KIFUNDWA 12
I Bika Bikakukwasha Wendelele Kwifunda Bible?
Kwifunda Bible i lwendo lutwala ku mpalo. Inoko, kelupēlangapo nyeke. Kyaba kimo ubwanya padi kwiipangula shi bine ukendelela na kwifunda Bible. Mwanda waka i biyampe wielele’ko? I bika bikakukwasha wendelele na kwifunda nansha shi kubaikala makambakano?
1. Mwanda waka kwifunda Bible kudi na kamweno?
“Kinenwa kya Leza i kyūmi kadi kidi na bukomo.” (Bahebelu 4:12) Bible udi na kamweno mwanda usokolanga milangwe ya Leza ne byobya byalanga podi. Ukakukwasha wikale na buyuki ino kadi umone ne tunangu twa bine ne lukulupilo. Kadi kya mvubu kutabuka, Bible ubwanya kukukwasha wikale mulunda na Yehova. Powifunda’ye, ukalengeja lupusa lwandi luyampe luludike būmi bobe.
2. Mwanda waka i biyampe kwitabija bulēme bwa bubine bwa mu Bible?
Bubine bwa mu Bible budi pamo’nka bwa mabwe malēme. O mwanda mwine Bible witusoñanya’mba: “Pota bubine, kokapotoloja’bo nansha dimo.” (Nkindi 23:23) Shi tulame mu ñeni bulēme budi na bubine bwa mu Bible, tukalonga bukomo bwa kwendelela na kwifunda—nansha shi tubatana bijika namani.—Tangai Nkindi 2:4, 5.
3. Le Yehova ukakukwasha namani wendelele na kwifunda?
Yehova, byadi Umpangi obe mwinē bukomo bonso ne Mulunda, usakanga kukukwasha wendelele kwifunda myanda yandi. Ukakupa “mutyima ne bukomo bwa kulonga.” (Tangai Bene Fidipai 2:13.) O mwanda shi kitatyi kimo usakilwa mutyima wa kwifunda ne wa kulonda mu būmi byobya byowifunda, aye ukakukwasha. Kadi shi usakila’ko bukomo bwa kunekenya bijika ne lwana, aye ukakupa’bo. Nanshi lomba kyaba ne kyaba Yehova akukwashe wendelele kwifunda Bible.—1 Bene Tesalonika 5:17.
LANGULUKA BININGE
Tala umone muswelo obwanya kwendelela na kwifunda Bible, ekale wi muvudilwe bya kulonga nansha shi kudi bantu bakulwa. Ebiya umone ne muswelo ukakukwasha Yehova wendelele.
4. Tangidija kumeso kifundwa kyobe kya Bible
Kyaba kimo bya kulonga mu būmi bivulanga ketulanga’mba kyaba kya kwifunda Bible kekikidi’kopo. Le i bika bibwanya kukukwasha? Tangai Bene Fidipai 1:10, ne kwisambila pa bino bipangujo:
-
Molangila, i ‘bintu’ka bimo bya mvubu mikatampe’ mu būmi?
-
Le i muswelo’ka obwanya kutangidija kumeso kifundwa kyobe kya Bible?
-
Shi omeke bidi musenga mu mbeketyi, mabwe keakabwana’mopo
-
Ino shi ubadikije’mo mabwe, nabya mukekala kyaba kibwana’mo ne musenga mwine. Muswelo umo onka, shi ubadikije “bintu bya mvubu mikatampe” mu būmi bobe, ukabwanya kwibivuija kadi kwashala ne kyaba kya kulonga bikwabo
Kwifunda Bible kuvuijanga kisakibwa kyetu kya ku mushipiditu—ke kuyuka Leza kadi, ne kumutōta. Tangai Mateo 5:3, ne kwisambila pa kino kipangujo:
-
Le i bika byokamwena’mo shi utangidije kumeso kifundwa kyobe kya Bible?
5. Takamana nansha shi ubatanwa na lwana
Kyaba kimo bantu bakwabo babwanya kukuzozeja uleke kwifunda Bible. Kimfwa tala byafikīle Francesco. Talai VIDEO, ne kwisambila pa bino bipangujo:
-
Mu ino video, Francesco pawasapwidile balunda ne kisaka amba wifundanga Bible, le balongele’po namani?
-
Le wapadilwe namani mpalo pa mwanda wa kutakamana kwandi?
Tangai 2 Temote 2:24, 25, ne kwisambila pa bino bipangujo:
-
Le bantu ba mu kyenu kisaka ne balunda bamwene namani kwifunda kowifunda?
-
Mungya ano mavese, i bika byofwaninwe kulonga shi muntu kampanda kasangedilepo kwifunda kowifunda Bible? Ne mwanda waka ulonge nankyo?
6. Kulupila Yehova, akukwashe
Potwenda tufwena bininge kudi Yehova, po pene ne mutyima wetu wa kumusangaja wenda ubaila’ko. Nansha nankyo, tubwanya kulwa pa kushinta bintu bimo mu būmi bwetu amba tufikile pa misoñanya yandi. Shi nobe ulwanga namino, kokazoza. Yehova usa kukukwasha. Talai VIDEO, ne kwisambila pa bino bipangujo:
-
Mu ino video, Jim washintyile namani pa kusaka’mba asangaje Yehova?
-
I bika byakutulumuna mu kimfwa kyandi?
Tangai Bahebelu 11:6, ne kwisambila pa bino bipangujo:
-
Le Yehova ukalongela bika “boba bamukimba na mikeketo”—ko kunena’mba, boba balonga bukomo bwa kumuyuka ne kumusangaja?
-
Ubamone, le nanshi Yehova, wiivwananga namani pamona bukomo bobe bwa kwifunda Bible?
MUNTU UBWANYA KWIPANGULA’MBA: “Le kyofundila Bible i kika?”
-
Le ukamulondolola namani?
MU KĪPI
Nansha kwifunda Bible byokekupēlangapo nyeke, ino kukakukwasha wikale na būmi bwa nyeke. Endelela na kukulupila Yehova, nandi ukakupala mpalo.
Pitulukai’mo
-
Mwanda waka bubine bwa mu Bible i bulēme kodi?
-
Le i ‘bintu’ka bimo bya mvubu mikatampe’?
-
Mwanda waka ufwaninwe kulomba Yehova akukwashe wendelele na kwifunda Bible?
KIMBA
Tala bintu biná byakweshe bavule bengidije kitatyi kyabo na tunangu.
“Mwa Kwingidijija Kitatyi Kyobe na Tunangu” (Langukai!, Kweji 2, 2014)
Tala Yehova mwaakwashishe lolo umo wadi na mulume ketabijapo bukomo bwandi bwa kusangaja Leza.
Tala muntu umo wamwenine mu kutakamana kwa mukajandi.
Kyaba kimo bantu batopekanga Batumoni ba Yehova amba bakalañanyanga Bisaka. Le i bya bine?
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
