LECCIÓN 12
¿Ndáaña chindeétáʼan xíʼún ña̱ chika̱a̱kaún ndee̱ ña̱ kaʼviún Biblia?
Ni ndákiʼinyó ña̱ va̱ʼa xa̱ʼa̱ ña̱ káʼviyó Biblia, soo íxayo̱ʼvi̱vaña xíʼinyó ña̱ kaʼviyóña. Sava yichi̱ kivi ndakanixi̱níún á chika̱a̱kaún ndee̱ ña̱ kaʼviúnña. ¿Nda̱chun ndáyáʼviní chika̱a̱ún ndee̱ ña̱ kaʼviúnña? ¿Ndáaña chindeétáʼan xíʼún ña̱ kǒo sandákoún kaʼviúnña ni tá yáʼún nu̱ú tu̱ndóʼo?
1. ¿Nda̱chun ndáyáʼviní ña̱ chika̱ún ndee̱ ña̱ kaʼviún Biblia?
“Tu̱ʼun Ndióxi̱ ña̱ táku kúúña ta kúúmiíníña ndee̱” (Hebreos 4:12). Ña̱ Biblia iin libro ña̱ ndáyáʼviní kúúña, saáchi káʼa̱nña xa̱ʼa̱ ña̱ ndákanixi̱ní Ndióxi̱ ta saátu xa̱ʼa̱ ña̱ kúʼvi̱ní-inira xínira yóʼó. Va̱ása chíndeétáʼan kuitíña xíʼún ña̱ kunda̱a̱-iniún xa̱ʼa̱ ku̱a̱ʼá ña̱ʼa, saáchi chíndeétáʼanña xíʼún ña̱ vií koo ña̱ ndaka̱xiún keʼún ta saátu ña̱ kundatún ndakiʼún ña̱ va̱ʼa chí nu̱únínu. Soo ña̱ ndáyáʼvika kúú ña̱ chindeétáʼanña xíʼún ña̱ xa̱ún koún migo Jehová. Tá káʼviúnña táxiún ña̱ chindeétáʼanña xíʼún ña̱ viíka koún.
2. ¿Nda̱chun ndáyáʼviní ndakuniún ña̱ nda̱a̱ ña̱ va̱xi nu̱ú Biblia?
Ña̱ nda̱a̱ ña̱ va̱xi nu̱ú Biblia ndáyáʼviníña. Xa̱ʼa̱ ña̱kán, káʼa̱nña ña̱yóʼo xíʼinyó: “Satá ña̱ nda̱a̱ ta va̱ása xi̱kóúnña” (Proverbios 23:23). Tá kíʼinyó kuenta ña̱ ndáyáʼviní ña̱ nda̱a̱ ña̱ va̱xi nu̱ú Biblia, chika̱a̱kayó ndee̱ ña̱ kaʼviyóña ni yáʼayó nu̱ú tu̱ndóʼo (kaʼvi Proverbios 2:4, 5).
3. ¿Ndáaña keʼé Jehová xa̱ʼún ña̱ va̱ʼa ndakundeéún kaʼviún Biblia?
Jehová kúú ta̱ i̱xava̱ʼa ndiʼi ña̱ʼa ta kúúmiíra ndiʼi ndee̱ ta kúúra migoún, ta xíni̱ va̱ʼara ndáa ki̱ʼva íyoún ta kúni̱ra chindeétáʼanra xíʼún ña̱ kunda̱a̱-iniún xa̱ʼa̱ra. Ndióxi̱ kivi taxira ndee̱ ndaʼún ña̱ va̱ʼa kuni̱ún keʼún iin ña̱ʼa, ta saátu ña̱ koo ndee̱ún ña̱ keʼúnña (kaʼvi Filipenses 2:13). Ña̱kán, tá xíniñúʼukaún ndee̱ ña̱ kaʼviún á ña̱ keʼún ña̱ sákuaʼún, chindeétáʼanvara xíʼún. Ta saátu tá xíniñúʼún ndee̱ ña̱ va̱ʼa ya̱ʼún nu̱ú tu̱ndóʼo á tá sásina nu̱ún ña̱ va̱ʼa sakuaʼún xa̱ʼa̱ra, taxivara ndee̱ ndaʼún. Kǒo sandákoún ka̱ʼún xíʼin Jehová ña̱ ná chindeétáʼanra xíʼún ña̱ kaʼviún Biblia (1 Tesalonicenses 5:17).
NÁ SAKUAʼAKAYÓ XA̱ʼA̱ÑA
Ná kotoyó ndáaña kivi keʼún ña̱ va̱ʼa chika̱a̱kaún ndee̱ ña̱ kaʼviún Biblia, ni sási inkana nu̱ún á ni íyoní chiñu nu̱ún. Ta saátu kotoyó ndáaña keʼé Jehová ña̱ chindeétáʼanra xíʼún ña̱ ndakundeékaún kaʼviún.
4. Ña̱ kaʼviún Biblia ná kundayáʼvika nu̱ún
Sava yichi̱ íyoní chiñu nu̱úyó, ta íxayo̱ʼvi̱ña xíʼinyó ña̱ taváyó tiempo ña̱ kaʼviyó Biblia. ¿Ndáaña kivi keʼún? Kaʼvindó Filipenses 1:10 ta ka̱ʼa̱nndó xa̱ʼa̱ ña̱yóʼo:
-
¿Ndáa ña̱ʼa kúú ña̱ ndáyáʼvika túviún?
-
¿Ndáaña kivi keʼún ña̱ va̱ʼa kundayáʼvika ña̱ káʼviún Biblia nu̱ún?
-
Tá ná sákutún iin ña̱ʼa xíʼin yu̱tí tasaá kuni̱ún taún yu̱u̱ ti̱xinña, ña̱ yu̱u̱ yóʼo va̱ása nani ki̱ʼviña.
-
Soo tá siʼna yu̱u̱ ná taún, naniva ke̱e ndiʼi yu̱tí. Ki̱ʼva saá, tá siʼna ña̱ʼa ña̱ ndáyáʼvi kéʼún kivi saxínún ndiʼi ña̱yóʼo, ta saátu kindo̱o tiempo nu̱ún ña̱ keʼún savaka ña̱ʼa.
Ña̱ káʼviyó Biblia chíndeéña miíyó ña̱ kuxini̱kayó Ndióxi̱ xíʼin ña̱ ndasakáʼnuyóra. Kaʼvindó Mateo 5:3 ta ka̱ʼa̱nndó xa̱ʼa̱ ña̱yóʼo:
-
Tá ná kundayáʼvika ña̱ káʼviyó Biblia nu̱úyó, ¿ndáaña va̱ʼa ndakiʼinyó?
5. Chika̱a̱ ndee̱ ni íyo inka na̱ sási nu̱ún
Sava yichi̱, savana kuni̱na ña̱ ná sandákoún kaʼviún ña̱ Biblia. Koto ndáaña ke̱ʼé ta̱ Francesco. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña ke̱ʼé na̱ veʼe ta̱ Francesco xíʼin na̱ migora tá ni̱ka̱ʼa̱nra xíʼinna ña̱ sákuaʼara xa̱ʼa̱ ña̱ nda̱a̱?
-
¿Nda̱chun iin ña̱ va̱ʼaní kúú ña̱ chi̱ka̱a̱ra ndee̱ ña̱ sa̱kuaʼara xa̱ʼa̱ Ndióxi̱?
Kaʼvindó 2 Timoteo 2:24, 25 ta ka̱ʼa̱nndó xa̱ʼa̱ ña̱yóʼo:
-
¿Ndáaña ndákanixi̱ní na̱ veʼún xíʼin na̱ migoún xa̱ʼa̱ ña̱ sákuaʼún?
-
Nda̱a̱ táki̱ʼva káchi ña̱ versículo yóʼo, ¿ndáaña keʼún tá iinna va̱ása taxina ña̱ sakuaʼún xa̱ʼa̱ Biblia? Ta, ¿nda̱chun?
6. Kandíxa ña̱ chindeétáʼan Jehová xíʼún
Tá va̱ʼaníka xáa̱yó kítáʼanyó xíʼin Ndióxi̱, kúni̱kayó sakúsi̱íyó-inira. Soo sava íxayo̱ʼvi̱ña xíʼinyó ña̱ nasamayó ki̱ʼva ña̱ íyoyó tasaá keʼéyó nda̱a̱ táki̱ʼva káʼa̱nra. Tá saá ndóʼún sava yichi̱, va̱ása ndakava-iniún chi chindeétáʼanva Jehová xíʼún. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱niyó nu̱ú video, ¿ndáa ña̱ʼa kúú ña̱ na̱sama ta̱ Jim ña̱ va̱ʼa keʼéra ña̱ káʼa̱n Jehová?
-
¿Ndáaña ke̱ʼéra kúú ña̱ ndákanda̱ka-iniún xíʼin?
Kaʼvindó Hebreos 11:6 ta ka̱ʼa̱nndó xa̱ʼa̱ ña̱yóʼo:
-
¿Ndáaña keʼé Jehová xa̱ʼa̱ ndiʼi na̱ chíka̱a̱ ndee̱ ña̱ kunda̱a̱-inina xa̱ʼa̱ra ta sakúsi̱ína-inira?
-
¿Ndáaña ndóʼo Jehová túviún tá xítora ña̱ chíka̱ún ndee̱ ña̱ sakuaʼún xa̱ʼa̱ Biblia?
ÑA̱ NDÁKA̱TU̱ʼUN SAVA NA̱ YIVÍ: “¿Ta yóʼó nda̱chun kúú ña̱ káʼviún Biblia?”.
-
¿Ndáaña ndakuiún?
ÑA̱ XA̱A̱ SA̱KUAʼAYÓ
Ni íxayo̱ʼvi̱ña xíʼún kaʼviún Biblia, soo chindeéña yóʼó ña̱ kusi̱í-iniún ndiʼi tiempo, tá kándíxaún Jehová taxira ña̱ va̱ʼa ndaʼún.
Ná ndakaʼányó xa̱ʼa̱ ña̱yóʼo
-
¿Nda̱chun ndáyáʼvi ña̱ nda̱a̱ ña̱ sánáʼa̱ ña̱ Biblia túviún?
-
Xa̱ʼa̱ ña̱ xa̱a̱ kúnda̱a̱-iniún ndáa ña̱ʼa kúú ña̱ ndáyáʼvika, ¿ndáaña xíniñúʼu keʼún?
-
¿Nda̱chun xíniñúʼu ka̱ʼún xíʼin Jehová ña̱ chindeétáʼanra xíʼún ña̱ chika̱a̱kaún ndee̱ ña̱ kaʼviún Biblia?
NANDUKÚKA XA̱ʼA̱ÑA
Sakuaʼa xa̱ʼa̱ ku̱mí ña̱ʼa ña̱ chi̱ndeétáʼan xíʼin ku̱a̱ʼání na̱ yiví ña̱ vií kuniñúʼuna tiempona.
“¿Ndáa ki̱ʼva vií kuniñúʼuyó tiempoyó?” (¡Despertad!, tí febrero ku̱i̱ya̱ 2014)
Iin ñá ñaʼá xi̱kuni̱ñá sakúsi̱íñá-ini Ndióxi̱, soo yiíñá kǒo níxi̱kunda̱a̱-inira nda̱chun xi̱keʼéñá ña̱yóʼo. Koto ndáa ki̱ʼva chi̱ndeétáʼan Jehová xíʼinñá.
Jehová táxira ndee̱ ndaʼa̱yó ña̱ va̱ʼa kundeé-iniyó xíʼin tu̱ndóʼo ña̱ ndóʼoyó (5:05)
Koto ndáa ki̱ʼva chi̱ndeétáʼan iin ñá ñaʼá xíʼin yiíñá xa̱ʼa̱ ña̱ chi̱ka̱a̱níñá ndee̱ ña̱ kandíxañá Ndióxi̱.
Sava yichi̱ chíka̱a̱na ku̱a̱chi na̱ testigo Jehová ña̱ ndátáʼvína na̱ veʼena. Soo, ¿á ña̱ ndixa kúú ña̱yóʼo?
“¿Á táʼví na̱ testigo Jehová na̱ familia?” (Artículo ña̱ va̱xi nu̱ú jw.org)
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
