Mandangɔ Ngbangɔ ndo hɛ̃ anzɔ̃ lo, kanda ta lingɔ ni ndo du woni ma. Ngoi mɛndɛ̃ mɔ lengbi ti hũndangɔ tɛrɛ mɔ ya, mbi na ngbãngɔ lá kwɛ mandangɔ Ngbangɔ? Nda mɛ ayɔ ya ta e zia mandangɔ Ngbangɔ ma nɛ? Ye mɛ na zangɔ mɔ ya ta mɔ zia mandangɔ Ngbangɔ ma abɛse du ya, mɔ ndo tengbi na akpengba lo nɛ?

1. Nda mɛ mandangɔ Ngbangɔ du ngbondoni nɛ?

“Tɛnɛ tɛ Nzapa na [dungɔ lɛ ngɛ̃́] nga na ngunu.” (Aebreo 4:12) Ngbangɔ du ngbondoni na lo mɛ ya, ni ndo fa dangɔ bɛ tɛ Nzapa nga na se mɛ lo ndo ma na tɛrɛ lo na lo tɛ mɔ. Ni na zangɔ mɔ ya mɔ ti na kɔdɛ, ndara nga na nzɔ̃ dangɔ bɛ. Omɛ ngbondoni adu ya, Ngbangɔ na zangɔ mɔ ya mɔ ti kwa Yehova. Na ngoi mɛ mɔ ndo manda ni ko, afa ya mɔ ndo zi lége hɛ̃ ngunu mɛ Ngbangɔ na ni ya agbinyangbi dungɔ lɛ ngɛ̃́ tɛ mɔ.

2. Nda mɛ adu nzɔ̃ni hũngɔ awangɔ ti ya Ngbangɔ ya adu ngbondoni nɛ?

Tɛnɛ mɛ kaya Ngbangɔ adu ngbondoni nvɛ̃ni. Ba nda mɛ Ngbangɔ ndo sa ngunu bɛ e ya: “Vɔ̃ mbilimbili wa ta mɔ tɛkɛ ni ma” la. (Masese 23:23) Se e hũ ya wangɔ ti ya Ngbangɔ ndo du ngbondoni nvɛ̃ni ko, ta e na ziangɔ mandangɔ ni ma abɛse du ya e ndo tengbi na kpengba lo.​—Di Masese 2:4, 5.

3. Ngasia la Yehova lengbi ti zangɔ mɔ ya ta mɔ zia mandangɔ Ngbangɔ ma nɛ?

Yehova mɛ Nvɛ̃ ngunu zu, Wa lingɔ ye zu nga Kwa mɔ ko, lo na gwɛ̃ ti zangɔ mɔ ya mɔ hĩnga alo mɛ ba lo. Lo lengbi ti lingɔ ya mɔ “ye aye mɛ bɛ ni ndo de na lo ni, ko [mɔ] li nga aye ni ko.” (Di Filipɛ 2:13.) Na lo ni la, se du ya mɔ na gwɛ̃ ya aza mɔ, mɔ ngbã lá kwɛ mandangɔ nga na kpãngɔ na kwa aye mɛ mɔ ndo manda ko, lo na zangɔ mɔ. Se mɔ du na gwɛ̃ ti ngunu ti nɛngɔ ya mɔ nwɔ̃ na tara bere kpengba kpale ko, lo lengbi ti zangɔ mɔ. Li sambela hɛ̃ Yehova ngoi zu ya lo za mɔ, mɔ ngbã lá kwɛ mandangɔ Ngbangɔ.​—1 Tɛsalionikɛ 5:17.

 GI HĨNGANGƆ LO MƐNDƐ̃

4. Kpã mandangɔ Ngbangɔ tɛ mɔ na ndo ti uzu

Na ya angoi mɛndɛ̃, e ndo du na akpale gba ti lingɔ ni, ni lengbi ti lingɔ ya e zanga ngoi ti mandangɔ na Ngbangɔ. Wa ye mɛ za mɔ nɛ? Di Filipɛ 1:10, wa na pɛni hɛ̃ gbinya ti ahũnda olo mɛ:

• Se du mɔ, ye mɛ mɔ ndo hũ ya adu “ngbondoni” na ya dungɔ lɛ ngɛ̃́ tɛ mɔ nɛ?

• Ngasia la mɔ lengbi ti kpãngɔ mandangɔ Ngbangɔ tɛ mɔ na ndo ti uzu na ya dungɔ lɛ ngɛ̃́ tɛ mɔ nɛ?

1. Se mɔ sa butu na ya katinɛ uzu, wa mɔ dɔngɔ atɛ́nɛ́ ndoni ko, atɛ́nɛ́ mɛndɛ̃ na zangangɔ ndo

2. Se mɔ dɔngɔ tɛ́nɛ́ uzu wa mɔ sa butu ndoni ko, butu zu na luangɔ ndo. Kwɛ kɔi, se mɔ kpã ye mɛ du “ngbondoni nvɛ̃ni” na ndo ti uzu na ya dungɔ lɛ ngɛ̃́ tɛ mɔ ko, mɔ na luangɔ ngoi ti lingɔ ni, wa mɔ nga na luangɔ ngoi ti lingɔ na aye mɛndɛ̃

Mandangɔ Ngbangɔ ndo kokisa gwɛ̃ tɛ e ti nyingɔ, afa ya gwɛ̃ mɛ e ndo du na ni ti hĩngangɔ nga na ti vɔrɔngɔ Nzapa. Di Matie 5:3, wa na pɛni hɛ̃ gbinya ti hũnda olo mɛ:

• Anzɔ̃ lo mɛ elengbi ti luangɔ se du ya e kpã mandangɔ Ngbangɔ na ndo ti uzu na ya dungɔ lɛ ngɛ̃́ tɛ e nɛ?

 5. Ta mɔ zia mandangɔ Ngbangɔ ma, abɛse ndo temela mɔ

6. Kpã bɛ mɔ ya Yehova na zangɔ mɔ

 NA NDUNU NI

Abɛse du ya ta mandangɔ Ngbangɔ ndo du woni ma ko, ni lengbi ti zangɔ mɔ ya mɔ sepala na dungɔ lɛ ngɛ̃́ ti bwai na bwai. Ni ndo yɔ dungɔ na ge ge ge, kanda se mɔ kpã bɛ mɔ ndo Yehova ko, lo na zangɔ mɔ.

Bozongeli

• Nda mɛ bɛta tɛnɛ ti ya Ngbangɔ du ngbondoni na lo tɛ mɔ nɛ?

• Ngasia la mɔ lengbi ti hĩngangɔ ye mɛ “du ngbondoni nvɛ̃ni” na ya dungɔ lɛ ngɛ̃́ tɛ mɔ nɛ?

• Nda mɛ ayɔ ya mɔ yɔ ka ti Yehova ya lo za mɔ ti nɛngɔ ya ta mɔ zia mandangɔ Ngbangɔ ma nɛ?