പാഠം 12
ബൈബിൾപഠനം എങ്ങനെ മുടങ്ങാതെ നോക്കാം?
ബൈബിൾ പഠിക്കുന്നതുകൊണ്ട് പ്രയോജനമുണ്ട്. പക്ഷേ അതു മുടങ്ങാതെ കൊണ്ടുപോകാൻ അത്ര എളുപ്പമല്ല. നിങ്ങളുടെ കാര്യം എങ്ങനെയാണ്? മുടങ്ങാതെ ബൈബിൾ പഠിക്കുന്നത് പ്രധാനപ്പെട്ട കാര്യമാണോ? എന്തൊക്കെ തടസ്സം വന്നാലും ബൈബിൾപഠനം നിറുത്താതിരിക്കാൻ നിങ്ങൾക്ക് എന്തു ചെയ്യാം?
1. മുടങ്ങാതെ ബൈബിൾ പഠിക്കുന്നതിന്റെ പ്രയോജനമെന്താണ്?
“ദൈവത്തിന്റെ വാക്കുകൾ ജീവനുള്ളതും ശക്തി ചെലുത്തുന്നതും” ആണ്. (എബ്രായർ 4:12) ബൈബിൾ വായിക്കുമ്പോൾ ദൈവം നമ്മളോടു സംസാരിക്കുന്നതുപോലെയാണ്. ദൈവത്തിന്റെ ചിന്തകളും ദൈവത്തിനു നിങ്ങളോടുള്ള സ്നേഹവും അപ്പോൾ മനസ്സിലാക്കാം. ബൈബിൾ പഠിക്കുമ്പോൾ നമുക്ക് അറിവു കിട്ടും. അത് നല്ല തീരുമാനങ്ങൾ എടുക്കാൻ നമ്മളെ സഹായിക്കും. കൂടാതെ ഭാവിയെക്കുറിച്ച് നല്ലൊരു പ്രത്യാശയും അതു തരുന്നു. ഏറ്റവും വലിയ പ്രയോജനം നിങ്ങൾക്ക് യഹോവയുടെ അടുത്ത സുഹൃത്താകാനാകും എന്നതാണ്. ദൈവവചനത്തിന് ശക്തിയുള്ളതുകൊണ്ട് നിങ്ങളുടെ ജീവിതം മെച്ചപ്പെടുത്താനും അതിനു കഴിയും.
2. ബൈബിളിലെ സത്യങ്ങളുടെ വില മനസ്സിലാക്കേണ്ടത് എന്തുകൊണ്ട്?
ബൈബിളിലുള്ള സത്യങ്ങൾ അമൂല്യമായ നിധികൾപോലെയാണ്. അതുകൊണ്ടാണ് ‘സത്യം ഒരിക്കലും വിറ്റുകളയരുത്’ എന്ന് ബൈബിൾ പറയുന്നത്. (സുഭാഷിതങ്ങൾ 23:23) ഇതു മനസ്സിലാക്കിയാൽ, എന്തൊക്കെ പ്രശ്നങ്ങൾ വന്നാലും ബൈബിൾപഠനം നമ്മൾ ഒരിക്കലും നിറുത്തുകയില്ല.—സുഭാഷിതങ്ങൾ 2:4, 5 വായിക്കുക.
3. ബൈബിൾപഠനം മുടങ്ങാതെ കൊണ്ടുപോകാൻ യഹോവ എങ്ങനെയാണു സഹായിക്കുന്നത്?
യഹോവ സർവശക്തനായ സ്രഷ്ടാവാണ്, നിങ്ങളുടെ സുഹൃത്തുമാണ്. തന്നെക്കുറിച്ച് പഠിക്കുന്നതിന് നിങ്ങളെ സഹായിക്കാൻ യഹോവ ആഗ്രഹിക്കുന്നു. അതുകൊണ്ടാണ് “ആഗ്രഹവും പ്രവർത്തിക്കാനുള്ള ശക്തിയും” ദൈവം നിങ്ങൾക്ക് തരുമെന്ന് ബൈബിൾ പറയുന്നത്. (ഫിലിപ്പിയർ 2:13 വായിക്കുക.) ബൈബിൾ പഠിക്കാനോ അതനുസരിച്ച് ജീവിക്കാനോ ചിലപ്പോഴൊക്കെ ബുദ്ധിമുട്ട് വന്നാലോ? അപ്പോഴും യഹോവ നിങ്ങളെ സഹായിക്കും! എന്തെങ്കിലും എതിർപ്പുകളോ തടസ്സങ്ങളോ നേരിട്ടാൽ അവ മറികടക്കാൻ ആവശ്യമായ ശക്തി തരാനും യഹോവ തയ്യാറാണ്. ബൈബിൾപഠനം മുടങ്ങാതെ കൊണ്ടുപോകാനുള്ള സഹായത്തിനായി എപ്പോഴും യഹോവയോടു പ്രാർഥിക്കുക.—1 തെസ്സലോനിക്യർ 5:17.
ആഴത്തിൽ പഠിക്കാൻ
തിരക്കുകളും മറ്റുള്ളവരുടെ എതിർപ്പുകളും ഒക്കെ ഉണ്ടെങ്കിലും നിങ്ങൾക്ക് എങ്ങനെ ബൈബിൾപഠനം മുടങ്ങാതെ കൊണ്ടുപോകാം? ഇക്കാര്യത്തിൽ യഹോവ നിങ്ങളെ എങ്ങനെയാണു സഹായിക്കുന്നതെന്നു നോക്കാം.
4. ബൈബിൾപഠനം പ്രധാനപ്പെട്ട ഒരു കാര്യമാണ്
തിരക്കുകൾ കാരണം ബൈബിൾ പഠിക്കാൻ സമയം കിട്ടുന്നില്ലെന്ന് തോന്നിയിട്ടുണ്ടോ? എന്തു ചെയ്യാൻ കഴിയും? ഫിലിപ്പിയർ 1:10 വായിക്കുക. എന്നിട്ട് ഈ ചോദ്യങ്ങൾ ചർച്ച ചെയ്യുക:
-
ജീവിതത്തിൽ “കൂടുതൽ പ്രാധാന്യമുള്ള കാര്യങ്ങൾ” ഏതാണെന്നാണു നിങ്ങൾക്കു തോന്നുന്നത്?
-
ബൈബിൾപഠനത്തിനു മുഖ്യസ്ഥാനം കൊടുക്കാൻ നിങ്ങൾക്ക് എങ്ങനെ കഴിയും?
-
ഒരു ബക്കറ്റിൽ മണൽ നിറച്ചതിനു ശേഷം കല്ലുകൾ വെക്കാൻ നോക്കിയാൽ എല്ലാ കല്ലുകളും ബക്കറ്റിൽ കൊള്ളില്ല
-
ബക്കറ്റിൽ ആദ്യം കല്ലുകൾ വെച്ചാൽ ഭൂരിഭാഗം മണലും അതിൽ നിറയ്ക്കാൻ കഴിയും. ഇതുപോലെ, ജീവിതത്തിൽ “കൂടുതൽ പ്രാധാന്യമുള്ള” കാര്യങ്ങൾക്കു മുൻഗണന കൊടുത്താൽ മിക്ക കാര്യങ്ങളും നമുക്കു ചെയ്യാനാകും
ദൈവത്തെക്കുറിച്ച് കൂടുതൽ അറിയാനും ദൈവത്തെ ആരാധിക്കാനും ഉള്ള ഒരു ആഗ്രഹം പൊതുവേ മനുഷ്യർക്കുണ്ട്. ആ ആഗ്രഹം തൃപ്തിപ്പെടുത്താൻ ബൈബിൾപഠനം സഹായിക്കും. മത്തായി 5:3 വായിക്കുക. എന്നിട്ട് ഈ ചോദ്യം ചർച്ച ചെയ്യുക:
-
ബൈബിൾപഠനത്തിന് മുഖ്യസ്ഥാനം കൊടുത്താൽ അതു നമുക്ക് എങ്ങനെ പ്രയോജനം ചെയ്യും?
5. എതിർപ്പുകളുണ്ടായാലും മടുത്ത് പിന്മാറരുത്
ചിലപ്പോൾ ബൈബിൾപഠനം നിറുത്താൻ മറ്റുള്ളവർ നമ്മളോടു പറഞ്ഞേക്കാം. ഫ്രാൻസിസ്കോയുടെ അനുഭവം ശ്രദ്ധിക്കുക. വീഡിയോ കാണുക. അതിനു ശേഷം ഈ ചോദ്യങ്ങൾ ചർച്ച ചെയ്യുക:
-
താൻ പഠിച്ച കാര്യങ്ങളെക്കുറിച്ച് ഫ്രാൻസിസ്കോ വീട്ടുകാരോടും കൂട്ടുകാരോടും സംസാരിച്ചപ്പോൾ എന്തായിരുന്നു പ്രതികരണം?
-
മടുത്ത് പിന്മാറാതിരുന്നതുകൊണ്ട് ഫ്രാൻസിസ്കോയ്ക്ക് എന്തു നേട്ടമാണുണ്ടായത്?
2 തിമൊഥെയൊസ് 2:24, 25 വായിക്കുക. എന്നിട്ട് ഈ ചോദ്യങ്ങൾ ചർച്ച ചെയ്യുക:
-
നിങ്ങൾ ബൈബിൾ പഠിക്കുന്നതു കാണുമ്പോൾ വീട്ടുകാർക്കും കൂട്ടുകാർക്കും ഒക്കെ എന്താണ് തോന്നുന്നത്?
-
നിങ്ങൾ ബൈബിൾ പഠിക്കുന്നത് ഇഷ്ടപ്പെടാത്ത ഒരാളോട് നിങ്ങൾ എങ്ങനെ ഇടപെടണം? എന്തുകൊണ്ട്?
6. യഹോവ തീർച്ചയായും നിങ്ങളെ സഹായിക്കും!
നമ്മൾ യഹോവയെക്കുറിച്ച് കൂടുതൽ മനസ്സിലാക്കുമ്പോൾ യഹോവയെ സന്തോഷിപ്പിക്കാനുള്ള നമ്മുടെ ആഗ്രഹവും കൂടിവരും. എന്നാൽ ജീവിതത്തിലെ പല കാര്യങ്ങളിലും മാറ്റം വരുത്താൻ അപ്പോഴും നമുക്ക് ബുദ്ധിമുട്ടു തോന്നിയേക്കാം. നിങ്ങൾക്ക് അങ്ങനെ തോന്നിയിട്ടുണ്ടെങ്കിൽ ശ്രമം ഉപേക്ഷിക്കരുത്. യഹോവ നിങ്ങളെ സഹായിക്കും. വീഡിയോ കാണുക. അതിനു ശേഷം ഈ ചോദ്യങ്ങൾ ചർച്ച ചെയ്യുക:
-
യഹോവയെ സന്തോഷിപ്പിക്കാൻ ജിം എന്തൊക്കെ മാറ്റങ്ങളാണു വരുത്തിയത്?
-
ജിമ്മിന്റെ അനുഭവത്തിൽനിന്ന് ഏതു കാര്യമാണു നിങ്ങൾക്ക് ഇഷ്ടപ്പെട്ടത്?
എബ്രായർ 11:6 വായിക്കുക. എന്നിട്ട് ഈ ചോദ്യങ്ങൾ ചർച്ച ചെയ്യുക:
-
ദൈവത്തെ ‘ആത്മാർഥമായി അന്വേഷിക്കുന്നവർക്കായി,’ അതായത് ദൈവത്തെ കൂടുതൽ അറിയാനും സന്തോഷിപ്പിക്കാനും കഠിനശ്രമം ചെയ്യുന്നവർക്കായി ദൈവം എന്തു ചെയ്യും?
-
ഈ വാക്യം അനുസരിച്ച്, ബൈബിൾ പഠിക്കാൻ നിങ്ങൾ ചെയ്യുന്ന ശ്രമങ്ങൾ യഹോവ എങ്ങനെയാണ് കാണുന്നത്?
ആരെങ്കിലും ഇങ്ങനെ ചോദിച്ചാൽ: “നിങ്ങൾ എന്തിനാ ബൈബിൾ പഠിക്കുന്നത്?”
-
നിങ്ങൾ എന്ത് ഉത്തരം പറയും?
ചുരുക്കത്തിൽ
ബൈബിൾ പഠിക്കുമ്പോൾ പല തടസ്സങ്ങളും വന്നേക്കാം. എങ്കിലും പഠനം തുടരുന്നത് എന്നെന്നും സന്തോഷത്തോടെ ജീവിക്കാൻ നിങ്ങളെ സഹായിക്കും. എപ്പോഴും യഹോവയിൽ ആശ്രയിക്കുക. യഹോവ നിങ്ങളെ അനുഗ്രഹിക്കും.
ഓർക്കുന്നുണ്ടോ?
-
ബൈബിളിലെ സത്യങ്ങൾ നിങ്ങൾ വളരെ വിലയുള്ളതായി കാണുന്നത് എന്തുകൊണ്ടാണ്?
-
“കൂടുതൽ പ്രാധാന്യമുള്ള കാര്യങ്ങൾ” ഏതാണെന്നു നിങ്ങൾക്ക് എങ്ങനെ ഉറപ്പാക്കാൻ കഴിയും?
-
ബൈബിൾപഠനത്തിന് മുടക്കം വരാതിരിക്കാൻ നിങ്ങൾ യഹോവയോട് സഹായം ചോദിക്കേണ്ടത് എന്തുകൊണ്ടാണ്?
കൂടുതൽ മനസ്സിലാക്കാൻ
സമയം നന്നായി ഉപയോഗിക്കാൻ പലരെയും സഹായിച്ചിരിക്കുന്ന നാലു വിധങ്ങൾ നോക്കുക.
“അമൂല്യമാണ് സമയം! ഫലപ്രദമായി ഉപയോഗിക്കുക” (ഉണരുക! 2014 ഏപ്രിൽ)
ഒരു സ്ത്രീ ബൈബിൾ പഠിക്കാൻ തുടങ്ങി. അവരുടെ ഭർത്താവിന് അത് ഇഷ്ടമായിരുന്നില്ല. യഹോവ എങ്ങനെയാണ് ആ സ്ത്രീയെ സഹായിച്ചത്?
ഭാര്യ മടുത്തുപിന്മാറാതെ പ്രവർത്തിച്ചതുകൊണ്ട് അവരുടെ ഭർത്താവിന് എന്തു പ്രയോജനമാണുണ്ടായത്?
യഹോവയുടെ സാക്ഷികൾ കുടുംബം തകർക്കുന്നവരാണെന്നു ചിലർ പറയാറുണ്ട്. അതു സത്യമാണോ?