PƐ MƐDÃPIA 12

Mɛɛ E Lo Gbũu I Mɔ Kɛɛ I Kɛ Baaboa Mɛdãpia Teele?

À DA YƐƁO PÍÉ

Ye kɔaa Baaboa mɛdãa, wɔ̃ kpanazɛ lɛɛ go a kolo la. E kɛ bɛ̃ɛ kilia, ye wa lɔɔ-lɔɔ luo seĩ ka. Luo gbũu kaa, ii bɛi leĩ i yɛlɛtaa e kɛa bɛi lɛɛ lo kɛɛ i mɔ kɛɛ i kɛ Baaboa mɛdãpia teelea. Mɛ e kɛ lɛ lɛ kpanazɛ i dɔ gaga i kɛ a kɛpia? Mɛɛ e bɛi gbũu i mɔ kɛ i lo i lie, wɔ̃ e kɛ bɛ̃ɛ gagaa ka?

1. Mɛ e kɛ lɛ Baabo mɛdãa lɛ kpanazɛ?

“Wala Lewe lɛ ɓeee, ɛ̃ɛ̃ wesa-wesa.” (Hiibulu 4:12) Baaboa lɛ kpanazɛ, ɓii lɛɛ zi lɛ Wala e e yɛlɛtaa ka e gbɛ̃a i mɔɔ zɔ̃ɔ. Lɛɛ́ gbũ nɔ i mɔ kɛ i pɛ dɔ, kɛɛ lɛɛ gbũ i mɔ zeĩ kɛ gikã wa zokɛpɛmɔ e kɛ i kɛlɛ. A kpanazɛ kpokpoa lɛ e kelɛ Baaboa lɛɛ gbũ i mɔ kɛɛ i kɛ Zihova ɓɛɛ ka. Ye ɓaa Baaboa mɛdãa, a to la yikɛgaa e ɓa kɛɓe mɛvɔɔ e kpanazɛ ka.

2. Mɛɛ e a kɛ kpanazɛ kɛ ko yidɔ kelɛ Baaboa lɛ wana zɛ?

Wana wɔ̃ ni lɛ o Baaboa yia o kelɛ dɔpɔɔ kpanazɛ ni lɛ ɓe. Pɛ a kɛ lɛ Baaboa a gee ko “wana wɔ̃ lɔ ɛ̃ɛ̃ yekɛ ko lɔɔ-dɔɔ” lɛ. (Pɔlɔvɛɛ 23:23) Ye kɔaa wana wɔ̃ lɛ e Baaboa yia kɛ kpanazɛ wɔ̃ kpɔ ko yɛlɛpiea, koo lo dɔɔ gaa ko a mɛdã—e kɛ bɛ̃ɛ lɛ wɔ̃ e bɛi ko teaa, e ɓɔ ko laa ka.—Pɔlɔvɛɛ 2:4, 5 gee.

3. Zi kpɛɛ lɛ Zihova e bɛi gbũua i mɔ kɛɛ i kɛ Baaboa mɛdãpia?

Zihova kɛ ko Ɓɛɛ ɛ̃ɛ̃ ko Kɛmi lɛ yikɛgaa seĩ laa kɛlɛɛ kaa, laa naa e gbũ i mɔ i a dɔ. Lɛɛ bɛi a kɛɛ “kɛ ka zo e wee a mɔ . . . ɛ̃ɛ̃ kɛ bɛi e kɛ ka mɔ a kɛɛ yi.” (Felepĩã 2:13 gee.) Kɛɛ, ye i fĩĩ aa kɛ nyɛpia luo gbũu ka kɛ i pɛ mɛdã ɛ̃ɛ̃ i to wɔ̃ ɓaa mɛdãa piea, lɛɛ bɛi gbũu i mɔ. Ye ɓaa naa gbumɔ ka kɛ i kɔ e die i tea-wɔ̃ ɛ̃ɛ̃ sã-dɔ wɔ̃ nɔɔfe laa, lɛɛ bɛia kɛɛ. I sɛnɛɓo Zihova lɛɛ luo seĩ ka kɛ e gbũ i mɔ i kɛ ɓa Baaboa mɛdãpia teele.—1 Tɛsalonia 5:17.

A PIE FOO

I zi lɛ i bɛi kɛɛ Baaboa mɛdãpia ka teele e kɛ bɛ̃ɛ lɛ ya-tãã wa i mɔ ɛ̃ɛ̃ lɛ mia oó naa ka kɛ ɓa kɛɛ mɛdã. Zeniia, i zi lɛ Zihova e lo gbũua i mɔ kɛ i lo i lie ɓa Baabo mɛdãa kaa gɛ̃.

4. Ɓa Baabo mɛdãa kɛ wɔ̃ beĩzɛ ka

Luo gbũu kaa wɔ̃ bunuzɛ lɛɛ kɛ ko kɔla, kɔaa gɛ̃ kelɛ luo wá ko kɛlɛ kɛ ko Baaboa mɛdã. Mɛɛ e bɛi kɛɛ gbumɔ ka? Ko Felepĩã 1:10 gee, ɛ̃ɛ̃ kɛ ko wɛĩlɔɔ ni o kea yiɓo:

Ɓaa i yɛlɛtaaa, mɛɛ ni lɛ o wɔ̃ kpanazɛɛ do ka ɓa kɛɓe yi?
Zi kpɛɛ lɛ i bɛi ɓa Baabo mɛdãa kɛɛa wɔ̃ beĩzɛ ka?

Ye ɓaa bɔki e kea yi pa nyiɛ-sɛlɛ ka kɛ i tĩa gɛlɛkpo nia kaa laa, gɛlɛkpo nia lɛɛ́ lo bɛi bɔkia yi
Ye ɓaa gɛlɛkpo nia da bɔkia yi beĩzɛɛ, zi lɛɛ lo kɛɛ ɓe kɛ nyiɛ-sɛlɛɛ ku gbuo zɛ e loa fĩa. Zi nɔ dooa kaa, ye ɓaa wɔ̃ ni lɛ o kpanazɛɛ si beĩzɛ ɓa kɛɓe yia, bɛi lɛɛ lo kɛɛ i mɔ ɓa kɛ, to luo e kɛ i kɛlɛ i wɔ̃ ni ye o toa kɛ

Ye ɓaa kɛ Baaboa mɛdãpiaa, lɛɛ lo gbũu i mɔ kɛ i Wala dɔ ɛ̃ɛ̃ i gbini a lɛɛ. Ko Mafiu 5:6 gee, ɛ̃ɛ̃ kɛ ko wɛĩlɔɔ e kea yiɓo:

Zi kpɛɛ lɛ ko gbumɔ sɔlɔɓoa, ye kɔaa Baabo mɛdãa kɛ wɔ̃ beĩzɛ kaa ka?

5. Yekɛ i tea ye mia waa ya i lɛɛ ka

Luo gbũu kaa, mia oo lo i fiinyɛ wɔ̃ kɛɛ Baaboa mɛdãa mɔ. Ko Fanasɛko zi wɔ̃ gɔ̃aa gɛ̃. Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Ee Fɔnɔ Yie Sɔlɔɓo Ɓii Lɛɛ́ Gbaa Teaa Wɛĩ (5:22)

Viloa yia, zi kpɛɛ lɛ Fanasɛko ɓɛĩ ni ɛ̃ɛ̃ a mia ni o wɔ̃ kɛa, lɛ e pɛ e kɛa mɛdãpiaa wɔ̃ gee o lɛɛ ka?
Zi kpɛɛ lɛ ee fɔnɔ yie sɔlɔɓoa ɓii lɛɛ́ gbaa teaa wɛĩ?

Ko 2 Temɔte 2:24, 25 gee, ɛ̃ɛ̃ kɛ ko wɛĩlɔɔ ni o kea yiɓo:

Zi kpɛɛ lɛ i mia ni ɛ̃ɛ̃ i ɓɛĩ mia o o yɛlɛtaa ka e gbɛ̃a pɛ ɓaa mɛdãpiaa mɔ?
Lɛ zi a lonipia nia wa gee a kaa, zi kpɛɛ lɛ i lo wɔ̃ kɛɛ a ka ye mi do ge lɛɛ́ li ɓii i Baaboa mɛdãpiaa wɛĩ? Mɛɛ wɔ̃ wɛĩ?

6. I zo dɔ Zihova mɔ gbumɔ wɛĩ

Ye kɔaa nyɔɔ Zihova ka kɔɛɛ, a zo-da-wɔ̃ kɛlɔ lɛ e ko kɛɛ la lɛɛ kpɔ. E kɛ bɛ̃ɛ kilia, lɛɛ kɛ gaga kɛɛ ko ko yiikɔ mɛvɔɔ kɛ ko to a zi yiikɔ pie. E kɛa ɓaa i yɛlɛtaa do kilia, yekɛ i fĩĩ e nyɛ. Zihova lɛɛ lo gbũu i mɔ. Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.

VILO: Zihova Lɛɛ Gbũ Ko Mɔ Koo Yiikɔ Mɛvɔɔ (3:56)

Viloa yia, mɛɛ wɔ̃ lɛ Zĩĩ a kɛ kɛɛ e Zihova zo da?
Mɛɛ e i zo si e gbɛ̃a la wɔ̃ gɔ̃aa mɔ?

Ko Hiibulu 11:6 gee, ɛ̃ɛ̃ kɛ ko wɛĩlɔɔ ni o kea yiɓo:

Mɛɛ wɔ̃ lɛ Zihova e loa kɛɛ “mia lɛ o a naaa”—lɛ o kelɛ, mia lɛ o dɔ gaa kɛ o a dɔ ɛ̃ɛ̃ o a zo-da-wɔ̃ kɛɛ lɛɛ?
Kea mɛɛ wɔ̃ lɛ a zɔ̃ɔ i lɛɛ e gbɛ̃a zi Zihova e e yɛlɛtaa ka, ye aa i gɛ̃ ɓaa dɔ gaa kɛ i Baaboa mɛdãa ka?

MI DO LƐƐ BƐIA GEE: “Mɛɛ ɓa mɔɔ Baaboa mɛdã?”