Jaku tzʼok mojbʼet aju tuʼn qxnaqʼtzan tiʼj Tyol Dios ik tzeʼn aj qxiʼ pasialil toj jun lugar qgan. Pero at maj kwest ex jakulo kubʼ t-xjelina qa ktel ambʼil tiʼja tuʼn t-xnaqʼtzana tiʼj. ¿Tiquʼn nim toklen tuʼn kukx t-xnaqʼtzana tiʼj Tyol Dios? ¿Tiʼ kʼonil tiʼja tuʼn kukx t-xnaqʼtzana maske jaku tzʼok weʼya twitz nya bʼaʼn?

1. ¿Tiquʼn nim toklen tuʼn t-xnaqʼtzana tiʼj Tyol Dios?

«Aju tyol Dios itzʼte ex at tipumal» (Hebreos 4:​12). Jun tbʼanel oyaj Biblia, tuʼnju in tzaj tqʼamaʼn alkye t-ximbʼetz Dios at ex tiʼ in kubʼ tnaʼn tiʼja. Nya oʼkx kʼonil tiʼja tuʼn tel tnikʼa kyiʼj nimku tiʼchaq, sino kʼonil tiʼja tuʼn tjaw tjyoʼna aju mas bʼaʼn ex tuʼn tten qʼuqbʼil tkʼuʼja tiʼj ambʼil tzul. Ex aju mas nim toklen, kʼonil Biblia tiʼja tuʼn toka te tamiw Jehová. Tkyaqil maj aj t-xnaqʼtzana tiʼj Biblia, kxel tqʼoʼna ambʼil te tuʼn tonin tiʼja tuʼn tok tanqʼibʼila te mas tbʼanel.

2. ¿Tiquʼn il tiʼj tuʼn tok tqʼoʼna kyoklen xnaqʼtzbʼil tkuʼx toj Tyol Dios?

Ik kyten xnaqʼtzbʼil ateʼkux toj Tyol Dios ik tzeʼn jun qʼinumabʼil nim toklen. Tuʼntzunju in tzaj tqʼamaʼn jlu qe: «Laqʼoma yol axix tok» ex miʼn txi tkʼayina (Proverbios 23:​23). Qa ma tzʼel tnikʼa tiʼj qa nim kyoklen xnaqʼtzbʼil ateʼkux toj Tyol Dios, kʼonil tiʼja tuʼn kukx t-xnaqʼtzana tiʼj maske jaku tzʼok weʼya twitz junjun nya bʼaʼn (uʼjinktza Proverbios 2:​4, 5).

3. ¿Tzeʼn kʼonil Jehová tiʼja tuʼn kukx t-xnaqʼtzana tiʼj Biblia?

Tuʼnju a Jehová Bʼinchal tkyaqil ex o tzʼoka te tamiw, ojtzqiʼna tuʼn ex taj tuʼn tonin tiʼja tuʼn kukx t-xnaqʼtzana tiʼj Tyol. Ax ikx kxel tqʼoʼn Jehová tipumala ex tgana tuʼn tbʼant tuʼna (uʼjinktza Filipenses 2:​13). Tuʼntzunju, qa at maj taja tuʼn tonin juntl tiʼja tuʼn kukx t-xnaqʼtzana ex tuʼn tkubʼ tbʼinchaʼna aju in nel tnikʼa tiʼj, kʼonil Jehová tiʼja. Ex qa ma tzʼok weʼya twitz jun nya bʼaʼn moqa qa ma tzʼel ikʼuna kyuʼn txqantl, kxel tqʼoʼn tipumala moqa tjwersa. Qaninxa onbʼil te Jehová tuʼn kukx t-xnaqʼtzana tiʼj Tyol (1 Tesalonicenses 5:​17).

 QO JYON MAS TQANIL

4. Bʼaʼn tuʼn tel tnikʼa tiʼj qa nim toklen tuʼn t-xnaqʼtzan tiʼj Tyol Dios

Tuʼnju at nimku tiʼchaq tuʼn tbʼant quʼn, kwest jaku tzʼela toj qwitz tuʼn qxnaqʼtzan tiʼj Tyol Dios. Tuʼntzunju, ¿tiʼ jaku bʼant tuʼna tuʼn t-xnaqʼtzana? Kyuʼjinktze Filipenses 1:​10 ex che yoline kyiʼj xjel lu:

• ¿Alkyeqe tiʼchaq mas nim toklen toj twitza?

• ¿Tiʼ jaku tzʼonin tiʼja tuʼn tok tqʼoʼna toklen t-xnaqʼtzbʼila tiʼj Tyol Dios?

1. Qa ma kux tnojsaʼna jun cubeta tukʼil aren ex in kux tqʼoʼna abʼj toj, mlayx kux bʼaj tkyaqil.

2. Noqtzun tuʼnj, qa tnejel ma che kux tqʼoʼna abʼj toj cubeta, jaku kux bʼaj tkyaqil aren toj. Ax ikx, qa ma kubʼ tbʼinchaʼna qe tiʼchaq mas nim toklen, ktel ambʼil tiʼja tuʼn kybʼant junjuntl tiʼchaq tuʼna.

Aj qxnaqʼtzan tiʼj Biblia, in nonin qiʼj tuʼn tok qojtzqiʼn Dios ex tuʼn qkʼulin te. Kyuʼjinktze Mateo 5:3 ex che yoline tiʼj xjel lu:

• Qa ma tzʼok qqʼoʼn toklen qxnaqʼtzbʼil tiʼj Tyol Dios, ¿alkye tten kʼonil qiʼj?

 5. Kukx xnaqʼtzana tiʼj Biblia maske nya kyaj txqantl

6. Jaku tzʼok qeʼ tkʼuʼja tiʼj qa kʼonil Jehová tiʼja

 TOJ CHʼIN YOL

Maske at maj kwest tuʼn t-xnaqʼtzana tiʼj Tyol Dios, qa ma bʼant jlu tuʼna kʼonil tiʼja tuʼn ttzalaja tiʼj tanqʼibʼila te jumajx. Ex qa kukx ma tzʼok qeʼ tkʼuʼja tiʼj Jehová, tzul kʼiwlaʼna tuʼn.

Aju ma qo yolin tiʼj

• ¿Tiquʼn in nok tqʼoʼna toklen axix tok tkuʼx toj Tyol Dios?

• ¿Tzeʼn jaku tzʼel tnikʼa tiʼj alkyeqe tiʼchaq mas nim toklen tuʼn tbʼant tuʼna?

• ¿Tiquʼn nim toklen tuʼn t-xi tqanina te Jehová tuʼn tonin tiʼja tuʼn kukx t-xnaqʼtzana tiʼj Biblia?