹ. (Etu 23:23) Ụka kahị kpịtịya nya apyobwuna nya ịBayịbụụ, ahị kaa maga nyịlẹhị-ịlẹhị nyọka kịnyaa la ọ-jọ́ọ, kori ká ịngịhyẹ á dọmwụ ka chịhị ochuchuu wẹwẹ.—Wa Etu 2:4, 5.

3. Ányị iJihova à tị́ ka jẹ́-ẹ dang ụbwọ nyọka kịnyaa la ịBayịbụụ ọjẹ́jẹ?

Chajị nyọlẹ ká iJihova agụgụ ri Ọngọ họng họ bala Oligu nyang, ọ tịtọ kọ ka dang ụbwọ jẹ́ ang u-uhye nyịlọmwụ. Ọ ka jẹ́-ẹ ‘hu imyi bala ọngịrị ọ-kpa họ ụkụrwọ’ hang. (Wa Ala iFilipayị 2:13.) Lẹ, ụka ọhẹ kori ká baba nya ọngọ ka gung gbịla nyọka jẹ́ ịBayịbụụ lee ọ-kpa ang ọlẹ ká wẹẹ jẹ́ họ ụkụrwọ, ọ ka jẹ́-ẹ dang ụbwọ. Kori ká baba nya ọngịrị gụ olene nyọka kụrụ ang ịlẹ kị ka chịng ochuchuu bala ọtụpyịpyị, ọ ka jẹ́-ẹ ya hang. Bịlẹ iJihova ẹ-ẹpwụ nya abwọ ọrịrị ụka myị́ ụka nyọka dang ụbwọ kịnyaa la ịBayịbụụ ọjẹ́jẹ.—1 Ala ịTẹsalonika 5:17.

JẸ́ GỤ ỌỌWA

Jẹ́ jaabwọ á ka jẹ́-ẹ bwu kịnyaa la ọ-jẹ́ ịBayịbụụ kori ká dọmwụ hi ụbwọ lụmẹ ka lee kori ká angịkịla á juwa tụ́ng pyịpyị wẹwẹ. Myịmyị kụ ẹhị yẹ jaabwọ ká iJihova ka jẹ́-ẹ dang ụbwọ nyọka kịnyaa la ịBayịbụụ ọjẹ́jẹ.

4. Hu ịBayịbụụ ọjẹ́jẹ kụ ịlahị nya ang ịkịla

Ụka ọhẹ, ahị ka me irya nyori ahị nyị́ hi ụbwọ nyọka jẹ́ ịBayịbụụ ka myị́. Ịyẹ à tị́ ka jẹ́-ẹ dang ụbwọ? Wa Ala iFilipayị 1:10, kanụ ya ẹla u-uhye nya ịtọ ẹla ịlẹ:

Ang iyina a tị́ me irya kị “chịla-chịla gụgụ wuu” ọ-ọhịhị?
Ányị a tị́ ka bwu hu ịBayịbụụ ọjẹ́jẹ kụ ịlahị nya ang ịkịla wuu?

Kori ká chụ ọpyị ju u-ugba, ká maga nyọka go ajwọ ju ka ẹpwụ nya ugba ọọwa, ajwọ ịịwa á ka kele ka
Kori ká tị ya ajwọ juwa jene, ẹga ka ji a ka ya ụmụmẹ nya ọpyị ju wẹẹ. Ịnyịnyị, kori ká hu ang ịlẹ kị “chịla-chịla gụgụ wuu” kụ ịlahị ọ-ọhịhị nyang, à ka jẹ́-ẹ họ ang ịịwa, myịmyị yé ụka họ ang ịkịla

Ahị baba nyọka jẹ́ Ohe bala ọ-gbịgba họọ, lẹ ụka kahị jẹ́ ịBayịbụụ, ahị kaa yé ọbaba nyahị ọọwa. Wa ịMatiyu 4:4, kanụ ya ẹla u-uhye nya ịtọ ẹla ọlẹ:

Apyobwuna oyina ahị tị́ kaa ye kori kahị hu ịBayịbụụ ọjẹ́jẹ kụ ịlahị nya ang ịkịla?

5. Kịnyaa la ịBayịbụụ ọjẹ́jẹ ẹ-ẹpwụ nya ọtụpyịpyị

Ụka ọhẹ, angịkịla ka maga nyọka hung abwọ la ịBayịbụụ ọjẹ́jẹ myị́. Yẹ ẹla ọlẹ kọ họ ta Francesco wẹẹ. Yẹ IFIM ọwẹ, kanụ ya ẹla u-uhye nya ịtọ ẹla ịlẹ:

IFIM: O Ye Ahị Ọwawa Nyọlẹ Kọ Jwọọ a-Abwọ ka (5:22)

Ẹ-ẹpwụ nya ifim ọwẹ, ányị aligu nya Francesco bala ugbiyegu nyamwụ à tị́ họ nyọlẹ kọ ya ẹla ọlẹ kọ wẹẹ jẹ́ jaa?
Ahị ọwawa oyina ọ tị́ yé nyọlẹ kọ jwọọ a-abwọ ka?

Wa 2 iTimoti 2:24, 25 bala ọ-ya ẹla u-uhye nya ịtọ ẹla ịlẹ:

Ányị ang ọlẹ ká wẹẹ jẹ́ à tị́ la alugbiyegu bala aligu nyang?
Jaabwọ ká ọgba ịwẹ mẹjẹ, ányị a tị́ ka họ kori kọ kpụ ọngịnyị ịpyọ nyọlẹ ká wẹẹ jẹ́ ịBayịbụụ ka? Ịyẹ tị́ du?

6. Kpụnịrọ iJihova nyọka yé ụbwọ ọdada

Jaabwọ kahị wẹẹ tụ́ ju iJihova chwẹẹ, ịnyị ahị kaa tịtọ nyọka họ ẹla kpọọ ịpyọ gụ ọwọwa lẹ. Ọ lịnyị odu lẹ, ọ ka lahị ujwo nyọka yẹ ịngịhyẹ da ọ-ọhịhị nyahị myị́ chajị nyọka hịhị ụ-ụgbẹyị ọlẹ kọ tịtọ. Kori kọ lang ịnyị aalẹ, abwọ a chịng pyẹpyẹ ka. IJihova ka dang ụbwọ. Yẹ IFIM ọwẹ, kanụ ya ẹla u-uhye nya ịtọ ẹla ịlẹ.

IFIM: IJihova Dahị Ụbwọ Nyọka Yẹda (3:56)

Ẹ-ẹpwụ nya ifim ọwẹ, ịyẹ Jim à tị́ yẹda ọ-ọhịhị nyamwụ chajị ká ẹla nyamwụ ka kpụ iJihova ịpyọ?
Ịyẹ à tị́ kpụng ịpyọ u-uhye nya ọgụ-ẹpẹtẹ nyamwụ?

Wa Ala iHiburu 11:6, kanụ ya ẹla u-uhye nya ịtọ ẹla ịlẹ:

Ẹlịyẹ iJihova à tị́ ka họ ha angịlẹ kị “tịtọ nyọka tụ [jwoo] chwẹẹ nya ịlẹhị-ịlẹhị,” kị ri angị wẹẹ maga yẹẹyẹẹ nyọka jọ́ọ bala ọ-họ ẹla kpọọ ịpyọ?
Ẹlịyẹ ẹlẹwẹ à tị́ mẹjẹ́ng u-uhye nya abwọlẹ kọ kaa la iJihova ụka kọ yẹ aga ọmama nyang nyọka jẹ́ ịBayịbụụ?

ỌNGỊNYỊ KA TỌNG WO MYỊ́: “Ịyẹ tị́ du ká wẹẹ jẹ́ ịBayịbụụ?”

Ányị a tị́ ka wẹ?

ẸLỊYẸ A TỊ́ JẸ́?

ỊBayịbụụ ọjẹ́jẹ á kaa chịkpẹẹ lụmẹ ụka myị́ ụka ka, ma ọ ka jẹ́-ẹ dang ụbwọ nyọka chị ọkẹkẹnị gboyi myị́ oyi ọ-ọhịhị. Kịnyaa la ọ-kpụnịrọ iJihova, ọ tị ka wahị kụrụng.