12 УРОКЫР
Библие джыныр къомыгъэнэну сыт къыбдэІэпыкъунур?
Библие джыныр ебгъэщхь хъунущ цІыхур гъуэгуанэ гъэщІэгъуэным зэрытеувэм. Гъуэгур щымытынш къохъу. Абы ещхьу, Библиер щыбджкІэ гугъуехь гуэрхэм упэщІэхуэнкІэ хъунущ. Абдежым мыпхуэдэ упщІэ къоув: «Библие джыным адэкІи пысщэфыну пІэрэ?» Ауэ уи Іэр епхьэхын щІыхуэмейр сыт? Гугъуехьхэм емылъытауэ, адэкІи Библиер бджыну сыт къыбдэІэпыкъунур?
1. Библие джыным мыхьэнэшхуэ щІиІэр сыт?
Алыхьым и Псалъэм «гъащІэшхуэмрэ лъэкІыныгъэшхуэмрэ» хэлъщ (Еврейхэм 4:12). Библиер лъапІэщ, сыт щхьэкІэ жыпІэмэ абы итыр Алыхьым и гупсысэхэращ. Дэ абы къыщыдощІэ Алыхьым фІыщэу дыкъызэрилъагъур. Библием щІэныгъэ къыуит закъуэу щыткъым, атІэ Іущагърэ къэкІуэнум теухуауэ гугъэ дахэрэ къыует. Псом нэхъапэращи, дыкъэзыгъэщІа Алыхьым и ныбжьэгъу дыхъуну а тхылъыр къыддоІэпыкъу. Библиер зэрыбджым уи гъащІэр фІыкІэ зэрыпхъуэжын къару къыпхилъхьэнущ.
2. Библием ит пэжым и лъапІагъыр зыщыдгъэгъупщэн щІыхуэмейр сыт?
Библием ит пэжыр налкъутналмэсым ебгъэщхь хъунущ. Аращ Библием дыкъыщІыхуриджэр: «Пэжыгъэр зэгъэгъуэти, зыІэщІумыгъэкІ» (Притчи 23:23, Гъэсэпэтхыдэхэр). Ар лъапІэу зэрыщытыр дэ сытым щыгъуи дигу къэдгъэкІыжмэ, сыт къэмыхъуами, ди къаруми ди зэманми дыщымысхьу абы тедгъэкІуэдэнущ (Къеджэ Притчи 2:4, 5, Гъэс.)
3. Иеговэ уэ дапхуэдэу къызэрыбдэІэпыкъуфынур?
Иеговэ ЛъэкІыныгъэшхуэ зиІэ КъэгъэщІакІуэу щытщ. Алыхьыр хуейщ дэ абы ныбжьэгъу дыхуэхъуну. Аращ гъунэгъу зыхуэтщІыну абы дыкъыщІыхуриджэр. Абы щхьэкІэ абы къаруи гукъыдэжи къыдитыну дыкъегъэгугъэ (Къеджэ Филиппи 2:13). Алыхьым тегушхуэныгъэ къыуитынущ адэкІи Библиер бджыну икІи абы итыр уи гъащІэм къыщыбгъэсэбэпыну. Гугъуехь гуэр уиІэмэ е пэжым щхьэкІэ зыгуэр къыппэщІэувэмэ, уэ узыхуэныкъуэ къару абы Іэмал имыІэу къыуитынущ. Библие джыныр къомыгъэнэн щхьэкІэ Иеговэ къыбдэІэпыкъуну зэпымыууэ лъэІукІэ зыхуэгъазэ (1 Фессалоникэ 5:17).
НЭХЪ КУУУЭ ХЭПЛЪЭ
Зэман куэд узэримыІэм е нэгъуэщІхэр къызэрыппэщІэувэм емылъытауэ, Библие джыныр къомыгъэнэну сыт къыбдэІэпыкъунур? Иеговэ иджыри дапхуэдэу къыбдэІэпыкъуфынуми къащІэ.
4. Библие джыныр псом япэ идгъэщын хуейщ
Иныкъуэм деж апхуэдизу Іуэху куэд диІэщи, Библиер дджыну зэман къытхудэмыгъэкІыну къытщыхъункІэ хъунущ. Сыт дэ къыддэІэпыкъунур а Іуэхум щхьэкІэ зэман къыхэтхыну? Филиппи 1:10, ДЩІ итым фыкъеджи мыбы фегупсыс:
-
Дауэ уеплърэ, ди гъащІэм «псом нэхърэ нэхъапэр» сыт?
-
Библие джыныр уи гъащІэм псом япэ ибгъэщын щхьэкІэ сыт уэ пщІэ хъунур?
-
1. Пэгуным япэщІыкІэ пшахъуэр ипкІутэмэ, мывэхэр ихуэжынукъым
-
2. Ауэ япэщІыкІэ мывэхэр иплъхьэмэ, пшахъуэр ихуэнущ. Абы ещхьу ди гъащІэм «псом нэхърэ нэхъапэр» япэ идгъэщмэ, нэгъуэщІ Іуэхухэм щхьэкІи зэман къытхуэнэжынущ
Библиер дэ къыддоІэпыкъу Алыхьым теухуауэ къэтщІэну икІи абы дыхуэлэжьэну. Абы дэ насыпыфІэ дещІ. Маттэ 5:3 итым фыкъеджи мыбы фегупсыс:
-
ЦІыхум Библие джыныр псом япэ иригъэщмэ, абы и гъащІэм дапхуэдэу зэрызихъуэжынур?
5. КъызэрыппэщІэувэм емылъытауэ, Библие джыныр къомыгъанэ
Библие зэрыдджыр нэгъуэщІхэм ягу иримыхьу, ар къэдгъэнэну дыхуагъэушынкІэ хъунущ. Мис Франческо и щапхъэр. ВИДЕОМ феплъи къыкІэлъыкІуэ упщІэхэр зэпкърыфх:
-
Франческо Библиер зэриджыр и ныбжьэгъухэмрэ и унагъуэм щыщхэмрэ къыщащІам дауэ абыхэм зэрызащІар?
-
Франческо къызэримыкІуэтам сыт хуэдэ фІыгъуэ къыпэкІуар?
2 Тимофей 2:24, 25 итым фыкъеджи мыбы фегупсыс:
-
Уи унагъуэм щыщхэмрэ уи ныбжьэгъухэмрэ Библиер зэрыбджыр дауэ къащыхъурэ?
-
Уэ Библиер зэрыбджыр зыгуэрым игу иримыхьмэ, мы едзыгъуэхэм зэритымкІэ, сыт пщІэн хуейр? Сыт щхьэкІэ?
6. Иеговэ зыдэгъэІэпыкъу
Иеговэ нэхъ гъунэгъу зыхуэпщІыху, уэ ар арэзы пщІыну гукъыдэж нэхъыбэ уиІэнущ. Пэжыр жыпІэмэ, Алыхьым и хабзэхэм тету упсэуну щымытынш къохъу. Ауэ уи Іэр йомыхьэх, сыт щхьэкІэ жыпІэмэ Иеговэ къыбдэІэпыкъуну хьэзырщ. ВИДЕОМ феплъи къыкІэлъыкІуэ упщІэхэр зэпкърыфх:
-
Джим и гъащІэм сыт хуэдэ зэхъуэкІыныгъэхэр хилъхьа Иеговэ арэзы ищІын щхьэкІэ?
-
Абы и щапхъэм сыт уэ гъэщІэгъуэн пщыхъуар?
Еврейхэм 11:6 итым фыкъеджи мыбы фегупсыс:
-
«Тхьэм и гъуэгум лъыхъуэхэм», е нэгъуэщІу жыпІэмэ ар къэзыцІыхуну хуейхэм икІи и хабзэхэм тету псэуну хуейхэм, сыт Иеговэ яхуищІэжынур?
-
Мы едзыгъуэм зэритымкІэ, сыт къэмыхъуами, Библие джыныр къомыгъэнэн щхьэкІэ къару зэрепхьэлІэр Иеговэ щилъагъум деж сыт абы зыхищІэр?
ЗЫГУЭР КЪОУПЩІЫНКІЭ ХЪУНУЩ: «Сыт уэ Библиер щІэбджыр?»
-
Сыт хуэдэ жэуапт уэ абы ептынур?
КЪЭПЩЫТЭЖ
Библиер бджыну иныкъуэхэм деж мытыншми, гъащІэ мыухыж зэбгъуэтыну а зы Іэмалыращ щыІэр. Иеговэ адэкІи ущыгугъмэ, абы Іэмал имыІэу и нэфІ къыпщыхуэнущ
Мы упщІэхэр зэгъусэу зэпкърыфх:
-
Библием ит пэжым уи дежкІэ сыт хуэдэ мыхьэнэ иІэр? Сыт щхьэкІэ?
-
«Псом нэхърэ нэхъапэр» дауэ уэ къызэрыхэпхыфынур?
-
Библие джыныр къомыгъэнэну къыбдэІэпыкъуну Иеговэ ущІелъэІун хуейр сыт?
НЭХЪЫБЭ КЪАЩІЭ
Іущагъ хэлъу я зэманыр къагъэсэбэпыну мы чэнджэщиплІыр куэдым къадэІэпыкъуащ.
«Іущагъ хэлъу ди зэманыр дауэ къызэрыдгъэсэбэп хъунур?» («Фыкъызэщыу!» мазае, 2014 гъэ, урысыбзэкІэ)
Зи щхьэгъусэр къызыпэщІэувэу щыта цІыхубзым Иеговэ зэрыдэІэпыкъуар къащІэ.
И щхьэгъусэм Библиер иджын зэрыщимыгъэтам и фІыгъэкІэ зы цІыхухъу гуэрым и гъащІэм зэрызихъуэжар къащІэ.
Иеговэ и Щыхьэтхэм унагъуэхэр якъутэу жаІэ. Ауэ ар пэжу пІэрэ?
Иджыри уигу ирихьыфынур
НЭХЪЫБЭУ ЯТ УПЩІЭХЭР
Иеговэ и Щыхьэтхэм ирагъэкІуэкІ курсыр зищІысыр сыт?
Библием итыр къэпщІэну къыбдэІэпыкъу курс Иеговэ и Щыхьэтхэм ирагъэкІуэкІ. Абыхэм ущрагъаджэкІэ уи унэм щІэлъ Библиер къэбгъэсэбэп хъунущ икІи уи унагъуэм щыщхэмрэ уи ныбжьэгъухэм щыщ гуэррэ къебгъэблагъэ хъунущ.
