Sɔ̄ o nɔ Baibol le doodoo sɔ̄ o si kiā a dɔbiī. Kerewo, kiā a le doo wo naa wee aadee waɛ. Pio sɔ̄ o dap kɛɛrɛ sɛh ewaɛge a bah ekiisī loo nɔ Baibol naa e. E na anua ɛrɛgeba epiaga o doo lo ekiisī naa pe a? E na edap a yerebah nɛ kɔ o kiisī kaɛlɛɛ kɔ a aga a?

1. E na anua nɔ Baibol lu nu a kuī a?

“Ue Bari le dum sa si e’aga tam.” (Pya Hibru 4:12) Baibol dɔbiī nyɔɔbee a muuna nu alu ekɛɛrɛ Bari a kumaloo. A yerenage bah doo kɔ o ɛrɛ buābee, gbaāloo kaāna suānu le bɛābu. Lo a kuī eera na bee, Baibol yerebah a nɛ kɔ o yii gbo Jɛhova. Sɔ̄ o nɔ Baibol, o lɛɛbaloo kɔ ekpo a le bu a nyaana o sīdee tɔɔ̄dum.

2. E na anua alu ebɛɛ̄ lo eyere nukuādɛɛ̄ loo kɛ̄ kaka ue a le bu Baibol kuī doo a?

Kaka ue a le bu Baibol le doodoo zɔ a si gbɛnɛ du. Nu anua lo Baibol yere i mɛm loo kɔ “yaɛ kaka ue, o aa ye oo.” (Kam 23:23) Sɔ̄ i su kɛ̄ kaka ue Baibol kuī doo seea nyiɛ, edoo kɔ i piiga lo enɔ kumasī, kere sɔ̄ i kpesī nu ebee i dap ɔbɛ.—Buū Kam 2:4, 5.

3. Bu mɛ sīdee na Jɛhova a dap yerebah nɛ kɔ o kiisī loo o enɔānu a?

Doodoo o Nɛɛ Dɛmnu a eenyɔɔ dɛ̄dɛɛ̄ nu le o Gbo, Jɛhova gbī kɔ o nɔ nu a ye kiiloo. A dap doo kɔ o ɛrɛ ‘taɛ le ekpo esu daā.’ (Buū Pya Filipai 2:13.) Nyɔɔwo, lo o gbī yerekpotɛ̄ le taɛ esu nɔānu le lo esu nu o nɔ yere bu dogo, a dap a yerebah nɛ. Lo mɛm bɛɛ̄ a lo ebeā eebah gbanasī, Jɛhova enɛ a. Yere kara bara Jɛhova aā ziī sɔ̄ yii ziī kɔ a yerebah a nɛ lo ekiisī bu nɔ Baibol.—1 Pya Tɛsalɔnaika 5:17.

 NƆ YERELOO

4. Su o enɔānu Baibol nua nu a a kuī loo

Pio sɔ̄ i dap kɛɛrɛ kɔ nu edoo ee i loo bah sa ii ɛrɛ sɔ̄ esu nɔā Baibol. E na edap i yerebah nɛ a? Buū Pya Filipai 1:10, lɛɛ o agara pya ebip ama:

• E na o kɛɛrɛ kɔ alu pio “nu a lee kaāna” bu dum a?

• Bu mɛ sīdee na o dap doo kɔ o enɔānu Baibol a kuī a loo a?

1. Lo o su esaā yere bu bɔkɛt sa nɔɔ ekpodɛm bu, lo dɛm naale eyii bu leere

2. Lo o dasī nɔɔ ekpodɛm bu lo bɔkɛt, lɛɛ o tɔ̄ esaā bu, o muɛ kɔ o esaā eyii bu. Bu aba lo sīdee, lo o su “pya nu a lee kaāna” nua tuatua bu o dum, o doo dɛ̄dɛɛ̄ ɛɛ sa ɛrɛnage sɔ̄ edaā pya dɔɔ̄na nu

Nɔ Baibol mmɛnɛ i ebɛɛ̄ bu edɔɔ̄, lo a le ebɛɛ̄ i ɛrɛ lo esuā loo Bari sa ye taāŋabah. Buū Matiu 5:3, lɛɛ o agara ebip ama:

• Sɔ̄ i su nɔ Baibol nua gbɛnɛ dɔbiī i nɛ doodoo wa?

 5. Kiisī sɔ̄ o kpesī gbanasī

6. Dɛɛa nyɔɔ Jɛhova kɔ a yerebah a nɛ

 TƐƐ̄NYƆƆ

Nɔ Baibol naa aadee waɛ, mɛ lo o kiisī lo enɔ, a dap a yerebah nɛ kɔ o ɛrɛ ekpeloo dum mmɛ deedee. Kiisī lo edɛɛa nyɔɔ Jɛhova, e a enɛ a ekpɛanu.

Ebip Tɛ̄ma Nyɔɔ

• E na anua pya kaka ue a le bu Baibol kuī a loo a?

• Mɛ sīdee na o dap “doā-ɛp nu a lee kaāna” a?

• E na anua o bara Jɛhova kɔ a yerebah a nɛ lo ekiisī bu nɔ Baibol a?