ĨSOMO YA 12
Nĩ Kyaũ Kĩtonya Ũkũtetheesya Ũendeee Kwĩmanyĩsya Mbivilia?
Kwĩmanyĩsya Mbivilia nĩkũetae moathimo maingĩ mũno. Ĩndĩ o na vailye ũu, kũyĩthĩawa kwĩ laisi mavinda onthe. Mavinda amwe, nũtonya kwĩwʼa ta ũtetonya kũendeea kwĩmanyĩsya Mbivilia. Ĩndĩ nĩkĩ nĩ ũndũ wa vata kwĩkĩa kĩthito ũendeee kwĩmanyĩsya? Nĩ kyaũ kĩtonya ũkũtetheesya ũendeee kũmĩĩsya o na wakomana na mawetu?
1. Nĩkĩ nĩ ũndũ wa vata kwĩmanyĩsya Mbivilia?
“Ndeto ya Ngai yĩ thayũ na yĩ ũtonyi.” (Aevelania 4:12) Mbivilia nĩ ya vata mũno nũndũ nĩkũtavasya mosũanĩo ma Ngai na ũndũ ũkwendete. Nĩkũtetheeasya wĩthĩwe na ũmanyi, ũĩ wa wʼo, na wĩkwatyo. Na ũndũ ũla wa vata vyũ, Mbivilia nĩkũtetheeasya wĩthĩwe mũnyanya wa Yeova. Yĩla weemanyĩsya Mbivilia, wĩthĩawa weetĩkĩlya ũtonyi wayo ũũtetheesye thayũnĩ waku.
2. Nĩkĩ waĩle kwĩkalaa ũlilikene vata wa ũwʼo ũla wĩ Mbivilianĩ?
No tũelekanyʼe ũwʼo ũla wĩ Mbivilianĩ na ũthwii wa vata mũno. Na nĩkyo kĩtumi Mbivilia ĩtwĩkĩĩte vinya ĩkatwĩa atĩĩ: “Thooa wʼo, na ndũkothoosye.” (Nthimo 23:23) Yĩla twekala tũlilikene vata wa ũwʼo ũla wĩ Mbivilianĩ, tũkekĩaa kĩthito tũendeee kwĩmanyĩsya o na yĩla twakomana na mawetu.—Soma Nthimo 2:4, 5.
3. Yeova atonya ũkũtetheesya ata ũendeee kwĩmanyĩsya?
Nũndũ Yeova nĩ Ngai Mwene Vinya Wʼonthe, nĩ Mũmbi waku, na nĩ Mũnyanyau, nũkwenda kũũtetheesya nĩ kana ũendeee kwĩmanyĩsya ĩũlũ wake. Nũtonya kũũnenga “wendi na ũtonyi” wa kũendeea kwĩmanyĩsya. (Soma Avilivi 2:13.) Kwoou, ethĩwa mavinda amwe ũkewʼaa ũyenda kũthangaawʼa ũendeee kwĩmanyĩsya, kana ũatĩĩe kĩla weemanyĩsya, e vo nĩ kana aũtetheesye. O na yĩla wenda vinya mwingangĩ wa kũsinda matatwa ala ũkomanaa namo kana ũvĩnganĩsya, akaũnengae vinya ũsu. Kwoou, mũvoyae Yeova kĩla ĩvinda aũtetheesye ũendeee kwĩmanyĩsya Mbivilia.—1 Athesalonika 5:17.
ĨMANYĨSYE MŨNANGO
Ĩmanyĩsye wone ũndũ ũtonya kũendeea kwĩmanyĩsya Mbivilia o na ethĩwa wĩthĩawa ũkwatene mũno kana nũvĩngawa nĩ angĩ. Na ĩndĩ ũyona ũndũ Yeova ũtonya kũũtetheesya ũendeee kũmĩĩsya.
4. Onaa kwĩmanyĩsya Mbivilia wĩ ũndũ wa vata thayũnĩ waku
Mavinda amwe nĩtũtonya kũkwatana mũno ũkethĩa ti ta twĩ na ĩvinda yĩanĩtye ya kũsoma Mbivilia. Nĩ kyaũ kĩtonya kũtũtetheesya? Somai Avilivi 1:10, na ĩndĩ mũineenea makũlyo aa:
-
We wĩona amwe ma “maũndũ ala ma vata” thayũnĩ nĩ ta meva?
-
Ũtonya kwonanyʼa ata kana kwĩmanyĩsya Mbivilia nĩ ũndũ wa vata thayũnĩ waku?
-
Ũkosa ndoo na ũyĩkĩa kĩthangathĩ na ĩndĩ ũitata kwĩkĩa mavia vo, mavia asu mayĩsa kwĩanĩa
-
Ĩndĩ ũkamba kwĩkĩa mavia mbee, wĩthĩa ve na mwanya wa kwongela kĩthangathĩ kingĩ. O ta ũu, waiaa mbee “maũndũ ala ma vata” thayũnĩ waku, ũkethĩawa na vinya wa kũmeanĩsya, na ĩvindanĩ o yĩu ũyĩthĩwa na ĩvinda yĩanĩtye ya kwĩkaa maũndũ ala angĩ
Kwĩmanyĩsya Mbivilia nĩkũtumaa twĩanĩsya nzaa yitũ ya kĩ-veva, ĩla nĩ vata ũla twĩthĩawa nawʼo wa kũmũmanya, na kũmũthaitha Ngai. Somai Mathayo 5:3, na ĩndĩ mũineenea ĩkũlyo yĩĩ:
-
Tũtonya kũtetheka ata ethĩwa tũkonaa kwĩmanyĩsya Mbivilia wĩ ũndũ wa vata thayũnĩ witũ?
5. Endeea kũmĩĩsya o na yĩla wavĩngwa
Mavinda amwe andũ angĩ nĩmatonya ũkũtũla ngoo ũeke kwĩmanyĩsya Mbivilia. Kwasũanĩa ngelekanyʼo ya Francesco. Ĩloelei VITIO, na ĩndĩ mũineenea makũlyo aa maatĩĩe.
-
Kwosana na ũndũ twoona vitionĩ, anyanyae ma Francesco na andũ make ma mũsyĩ, meekie ata yĩla wamatavisye kĩla weemanyĩasya?
-
Aathimiwe ata nũndũ wa kũmĩĩsya?
Somai 2 Timotheo 2:24, 25, na ĩndĩ mũineenea makũlyo aa:
-
Anyanya na andũ maku ma mũsyĩ maasya ata ĩũlũ wa maũndũ ala wĩmanyĩasya?
-
Kwosana na mĩsoa ĩno, ũtonya kwĩka ata yĩla andũ angĩ mathata nĩkwĩthĩwa ũendeee kwĩmanyĩsya Mbivilia? Nĩkĩ wasũngĩa ũu?
6. Mwĩkwatye Yeova aũtetheesye
O ũndũ twaendeea kũmũthengeea Yeova, nowʼo wendi witũ wa kũmwendeesya wongelekaa. Ĩndĩ o na vailye ũu, no twĩwʼe ũte ũndũ wĩ laisi kwĩka moalyũku thayũnĩ witũ nĩ kana twĩkale kwosana na myolooto yake. Ethĩwa nĩwĩwʼaa ũu, ndũkakwʼe ngoo. Yeova nũkũũtetheesya. Ĩloelei VITIO, na ĩndĩ mũineenea makũlyo aa maatĩĩe.
-
Kwosana na vitio ĩsu, Jim eekie moalyũku meva nĩ kana amwendeesye Yeova?
-
Nĩ kyaũ kyakwendeesya mũno wasũanĩa ngelekanyʼo yake?
Somai Aevelania 11:6, na ĩndĩ mũineenea makũlyo aa:
-
Yeova ekaa ata kwondũ wa “ala mamũmanthaa na kĩthito,” kana kwa ndeto ingĩ, ala mekaa kyonthe kĩla matonya mamũmanye na maimwendeesya?
-
Kwosana na kĩu, we wĩona Yeova ewʼaa ata oona kĩthito kĩla wĩkĩĩte nĩ kana ũendeee kwĩmanyĩsya Mbivilia?
ANDŨ AMWE NO MAŨKŨLYE: “Nĩkĩ wĩmanyĩasya Mbivilia na Ngũsĩ sya Yeova?”
-
We ũtonya kũsũngĩa ata?
KĨLA TWEEMANYĨSYA
O na kau kwĩmanyĩsya Mbivilia kũyĩthĩawa kwĩ laisi mavinda onthe, no kũũtetheesye ũkesa kũtanĩa thayũ tene na tene. Endeea kũmwĩkwatya Yeova na akakũathima mũno.
Makũlyo ma Kũsyokeleela
-
Nĩkĩ wonaa ũwʼo ũla wĩ Mbivilianĩ wĩ wa vata kwaku?
-
Ũtonya kwĩka ata ũĩkĩĩthye nĩweeka “maũndũ ala ma vata” thayũnĩ waku?
-
Nĩkĩ waĩle kũmũkũlya Yeova aũtetheesye ũendeee kwĩmanyĩsya Mbivilia?
MAŨNDŨ ANGĨ MA KWĨMANYĨSYA
Soma wone maũndũ ana matetheesye andũ aingĩ makamanya kũtũmĩaa ĩvinda yoo nesa.
“Ũndũ Ũtonya Kũtũmĩa Ĩvinda Yaku Nesa” (Amkeni!, Mwei wa 2, 2014)
Sisya wone ũndũ Yeova watetheeisye mũndũ mũka ũmwe ũla mũũme wake ũtaeleawa nĩkĩ wĩkĩaa kĩthito kingĩ amwendeesye Ngai.
Sisya wone ũndũ wũmĩĩsyo wa mũndũ mũka ũmwe watetheeisye mũũme wake.
Mavinda amwe Ngũsĩ sya Yeova nĩsilĩĩlawa ũvũngũ wa kana nĩsyanangaa mĩsyĩ. Ĩndĩ ũu nĩ wʼo?
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
