MWAHA 12
Tiheeni Enahaala Wookhaviheryaani Otitelela Omuhuserya Piipiliya?
Omuhuserya Piipiliya onnaruuha mphurelo wawaaca, nyenya tahi wi wiiliwiili eyo ti yookhweya. Ophiyerya wi ikwaha ikina munahaala wuupuwelaka waakhanle wi munanwerya otitelela omuhuserya Piipiliya. Ntakhara heeni munnaphwanela wiilipiserya otitelela? Tiheeni eni yookhaviheryeeni ovilela moohipwacha makacamiho?
1. Ntakhara heeni omuhuserya Piipiliya echu yasisapo?
“Masu a Muluku tookumi ni oowerya.” (Ahebri 4:12) Piipiliya ookhalano esisapo woona wi annaloca miyuupuwelo ni miyoonelo sa Muluku ntakhara nyuwo. Owo onamookhaviheryaani ohiya pahiru okhalano masuwelelo nyenya tho okhalano miruku seeparipari ni ewehereryo. Echu yoochuneyaxa, Piipiliya onamookhaviheryaani okhala nthamwene a Yehova. Vaavaa munamuhuseryaanyu Piipiliya, munneeriha wi owerya wa Piipiliya ovolowele okumi anyu.
2. Ntakhara heeni ti woochuneya osuwela esisapo ya eparipari ya Piipiliya?
Iparipari sa Mpiipiliyani inalikana ni muhakhu wasisapo. Ti nthowa nene Piipiliya onanceenyeryeiye ariki “othume eparipari, ohitumihe.” (Masiposipo 23:23) Vaavaa nnuupuwelaahu esisapo ya eparipari ya Piipiliya, ninniilipiserya otitelela ohuserya—naamwi nihoolelaka makacamiho.—Mwaalakhanye Masiposipo 2:4, 5.
3. Yehova oni ookhaviheryeeni hai otitelela ohuserya?
Yehova, Mpatusa a ikuru soothene ni Nthamwene anyu, onnachuna wookhaviheryaani ohuserya vooloca sa yoowo. Owo onanwerya woovahaani “nyuwo okhwela ni werano wene.” (Mwaalakhanye Filipi 2:13, NN.) Mwawiihiiha, wakhala wi mu ikwaha ikina munnachuna nceenyeryo nawaaceererya wi muhuserye naari opharihela yeeyo muhusenryaanyu, owo onamookhaviheryaani. Wakhala wi munnachuna ikuru sawaaceererya wi mvoothe nikacamiho naari wiica, owo onanwerya woovahaani seiho. Muhihiyererye omveka Yehova mu mavekelo wi ookhaviheryeeni otitelela omuhuserya Piipiliya.—1 Tesalónika 5:17.
OHUSERYA MWAWIISEELA
Muhuserye mukhalelo muneeraanyu mutitelele omuhuserya Piipiliya moohipwacha oweiwa ni miteko naari wiica wa akina. Voocharela muthokororye mukhalelo Yehova onahaaleiye wookhaviheryaani otitelela ohuserya.
4. Mweerihe yoohuserya anyu ya Piipiliya okhala yookhweleya
Ikwaha ikina nnamukhala ooweiwa onakhala wi hinaano elukuluku wi nimuhuserye Piipiliya. Tiheeni eni enikhaviherye? Mwaalakhanye Filipi 1:10 BNM, nave muthokororye makoho ala:
-
Echu taani munoonaanyu okhala “yaphama” mookumini?
-
Muni mweerihe hai yoohuserya anyu ya Piipiliya okhala yookhweleyaxa?
-
Wakhala wi moosareiha epalti ni ehaava nave mweererya ohelamo maluku, awo heni yaakhwanemo
-
Wakhala wi mpacenrye ohelamo maluku, onamukhalamo mpuro wa ohelemo ehaava. Moolikana, wakhala wi mookuha ‘eri yaphama’ mmakupa oopacerya mookumini mwanyu, munahaala owerya waakhwaniherya yeeyo nave nlelo mukhaleno elukuluku wi mpake ichu ikina
Omuhuserya Piipiliya onnaakwaaniherya soothowa sahu soomunepani—nchuno nahu na omusuwela ni omulapela Muluku. Mwaalakhanye Mateu 5:3, nave voocharela muthokororye nikoho nla:
-
Nnaphura hai vaavaa nneerihaahu yoohuserya ya Piipiliya okhala yookhweleyaxa?
5. Ovilela mu elukuluku ya wiiciwa
Mu ilukuluku ikina, achu anamweererya wooceecheihani wi muhiye omuhuserya Piipiliya. Moone yootakiherya ya Francesco. Moone EXILEMA, nave voocharela muthokororye makoho anacharela.
-
Mu exilema, ti mwawiihai asinthamwene ni amusi a Francesco yaakhulenlaaya vaavaa owo aaleenleiye yeeyo aahuseryeiye?
-
Mphurelo taani aakhenleiye nthowa na ovilela?
Mwaalakhanye 2 Timóteo 2:24, 25, nave voocharela muthokororye makoho ala:
-
Amusi ni asinthamwene anyu anoona hai vooloca sa yeeyo munahuseryaanyu?
-
Mwawiiwanana ni iversikulu seiya, tiheeni munaphwanelaanyu weera wakhala wi muchu mukina hanasiveliwa ni yoohuserya anyu ya Piipiliya? Ntakhara heeni?
6. Mmuroromele Yehova wi ookhaviheryeeni
Elukuluku nnamwaacamelaahu Yehova, nchuno nahu na omuhakalaliha ninnaaceereryeya. Naamwi hiiha, onamukhala woovila wa hiyo opaka matorokelo mookumini mwahu wi niweryeke weecaka mu iphiro sawe. Waakhanle wi muniisoona mmukhalelo yoola muhiceecheye. Yehova onahaala wookhaviheryaani. Moone EXILEMA, nave voocharela muthokororye makoho anacharela.
-
Mu exilema, matorokelo taani Jim aapankeiye wi amuhakalalihe Yehova?
-
Tiheeni yootikhininheeni vooloca sa yaweereya awe?
Mwaalakhanye Ahebri 11:6, nave voocharela muthokororye makoho ala:
-
Tiheeni Yehova onahaaleiye opaka wa yaale “anamwaacamela”—ela tiwi, yaale aniilipiserya omusuwela ni omuhakalaliha?
-
Ela enooleelaani eheeni vooloca sa mukhalelo Yehova onooneiye wiilipiserya wanyu omuhuserya Piipiliya?
ACHU AKINA ANI: “Ntakhara heeni munamuhuseryaanyu Piipiliya?”
-
Mwaahaala waakhula hai?
MUKWASU
Naamwi ohiri wookhweya, omuhuserya Piipiliya enahaala wookhaviheryaani opuha okumi okhala wookhala. Mutitelele omuroromela Yehova, nave owo onahaala woochuwelaani.
Makoho awuuluulela
-
Ntakhara heeni iparipari sa Mpiipiliyani iryaaya soochuneya wa nyuwo?
-
Muni nwerye hai “othalela eri yaphama”?
-
Ntakhara heeni munnaphwanela omveka Yehova wi ookhaviheryeeni otitelela omuhuserya Piipiliya?
OTHOLATHOLA
Muthokororye meerelo maxexe yaakhavihenrye achu ancipale opharihela elukuluku aya mwa miruku.
“Como aproveitar bem seu tempo” (Despertai!, fevereiro de 2014)
Moone mukhalelo Yehova aamukhavihenryeiye muthiyana mmoha vaavaa iyawe ahiiwexexeiye wiilipixerya aapakeiye wi amuhakalalihe Muluku.
Moone mukhalelo mulopwana mmoha aaphunreiye orweela wa ovilela wa mwaariye.
Anamoona a Yehova ikwaha ikina annootheryiwa wi awo annamwarya imusi. Apwanne ela eparipari?
“As Testemunhas de Jeová dividem ou unem as famílias?” (Artigo do jw.org)
