ISAMBILILO 12
Findo Ifikamofweniko Ukupitilisha Ukusambilila Baibolo?
Mukabwenamo ukwakuti makosa kani mwapitilisha ukusambilila Baibolo. Pano shimbi impindi, cilakatasha ukucite’fyo. Eli kabili, cipale na mwebo shimbi impindi, mulakanika kani mungakonsha ukupitilisha ukusambilila Baibolo. Pano nindo cicindamine ukupitilisha ukusambilila Baibolo? Findo fingamofweniko ukupitilisha ukusambilila nangaba ne kuba ne makatasho?
1. Nindo ukusambilila Baibolo kucindamine?
“Ishiwi lya baLesa lili ne mweo, lilasantuka.” (AbaEbeya 4:12) Baibolo icindeme makosa, ni pakuti ilabuulishishe’fi baLesa balanguluka eli na fyefyo bomfwa pali mwebo. Ikamofweniko ukuba ne mano acinenene ne bucetekelo. Eli ne cicindamishe makosa cakweba’ti ikamofweniko ukuba icibusa ca baYawe. Muli bucine, ukusambilila Baibolo kukalengesha imibelo yenu ne mekalilo enu ukulukuwaminako lukoso.
2. Nindo ukwishiba bucine bwa mu Baibolo kucindamine?
Bucine bwa mu Baibolo buli koti maboni amakwebo apatali. E mulandu Baibolo itubuulila’ti: “Kobuula bucine, tekubuposa.” (Ifishimpi 23:23) Popele kani twaishibe’fi bucine bwa mu Baibolo bucindamine, tukalukupyunga ne makosa esu onse pakweba’ti tupitilisho’kusambilila nangaba ne fili fyonse ifingesako.—Pendeni Ifishimpi 2:4, 5.
3. Kani baYawe bangamofweniko shani ukupitilisho’kusambilila Baibolo?
BaYawe, Abalengeshi ba fintu fyonse kabili Icibusa cenu, balafwaisha makosa ukumofweniko ukusambilila pali bo. Pakuti pali fyefyo, bangamulengesheni ‘ukuba ne kufwaisha ne kumupeeleni amakosa.’ (Pendeni AbaFilipoi 2:13.) Popele, kani mulukupengela ukumofweniko pakweba’ti mupitilisho’kusambilila ne kulukucita ifi mulukusambilila, baYawe bakamofweniko. BaYawe bakamofweniko na lyelyo mukalukupengela ukumukosheni ili bambi balukumupensheni, neli kani mulukupengela amakosa akuciicila amakatasho. Popele, impindi ne mpindi mulukulomba baYawe ati bamofweniko ukupitilisho’kusambilila Baibolo.—1 AbaTesalonike 5:17.
SAMBILILENI IFINGI
Sambilileni na fimbi ifi mungacita pakweba’ti mupitilisho’kusambilila Baibolo nangaba ne kuba ne fyakucite’fingi neli ukumukanyeni kuli bambi. Nakabili, boneni na fyefyo baYawe bakamofweniko pakweba’ti mukapitilisho’kusambilila nangaba ne kuba ne makatasho.
4. Mulukubiko’kusambilila Baibolo pantangiile mu mweo wenu
Shimbi impindi, tungaba ne fyakucite’fingi icakweba’ti twatatika ne kubona ati tekuti tukonshepo ukulukusambilila Baibolo. Findo fingatofwako? Pendeni AbaFilipoi 1:10, eli ne kwambaala ifyakwipushe’fi:
-
Findo mubona’ti ‘eficindeme makosa’ mu mweo wenu?
-
Kani mungalangisha shani ati mulibikilo’kusambila Baibolo pantangiile mu mweo wenu?
-
Kani mwatatikilapo ukubike’nsenga mu mbeketi eli mwaesha ukubikamo amabwe, tekuti engilepo onse koku
-
Kani mwatatikilapo ukubika amabwe mu mbeketi, mungakonsha ne kubikamo insenga shonse neli kungashala lukoso ishinini. Mukupalako, kani mwatatikilapo ukucite’fintu ificindeme mu mweo wenu, pa mpelo mukalukusanganako ne mpindi iyakucitako ifintu na fimbi.
Ukusambilila Baibolo kulatofwako ukwishiba bwino baLesa ne kwishiba inshila iyelelwe iyakubapempelelamo. Pendeni Matayo 5:3, eli ne kwambaala icakwipushe’ci:
-
Tulabwenamo shani kani twabiko’kusambila Baibolo pantangiile mu mweo wesu?
5. Pitilisheni ukusambilila nangaba ne kumukanyeni
Shimbi impindi, bambi bangamubuuleni ati muleko’kusambilila Baibolo. Ku cakubwenako, boneni ifyacitikile ba Francesco. Tambeni VIDYO, eli ne kwambaale’fyakwipusha fyakonkapo.
-
Koti ni fyefyo twatamba muli vidyo, findo banyinabo ne fibusa fya ba Francesco bacitile ili bababuulileko ifi balukusambilila?
-
Kani ba Francesco balibwenenemo shani mu kubulo’kulemuka?
Pendeni 2 Timote 2:24, 25, eli ne kwambaala ifyakwipushe’fi:
-
Kani aba mu cisoolo cenu ne fibusa fyenu balukulyumfwa shani pali fifi mulukusambilila?
-
Ukwelelwa na lili ilembo, findo mwelelwe ukucita kani bambi tabatemenwepo ati mulukusambilila Baibolo? Nindo mwelelwe ukucitile’fyo?
6. Mulukweyamina pali baYawe pakweba’ti balukumofweniko
Ili tulukupalamina kuli baYawe, tukalukufwaisha ukulukucita ifyakubasangalasha. Nangabe’fyo, cipale cingatukatasha ukuleka ukucite’fintu fimbi mu mweo wesu pakweba’ti tulukwikala ukwelelwa na fyefyo bafwaya. Kani ifi efi cili na kuli mwebo, mwane teshi ukulemuka. BaYawe bakamofweniko. Tambeni VIDYO, eli ne kwambaale’fyakwipusha fyakonkapo.
-
Koti ni fyefyo twatamba muli vidyo, findo ba Jim balekelo’kucita pakweba’ti balukusangalasha baYawe?
-
Findo ifyamusangalasheni makosa pali fyefyo baacitile?
Pendeni AbaEbeya 11:6, eli ne kwambaala ifyakwipushe’fi:
-
Findo baYawe bakacitila “ababafwaya-fwaya,” ekweba’ti bonse lukoso abapyungisha pakweba’ti beshibe baLesa ne kulukucita ifyakubasangalasha?
-
Kani ifi fyamulengesheni ukwishiba’ti baYawe balomfwa shani kani babona ifi mupyungisha pakweba’ti mulukusambilila Baibolo?
BAMBI BANGAMWIPUSHENI ATI: “Nindo ilengeshe mulukusambilila Baibolo na BaMboni sha BaYawe?”
-
Kani mungaasuka shani?
IFI MWASAMBILILA
Nangaba’ti shimbi impindi cingakatasha ukupitilisho’kusambililla Baibolo, pano ukucite’fyo kungamulengesheni ukuba abasangalele umuyayaya. Popele, pitilisheni ukweyamina pali baYawe, kabili bakamushukisheni ukwakuti.
Kani Munganuka?
-
Nindo bucine bwa mu Baibolo bucindamine kuli mwebo?
-
Mungabika shani pantangiile ‘ifintu ificindeme’ mu mweo wenu?
-
Nindo mwelelwe ukulombela baYawe ukumofweniko ukupitilisho’kusambilila Baibolo?
ISHIBILENIPO NA FIMBI
Boneni ifintu 4 ifyofweleko abantu abakuti ubwingi ukulukupyungisha bwino impindi.
“Ifyakupyungisha Bwino Impindi Yenu” (Kamulaba!, March-April 2014)
Boneni ifi baYawe baofweleko umwanakashi umbi pa mpindi ili abalume bakwe tabaishibilepo ifyalengeshe alukupyungisha makosa pakweba’ti alukucita ifyakusangalasha baLesa.
Boneni ifi umwalalume umbi abwenenemo ili umukashi wakwe apitilishe ukusambilila Baibolo.
Shimbi impindi abantu balalabila ati BaMboni sha BaYawe balapatukanya aba mu fisoolo. Kani ifyo fyacine?
“Kani BaMboni sha BaYawe Balapatukanya Aba mu Fisoolo Neli Balabekatanya?” (Ilyashi lya pa jw.org)
Cipale Mungapendako Nafifi:
IFYAKWIPUSHA IFIPUSHIWA MAKOSA
Kani Isambililo lya Baibolo Cindo?
Boneni ifyasuko pa lwe sambililo lya Baibolo ilya pa lukoso.
