DISÁ 12
Ihi Yandakukwatekesa Kusuluka ni Kudilonga o Bibidya?
O kudilonga o Bibidya kutubhekela mbote. Maji sayi bhabha kutubhonza. Sayi ithangana, nange wandadibhwidisa se wandatena mwene kusuluka mu kudilonga o Bibidya. Mukonda dyahi kima kyambote kubhanga nguzu phala kusuluka mu kudilonga o Bibidya? Ihi yandakukwatekesa kusuluka mu kudilonga sumbala ni ibhidi itena kumoneka?
1. Mukonda dyahi kima kyambote kudilonga o Bibidya?
“O mak’â Nzambi kima kya mwenyu, ala ni kutena.” (Jihebelewu 4:12) O Bibidya yala ni valolo yadikota mukonda izwela o ixinganeku ya Nzambi, ni kyebhi kyadivwa yalungu neye. Ki ikukwatekesa ngo kukala ni kwijiya, maji ikukwatekesa we kukala ni unjimu wakidi ni kidyelelu. Kima kyabeta kota, o Bibidya ikukwatekesa kukala dikamba dya Jihova. Kyoso ki udilonga o Bibidya, wandakwehela o kutena kwa mak’â Nzambi kulungulula o mwenyu wé.
2. Mukonda dyahi kima kyambote kuxikina kwila o kidi kya Bibidya kyala ni valolo?
O kidi kya Bibidya akisokesa ni jimbongo jala ni valolo yadikota. Kiki kyene kibhangesa o Bibidya kutuswinisa: “Sumba o kidi, kana ku ki sumbisa.” (Jisabhu 23:23) Kyoso kitwijiya o kidi kya Bibidya tubhanga yoso phala kusuluka ni kudilonga—ne mwene se kumoneka ibhidi.—Tanga Jisabhu 2:4, 5.
3. Kyebhi Jihova kyatena kukukwatekesa kusuluka mu kudilonga?
Kuma mwene o Mubhangi muteni a yoso, Kamba dyé, Jihova wamesena kukukwatekesa kudilonga yalungu ni mwene. Mwene utena kukubhana “o hânji ni kutena kwa kubhanga o vondadi yê.” (Tanga Filipe 2:13.) Mukiki, se sayi ithangana umona kwila wabhingi kiswinisu phala kudilonga mba kukumbidila o ima iwadilongo, mwene utena kukukwatekesa. Se wamesena kikwatekesu phala kutolola o ibhidi mba izukutisu, mwene utena kukubhana o kikwatekesu kiki. Ithangana yoso bhinga kwa Jihova bhukaxi kamusambu phala kukukwatekesa kusuluka mu kudilonga o Bibidya.—1 Tesalonika 5:17.
DILONGE DINGI
Ijiya kyebhi ki utena kusuluka mu kudilonga o Bibidya sumbala ni ima yavulu iwala nayu phala kubhanga, mba o izukutisu ya akwenu. Mukusuluka xinganeka kyebhi Jihova kyandakukwatekesa kukolokota.
4. O kudilonga o Bibidya kwene kwatokala kukala kupholo
Sayi ithangana kubhonza kusanga kithangana phala kudilonga o Bibidya mukonda twala ni ima yavulu phala kubhanga. Ihi itena kukukwatekesa? Tanga Filipe 1:10, mukusuluka bhanga o ibhwidisu yakayela:
-
Mudyé yebhi ‘o ima yabeta dingi kota kumwenyu’?
-
O kudilonga o Bibidya kwene kwatokala kukala kupholo. Kyebhi ki utena kubhanga kiki?
-
Se wizalesa balde ni mavu, ha ubandekesa matadi, o matadi kandasokamu
-
ISe udyanga kutamu o matadi, kwandakala kididi phala kuta o mavu. Kyene kimoxi we, se uta “o ima yabetakota” kupholo wanda ikumbidila, wandakala ni kithangana phala kubhanga ima yengi
O kudilonga o Bibidya kukwatekesa kudikila o ibhindamu yetu mu nzumbi—o ibhindamu yakwijiya ni kubheza Nzambi. Tanga Matesu 5:3, mukusuluka bhanga o kibhwidisu kyakayela:
-
O kudilonga o Bibidya kutukwatekesa kyebhi?
5. Kolokota mukudibhana ni izukutisu
Sayi ithangana nange o athu atena kukubhangesa kweha o kudilonga o Bibidya. Tala o phangu ya Francesco. Tala OVIDYU, mukusuluka bhanga o ibhwidisu yakayela.
-
Kala kitwamono mu vidyu, kyebhi o makamba a Francesco ni mwiji wé kyadivu, kyoso kya a tangela o ima yexile mudilonga?
-
Kyebhi kyamubesowala mukonda dya kukolokota?
Tanga 2 Timote 2:24, 25, mukusuluka bhanga o ibhwidisu yakayela:
-
Kyebhi kyadivwa o mwiji wé ni makamba mé yalungu ni ima iwamudilonga?
-
Kala kyalondekesa o jivelesu jiji, kyebhi kiweji tambwijila se kukala muthu kasanguluka mukonda wamudilonga o Bibidya? Mukonda dyahi?
6. Dyelela mu kikwatekesu kya Jihova
Kyoso kituya ni kuzukama kwa Jihova, o vondadi yetu yakumusangulukisa yandadibandekesa. Né kiki, sayi ithangana kutubhonza kulungulula o ukexilu wamwenyu wetu phala kukumbidila o itumu yê. Se wadivwile kya kiki, kana kubhwila. Jihova wandakukwatekesa. Tala OVIDYU, mukusuluka bhanga o ibhwidisu yakayela.
-
Kala kitwamono mu vidyu, ihi yalungulula Jim kumwenyu wê phala kusangulukisa Jihova?
-
Ihi iwawabhela dingi kumusoso wê?
Tanga Jihebelewu 11:6, mukusuluka bhanga o ibhwidisu yakayela:
-
Ihi yandabhanga Jihova kwayo “a musota ni mwanyu”, kifwa yo abhanga yoso phala kumwijiya ni kumusangulukisa?
-
Kiki kikulonga ihi yalungu ni kyebhi kyadivwa Jihova kyoso kyamona o nguzu iwamubhanga phala kudilonga o Bibidya?
NANGE SAYI MUTHU WIBHULA: “Mukonda dyahi eye wamudilonga o Bibidya?”
-
Kyebhi kiweji tambwijila?
IHI IWADILONGO
Sumbala sayi bhabha kubhonza, o kudilonga o Bibidya kutena kukukwatekesa kusanguluka kumwenyu kate kuhádya ni hádya. Kolokota mu kudyelela kwa Jihova, mwene wandakubesowala.
Kubhitulula
-
Mukonda dyahi o kidi kya Bibidya kyala ni valolo phala eye?
-
Kyebhi ki utena kulondekesa kwila ubhana valolo mu “ima yabeta kota”?
-
Mukonda dyahi watokala kubhinga kwa Jihova phala kukukwatekesa kusuluka ni kudilonga o Bibidya?
TOKWESA DINGI
Tala ima iwana yene mu kwatekesa athu avulu kubhanga ima ni unjimu ni kithangana kyala nakyu.
“Ihi i Utena Kubhanga Phala Kukatula Mbote mu Kithangana Kyé” (Despertai!, Fevereiro 2014 mu phutu)
Tala kyebhi Jihova kyakwatekesele muhatu wexile ni diyala kakexile mu tendela o nguzu yexile mu bhanga phala kusangulukisa Nzambi.
Jihova u tu Bhana Nguzu Phala Kudibhana ni Ibhidi Yoso (5:05)
Tala kyebhi diyala dyakatula mbote mu kukolokota kwa muhatwê.
O Jimbangi ja Jihova ene mwatatela kwila ene muwanuna o miji. Maji o kwila kiki kidi?
“O Jimbangi ja Jihova Awanuna Inga Ongeka o Miji?” (Milongi ya jw.org)