ବାଇବଲ ଶିଖିଲେ ବହୁତ ଲାଭ ହୁଏ । କିନ୍ତୁ ବେଳେ ବେଳେ ଏହା କରିବା ସହଜ ହୋଇ ନ ଥାଏ । ହୁଏତ ଆପଣଙ୍କ ମନରେ ଏପରି ପ୍ରଶ୍ନ ଆସିପାରେ, ‘କʼଣ ମୁଁ ବାଇବଲ ଶିଖିବା ଜାରି ରଖିପାରିବି ?’ ଏହି ପାଠରେ ଆମେ ଦେଖିବା ଯେ ବାଇବଲ ଶିଖିବା ଜାରି ରଖିଲେ ଆମକୁ କʼଣ କʼଣ ଲାଭ ହେବ ଏବଂ ସମସ୍ୟା ଆସିଲେ ମଧ୍ୟ ଆମେ କିପରି ଶିଖିବା ଜାରି ରଖିପାରିବା ।

୧. ବାଇବଲ ଶିଖିବା ଜାରି ରଖିଲେ ଆପଣଙ୍କୁ କʼଣ ଲାଭ ହେବ ?

‘ଈଶ୍ୱରଙ୍କ ବାକ୍ୟ ଜୀବନ୍ତ ଓ କାର୍ଯ୍ୟ-ସାଧକ ଅଟେ ।’ (ଏବ୍ରୀ ୪:୧୨) ବାଇବଲ ପଢ଼ିବା ଦ୍ୱାରା ଆମେ ଜାଣିପାରୁ ଯେ ଯିହୋବା ଆମ ବିଷୟରେ କʼଣ ଭାବନ୍ତି, ଆମେ ଅନେକ ବିଷୟ ଶିଖିପାରୁ ଏବଂ ଜୀବନରେ ସଠିକ୍‌ ନିଷ୍ପତ୍ତି ନେଇପାରୁ । ତାʼସହ ଆମକୁ ଭବିଷ୍ୟତ ପାଇଁ ଏକ ଆଶା ମଧ୍ୟ ମିଳେ । କେବଳ ଏତିକି ନୁହେଁ, ବାଇବଲ ପଢ଼ିବା ଦ୍ୱାରା ଆମେ ଯିହୋବାଙ୍କ ସାଙ୍ଗ ହୋଇପାରିବା । ବାଇବଲରେ ଏତେ ଶକ୍ତି ଅଛି ଯେ ଏହା ଆମ ଜୀବନ ବଦଳାଇ ଦେଇପାରେ । କିନ୍ତୁ ଏସବୁ ଲାଭ ପାଇବା ପାଇଁ ଆପଣଙ୍କୁ ବାଇବଲ ଶିଖିବା ଜାରି ରଖିବାକୁ ପଡ଼ିବ ।

୨. ବାଇବଲର ସତ୍ୟଗୁଡ଼ିକୁ ବହୁମୂଲ୍ୟ ମନେ କଲେ ଆମେ କʼଣ କରିବା ନାହିଁ ?

ବାଇବଲରେ ଲେଖାଥିବା ସତ୍ୟଗୁଡ଼ିକ ବହୁମୂଲ୍ୟ ରତ୍ନ ଭଳି ଅଟେ । ତେଣୁ ବାଇବଲରେ ଲେଖାଅଛି, “ସତ୍ୟତା କିଣ, ପୁଣି ତାହା ବିକ ନାହିଁ ।” (ହିତୋପଦେଶ ୨୩:୨୩) ଯଦି ଆମେ ବାଇବଲର ସତ୍ୟଗୁଡ଼ିକୁ ବହୁମୂଲ୍ୟ ମନେ କରିବା, ତାହେଲେ ଆମ ଉପରେ ଯେତେ ସମସ୍ୟା ଆସିଲେ ବି ଆମେ ଶିଖିବା ବନ୍ଦ କରିବା ନାହିଁ ।—ହିତୋପଦେଶ ୨:୪, ୫ ପଢ଼ନ୍ତୁ ।

୩. ବାଇବଲ ଶିଖିବା ଜାରି ରଖିବା ପାଇଁ ଯିହୋବା ଆପଣଙ୍କୁ କିପରି ସାହାଯ୍ୟ କରିପାରିବେ ?

ଏହି ବିଶ୍ୱର ମାଲିକ, ଆପଣଙ୍କ ସାଙ୍ଗ ଯିହୋବା ଚାହାନ୍ତି ଯେ ଆପଣ ତାଙ୍କ ବିଷୟରେ ଶିଖିବା ଜାରି ରଖନ୍ତୁ ଏବଂ ଏପରି କରିବା ପାଇଁ ସେ ଆପଣଙ୍କୁ ନିଶ୍ଚୟ ସାହାଯ୍ୟ କରିବେ । ସେ ଆପଣଙ୍କୁ ବାଇବଲ ଶିଖିବା ପାଇଁ ‘ଇଚ୍ଛା ଓ ତାହା ସାଧନ କରିବାକୁ’ ଶକ୍ତି ଦେବେ । (ଫିଲିପ୍‌ପୀୟ ୨:୧୩ ପଢ଼ନ୍ତୁ ।) ଯଦି ଆପଣଙ୍କୁ ବାଇବଲ ଶିଖିବା କିମ୍ବା ସେଥିରେ ଥିବା କଥାକୁ ଲାଗୁ କରିବା ପାଇଁ ଇଚ୍ଛା ନ ହୁଏ, ତାହେଲେ ଯିହୋବା ଆପଣଙ୍କ ଭିତରେ ଇଚ୍ଛା ବଢ଼ାଇପାରିବେ । ଆଉ, ଯେତେବେଳେ ଆପଣଙ୍କ ପରିବାର, ସମ୍ପର୍କୀୟ କିମ୍ବା ସାଙ୍ଗମାନେ ଆପଣଙ୍କ ଉପରେ ବାଇବଲ ଶିଖିବା ବନ୍ଦ କରିବା ପାଇଁ ଚାପ ପକାଇବେ, ସେତେବେଳେ ସେ ଆପଣଙ୍କର ସାହସ ବଢ଼ାଇବେ । ତେଣୁ ବାଇବଲ ଶିଖିବା ଜାରି ରଖିବା ପାଇଁ ଯିହୋବାଙ୍କୁ ପ୍ରାର୍ଥନା କରନ୍ତୁ ।—୧ ଥେସଲନୀକୀୟ ୫:୧୭.

 ଭାବନ୍ତୁ ଓ ଶିଖନ୍ତୁ

୪. ନିଜ କାମରୁ ଦେଖାନ୍ତୁ ଯେ ବାଇବଲ ଶିଖିବା ଆପଣଙ୍କ ପାଇଁ ମହତ୍ତ୍ୱ ରଖେ

ବେଳେ ବେଳେ ଜୀବନରେ ଆମେ ଏତେ ବ୍ୟସ୍ତ ଥାଉ ଯେ ଆମକୁ ଲାଗେ ଆମ ପାଖରେ ବାଇବଲ ଶିଖିବା ପାଇଁ ସମୟ ହିଁ ନାହିଁ । ଏପରି ସମୟରେ ଆମେ କେଉଁ କଥା ଧ୍ୟାନରେ ରଖିବା ଉଚିତ୍‌ ? ଫିଲିପ୍‌ପୀୟ ୧:୧୦ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନଗୁଡ଼ିକ ଉପରେ ଆଲୋଚନା କରନ୍ତୁ:

• ଆପଣ କʼଣ ଭାବନ୍ତି, “ଉତ୍କୃଷ୍ଟ ବିଷୟଗୁଡ଼ିକ” ବା ଅଧିକ ମହତ୍ତ୍ୱ ରଖୁଥିବା ବିଷୟଗୁଡ଼ିକ କʼଣ ?

• ଆପଣ କିପରି ଦେଖାଇପାରିବେ ଯେ ବାଇବଲ ଶିଖିବା ଆପଣଙ୍କ ପାଇଁ ଅଧିକ ମହତ୍ତ୍ୱ ରଖେ ?

1. ୧. ଯଦି ଆପଣ ଗୋଟିଏ ବାଲଟିରେ ପ୍ରଥମେ ବାଲି ଭରିବେ ଏବଂ ତାʼପରେ ପଥର, ତାହେଲେ ଆପଣ ସେଥିରେ ସବୁ ପଥର ପୂରାଇପାରିବେ ନାହିଁ

2. ୨. ଯଦି ଆପଣ ପ୍ରଥମେ ପଥର ପୂରାଇବେ, ତାହେଲେ ଆପଣ ସେଥିରେ ଅଧିକ ବାଲି ଭରିପାରିବେ । ଠିକ୍‌ ସେହିପରି, ଯଦି ଆପଣ ଅଧିକ ମହତ୍ତ୍ୱ ରଖୁଥିବା କାମକୁ ପ୍ରଥମେ କରିବେ, ତାହେଲେ ଆପଣ ସେଗୁଡ଼ିକୁ ଭଲ ଭାବେ କରିପାରିବେ ଏବଂ ଅନ୍ୟ କାମଗୁଡ଼ିକ ପାଇଁ ମଧ୍ୟ ସମୟ ବାହାର କରିପାରିବେ

ଈଶ୍ୱରଙ୍କୁ ଜାଣିବା ଏବଂ ତାଙ୍କ ଉପାସନା କରିବା ଆମ ମଣିଷମାନଙ୍କ ପାଇଁ ବହୁତ ଜରୁରୀ, ଆଉ ବାଇବଲ ପଢ଼ି ଆମେ ଏହି ଆବଶ୍ୟକତାକୁ ପୂରଣ କରିପାରିବା । ମାଥିଉ ୪:୪ ପଢ଼ନ୍ତୁ, ତାʼପରେ ଆଗକୁ ଦିଆଯାଇଥିବା ପ୍ରଶ୍ନ ଉପରେ ଆଲୋଚନା କରନ୍ତୁ:

• ବାଇବଲ ଶିଖିବା ବହୁତ ଜରୁରୀ । ଏହାକୁ ମହତ୍ତ୍ୱ ଦେଲେ ଆମକୁ କʼଣ ଲାଭ ହେବ ?

 ୫. ବିରୋଧ ସତ୍ତ୍ୱେ ହାର ମାନନ୍ତୁ ନାହିଁ

୬. ଭରସା ରଖନ୍ତୁ ଯେ ଯିହୋବା ଆପଣଙ୍କୁ ନିଶ୍ଚୟ ସାହାଯ୍ୟ କରିବେ

 ଆମେ କʼଣ ଶିଖିଲୁ ?

ହୁଏତ ବାଇବଲ ଶିଖିବା ସମୟରେ ଅନେକ ସମସ୍ୟା ଆସିପାରେ । କିନ୍ତୁ, ଯଦି ଆମେ ଶିଖିବା ଜାରି ରଖିବା, ତାହେଲେ ଆଜି ଓ ଭବିଷ୍ୟତରେ ସବୁଦିନ ପାଇଁ ଖୁସିରେ ରହିପାରିବା । ଯିହୋବାଙ୍କ ଉପରେ ଭରସା ରଖନ୍ତୁ, ସେ ଆପଣଙ୍କୁ ନିଶ୍ଚୟ ସାହାଯ୍ୟ କରିବେ ।

ଆପଣ କʼଣ କହିବେ ?

• ବାଇବଲର ସତ୍ୟଗୁଡ଼ିକୁ ଆପଣ କାହିଁକି ବହୁମୂଲ୍ୟ ମନେ କରନ୍ତି ?

• ଆପଣ କିପରି ଦେଖାଇପାରିବେ ଯେ ବାଇବଲ ଶିଖିବା ଆପଣଙ୍କ ପାଇଁ ଅଧିକ ମହତ୍ତ୍ୱ ରଖେ ?

• ବାଇବଲ ଶିଖିବା ଜାରି ରଖିବା ପାଇଁ ଆପଣଙ୍କୁ କାହିଁକି ଯିହୋବାଙ୍କୁ ସାହାଯ୍ୟ ମାଗିବା ଉଚିତ୍‌ ?