Reʼ tijinik chi riij i Santo Laj Huuj jeʼ rukabʼ i ojik chi bʼehik. Wilik pech kʼaxik. Mareh inakapaaj chi naʼakanaam i tijinik chi riij i Santo Laj Huuj. ¿Chaaj woʼ reet ko ruman chi ne nakoj akʼux reh rubʼanariik? ¿Chajariik ne intobʼinik aweh reh chi maʼ ne ta inakanaaʼ i tijinik?

1. ¿Nikʼwach qojrutobʼeej i Santo Laj Huuj pan qakʼachariik?

«Reʼ ruqʼoral i Dios kʼachlik, wilik rajaawriik» (Hebreos 4:12). Reʼ Santo Laj Huuj jenaj huuj qʼeʼ looqʼ, ruum chi iruqʼor qeh irukapebʼaal i Dios jeʼ woʼ irikʼraaj chi qiij. Xa maʼ iruyeew ta qanaʼojbʼal, ne woʼ qojrutobʼeej reh chi ne inqachih i holohik pan qakʼachariik eh iruyeew quyʼinik reh i chalik reh. Reʼ xti aajwaal wach reʼ chi reʼ Santo Laj Huuj ne rubʼan chi ne tiponik chi hat ramigo i Jehová. Noq inawil wach inakanaaʼ chi reʼ rajaawriik ne tirutobʼeej pan akʼachariik.

2. ¿Chaaj woʼ reet ko ruman chi ne inqayeew ruloqʼil taqeh kʼuhbʼaal wilik pan Santo Laj Huuj?

Reʼ irukʼuhtaaj i Santo Laj Huuj jeʼ rukabʼ taqeh abʼaj kʼih kitzʼaaq. Ruum aj reʼ, jeʼ wilih iruqʼor qeh: «Chawehchaaj i korik, [...] mankiqʼuch chik aweh» (Proverbios 23:23). Wilaʼ chʼiklik qakʼux chi reʼ Santo Laj Huuj iruqʼor i korik eh inqayeew ruloqʼil, ne inqakowej qakʼux reh tijinik atoobʼ ta ne inchalik kʼaxkilal (chawil Proverbios 2:​4, 5).

3. ¿Nikʼwach ne tirutobʼeej i Jehová reh chi maʼ ne ta inakanaaʼ i tijinik chi riij i Santo Laj Huuj?

Ruum chi reʼ Jehová ajtzʼuhkrisaneel, nim rajaawriik eh awamigo, rehtʼal awach eh iraaj kaat rutobʼeem reh chi ne nanabʼeej wach. Reʼ Dios ne ruyeew aweh i «ajwanik eh jeʼ woʼ i aansil reh rubʼanariik» (chawil Filipenses 2:13, TNM). Jeʼ reʼ noq, mi reʼ hat maʼ nakoj ta akʼux chi tijinik oon maʼ nakoj ta pan akʼachariik i kʼahchiʼ atijem, reʼ reh ne tirutobʼeej. Eh mi maʼxta akowiil reh ikʼik pan jenoʼ kʼaxkilal oon jenoʼ ixowanik, reʼ reh ne ruyeew akowiil. Chapahqaaj atobʼal reh i Jehová reh chi maʼ ne ta inakanaaʼ i tijinik chi riij i Santo Laj Huuj (1 Tesalonicenses 5:17).

 CHATZʼIR RIIJ I KʼAHCHIʼ ATIJEM

4. Chakʼuhtaaj chi reʼ tijinik chi riij i Santo Laj Huuj aajwaal wach chaweh

Wilik pech lahtzʼ qawach eh kʼaxik chi qeh tijinik chi riij i Santo Laj Huuj. ¿Chajariik iraaj bʼanarik? Chawil taq Filipenses 1:10 eh tiqʼoroq taq chi riij:

• «¿Chajariik i aajwaal wach inaqʼor i hat?»

• ¿Chajariik ne nabʼan reh chi reʼ tijinik chi riij i Santo Laj Huuj reʼ oq i peet pan akʼachariik?

1. Mi reʼ hat xanuujisaj jenoʼ cubeta chi poq akʼal eh chi riij i reʼ ne nanuujisaj chi abʼaj, reʼ taqeh abʼaj maʼ ne ta kiʼokik.

2. Xa reʼ laʼ mi xakoj chi peet taqeh abʼaj, ne inkahnik yeʼaabʼ reh rukojariik i poq akʼal. Jeʼ woʼ reʼ pan akʼachariik, mi xakoj chi peet eh ne nabʼan i «aajwaal wach» ne inmanlojik aweh i qʼiij.

Reʼ tijinik chi riij i Santo Laj Huuj irubʼan chi ne inqanabʼeej wach i Dios eh ne inqaaj qayeʼem ruloqʼil. Chawil taq Mateo 5:3 eh tiqʼoroq taq chi riij:

• Mi xqakoj chi peet i qatijinik chi riij i Santo Laj Huuj, ¿nikʼwach ne qojrutobʼeej?

 5. Maʼ akanaaʼ i tijinik chi riij i Santo Laj Huuj atoobʼ ta wilik i maʼ imponik ta chi kiwach

6. Chakoj akʼux chi reʼ Jehová ne tirutobʼeej

 KʼOLOQ PAN AKʼUX

Atoobʼ ta kʼaxik chaweh tijinik chi riij i Santo Laj Huuj, ne tirutobʼeej reh chi ne nasuqkileej akʼachariik yuʼnaak eh chi juneliik. Mi maʼ xakanaaʼ rukojariik akʼux ruukʼ i Jehová reʼ reh ne ruyeew akooch.

Reʼ xkahnik pan akʼux

• ¿Chaaj woʼ reet inayeew ruloqʼil taqeh kʼuhbʼaal inatijej pan Santo Laj Huuj?

• Noq areqem oq chik chi riij chajariik i «aajwaal wach» pan akʼachariik, ¿chajariik naʼabʼanam?

• ¿Chaaj woʼ reet ko ruman chi ne napahqaaj atobʼal reh i Jehová reh chi maʼ ne ta inakanaaʼ i tijinik chi riij i Santo Laj Huuj?