EISHOMO 12
Niki Ekiraakuhwere Kugumizamu Nooyega Baibuli?
Okwega Baibuli ti rugyendo rworobi, kwonka ebirikurugamu ni birungi munonga. Obumwe noobaasa kwebuuza yaaba noija kugumizamu nooyega Baibuli. Ahabw’enki oine kuteeraho kugumizamu nooyega? Niki ekirikubaasa kukuhwera kugumizamu nooyega n’obu kiraabe kitoorobi?
1. Ahabw’enki okwega Baibuli n’eky’omuhendo?
“Ekigambo kya Ruhanga kiine amagara n’amaani.” (Abaheburaayo 4:12) Baibuli n’ey’omuhendo ahakuba erimu ebiteekateeko bya Ruhanga n’enyehurira ezi akwiniire. Neekuhwera kutunga okumanya n’obwengye obuhikire n’amatsiko. Ekikuru munonga, Baibuli neekuhwera kuba munywani wa Yehova. Waayega Baibuli, neekuhwera kuhindurira kimwe embeera zaawe.
2. Ahabw’enki ni kikuru kumanya omugasho gw’amazima ga Baibuli?
Amazima ga Baibuli gari nk’ebintu by’omuhendo. Niyo nshonga ahabw’enki Baibuli neetuhiga ‘kugura amazima, kwonka tutagatunda.’ (Enfumu 23:23) Twaguma nitwijuka ngu amazima n’ag’omuhendo, nitukora n’amaani kugumizamu nitwega n’obu haakuba hariho ebirikwenda kuturemesa.—Shoma Enfumu 2:4, 5.
3. Yehova naabaasa kukuhwera ata kugumizamu nooyega?
Yehova ow’Obushoboorozi Bwona, Omuhangi, kandi Munywani waawe, naayenda kukuhwera kwega ebirikumukwataho. Naabaasa kukuha ekyetengo n’amaani g’okukora. (Shoma Abafilipi 2:13.) N’ahabw’ekyo, waaba nooyenda kugira ekihika ky’okwega nari kugyendera aha bi orikwega, naabaasa kukuhwera. Waaba nooyenda kutunga amaani g’okusingura oburemeezi nari okuhakanisibwa, naabaasa kugakuha. Butoosha guma nooshaba Yehova kukuhwera kugumizamu nooyega Baibuli.—1 Abatesalonika 5:17.
SHWIJUMA GYE
Manya oku orikubaasa kugumizamu nooyega Baibuli n’obu waakuba nookora munonga nari noohakanisibwa abandi. Kandi reeba n’oku Yehova araakuhwere kugumizamu nooyega.
4. Okwega Baibuli kutware nka kikuru
Obumwe nitukora munonga kiguma kutunga obwire burikumara obw’okwega Baibuli. Niki ekirikubaasa kuhwera? Shoma Abafilipi 1:10, kubaasa kugarukamu ebibuuzo ebi:
-
Noogira ngu ni bintu ki “ebirikukira” obukuru?
-
Noobaasa kutwara ota okwega Baibuli nka kikuru?
-
Ebaketi waagijuzamu omusheenyi reero bwanyima okatamu amabaare, tigarikuhikamu
-
Kwonka waabanza kutamu amabaare, omusheenyi nigutunga ah’okuza. Nikyo kimwe, waata “ebirikukira” obukuru omu mwanya gw’okubanza, noobikora obiheza kandi otunga n’obwire bw’okukora ebitari bikuru
Okwega Baibuli nikwigutsa ekyetengo kyaitu eky’eby’omwoyo, ekirikumanyisa okwenda kumanya Ruhanga n’okumuramya. Shoma Matayo 4:4, kubaasa kugarukamu ekibuuzo eki:
-
Nitugasirwa tuta twatwara okwega Baibuli nka kikuru?
5. Otahanika waaba noohiiganisibwa
Abantu abamwe nibabaasa kuteeraho kukutamisa okwega Baibuli. Yetegyereze ekyahikire ahari Francesco. Zaana VIDIYO, kubaasa kugarukamu ebibuuzo ebirikukurataho.
-
Omu vidiyo egi, banywani ba Francesco n’ab’eka ye bakatwaza bata ku yaabagambiire aha bi yaabaire naayega?
-
Akatunga birungi ki ahabw’okutahanika?
Shoma 2 Timoseo 2:24, 25, kubaasa kugarukamu ebibuuzo ebi:
-
Ab’eka yaawe na banywani baawe nibatwara bata ebi orikwega?
-
Kurugiirira aha mishororongo egi, oine kutwaza ota omuntu yaaguubwa kubi ahabw’okugira ngu nooyega Baibuli? Ahabw’enki?
6. Yesigye Yehova kukuhwera
Twaguma nitwirira haihi na Yehova, nitwongyera kwenda kumushemeza. Kwonka nabwo, nitubaasa kugumirwa kukora empindahinduka eziraatuhwere kugyendera aha mitindo ye. Waahurira otyo, otahanika. Yehova naija kukuhwera. Zaana VIDIYO, kubaasa kugarukamu ebibuuzo ebirikukurataho.
-
Omu vidiyo egi, Jim akakora mpinduka ki kubaasa kushemeza Yehova?
-
Niki ekirikukushemeza aha ky’okureeberaho kye?
Shoma Abaheburaayo 11:6, kubaasa kugarukamu ebibuuzo ebi:
-
Yehova naija kukorera ki abarikutaho omutima kumusherura, abarikuteeraho munonga kumumanya n’okumushemeza?
-
Noogira ngu Yehova naayehurira ata yaareeba nooteeraho kwega Baibuli?
OMUNTU NAABAASA KUBUUZA ATI: “Ahabw’enki nooyega Baibuli?”
-
Noobaasa kumugarukamu ota?
OMU BUGUFU
N’obu kiraabe kitoorobi butoosha, okwega Baibuli nikubaasa kukuhwera kwesiimira amagara ebiro byona. Gumizamu nooyesiga Yehova, kandi naija kukushumbuusha.
Okweijutsya
-
Ahabw’enki amazima ga Baibuli n’ag’omuhendo ahariiwe?
-
Noobaasa kumanya ota “ebirikukira” obukuru?
-
Ahabw’enki oine kushaba Yehova kukuhwera kugumizamu nooyega Baibuli?
JUMBURA EBINDI
Yetegyereze emiringo emwe ehwereire abantu baingi kukoresa gye obwire bwabo.
“Oku Orikubaasa Kukoresa Gye Obwire Bwawe” (Awake!, Febwari 2014)
Yetegyereze oku Yehova yaahweraire omukazi omwe ou iba yaabaire atarikwetegyereza okuteeraho kwe kushemeza Ruhanga.
Reeba oku omushaija omwe yaagasiirwe ahabw’omukazi we kutahanika.
Abantu obumwe nibagira ngu Abajurizi ba Yehova nibashenya amaka. Kwonka shi ekyo kihikire?
“Abajurizi ba Yehova shi Nibashenya Amaka Nari Nibagombeka?” (Eky’aha mukura)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
