LECCIÓN 12
Bibliata estudiallaypuni
Bibliata estudiayqa mayta yanapawanchej. Jinapis wakenqa mana chayta ruwayta atillankuchu. Ichá qanpis wakin kutis ninki: “Manasina Bibliata estudiayta atillasajpunichu”, nispa. Jinapis, ¿Bibliata estudiallaypuni yanapasunkimanchu? ¿Imataj yanapasunkiman problemas kajtinpis Bibliata estudianallaykipajpuni? Chayta kay leccionpi yachakusun.
1. ¿Imaraykutaj Bibliata estudianallapuni kanman?
‘Diospa palabranqa kausayniyoj, atiyniyojtaj’ (Hebreos 4:12). Chayrayku kausayninchejpi mayta yanapawanchej. Bibliapeqa yachakunchej imaynatachus Dios yuyasqanta, mayta munakuwasqanchejta ima. Chantapis Bibliata estudiaspaqa mana ashkha imasllatachu yachakusun, manaqa yachayniyoj kasun, sumaj kausaytataj suyakusun. Astawanqa Jehová Diospa amigosnin kasun. Chantapis Bibliata estudiayqa kusisqa kausakunapaj yanapawanchej.
2. ¿Imaraykutaj Bibliaj nisqasninta jatunpaj qhawana tiyan?
Bibliaj yachachiykunasnenqa qorimantapis aswan valorniyojraj. Chayrayku Biblia niwanchej: “Cheqa kajta rantikuy, amataj vendepuychu”, nispa (Proverbios 23:23). Bibliaj yachachiykunasninta jatunpaj qhawaspaqa, ima kajtinpis Bibliata estudiallasunpuni (Proverbios 2:4, 5 leey).
3. Bibliata estudianallaykipajpuni, ¿Jehová Dios yanapasunkimanchu?
Tatanchej Jehovaqa ruwawasqanchejrayku, sumaj amigonchejtaj kasqanrayku, payta rejsinanchejpaj yanapayta munawanchej. Chayrayku payqa ‘ruwayta munananchejpaj, ruwayta atinanchejpajtaj’ yanapawasunman (Filipenses 2:13 leey). Ichá wakin kutisqa mana Bibliata estudiayta munallankichu. Chayrí mana Bibliaj nisqanta kasukuyta atillankichu. Chay kutispeqa Jehová Dios yanapasonqa. Payqa problemas kapusojtinpis chayri runas chejnikusojtinkupis, aguantanaykipaj kallpata qosonqa. Chayrayku Bibliata estudianallaykipajpuni paymanta yanapata mañakuy (1 Tesalonicenses 5:17).
ASTAWAN YACHAKUNA
Kaypi yachakusun runas churanakuwajtinchejpis chayri mana tiempoyoj kaspapis Bibliata estudiayta atillasqanchejtapuni. Chantá yachakullasuntaj Bibliata estudianallapajpuni imaynatachus Jehová Dios yanapawasqanchejta.
4. Bibliata estudiayta ñaupajman churay
Ashkha ruwanasniyoj kasqanchejrayku, wakin kutisqa mana tiempochakuyta atillanchejchu Bibliata estudianapaj. Filipenses 1:10 leeriychej, chantá yachakojta tapuriy:
-
Kay leerisqanchejman jina, ¿imastataj aswan ñaupajman churana kasqa?
-
¿Imatataj ruwasunman Bibliata estudiayta ñaupajman churanapaj?
-
Uj baldeman tʼiyutaraj ñaupajta churasun chayqa, rumeqa manaña yaykonqachu.
-
Rumistaraj ñaupajta churasun chayrí, tʼiyoqa chayman yaykullanqa. Ajinallataj tiemponchejwanpis. Aswan allin imasta kausayninchejpi ñaupajman churasun chayqa, chay imasta ruwayta atillasun. Waj imaspajpis tiemponchej kallanqa.
Bibliata estudiaspaqa Diosta rejsinchej, yupaychanchejtaj. Chaytaj sonqo juntʼasqa kausakunapaj yanapawanchej. Mateo 5:3 leeriychej, chantá yachakojta tapuriy:
-
¿Bibliata estudiayta ñaupajman churay yanapawanchejchu?
5. Wajkuna mana munajtinkupis Bibliata estudiallaypuni
Ichapis wakin familiaresniyki chayri amigosniyki mana Bibliata estudianaykita munanqankuchu. Jina kajtin, Francescoj kausaynin mayta yanapasunkiman. Chaypaj VIDEOTA qhawariychej, chantá yachakojta tapuriy:
-
Francesco Bibliata estudiayta qallarejtin, ¿imatataj familiaresnin, amigosnin nisqanku?
-
¿Ima bendicionestataj Francesco japʼerqa Diosta sirviyta ajllasqanrayku?
2 Timoteo 2:24, 25 leeriychej, chantá yachakojta tapuriy:
-
Familiaresniyki, amigosniykipis, ¿imatataj nisunku Bibliata estudiashasqaykimanta?
-
Bibliata estudiasqaykirayku pillapis imata nisojtin chayri imatapis ruwasojtin, ¿imatataj kay versículos nisqanman jina ruwanayki kanman? ¿Imaraykutaj allin kanman chayta ruwanayki?
6. Jehová Dios yanapasunanpi atienekuy
Jehová Diosman astawan qayllaykuspaqa, payta astawan kusichiyta munanki. Chaypajtaj ichá kausayniykipi wakin imasta cambianayki kanqa. Chaytaj ichá qanpaj mana facilchu. Jina kajtin ama llakikuychu, Jehová Dios yanapasonqa. VIDEOTA qhawariychej, chantá yachakojta tapuriy:
-
¿Imatataj Jim ruwarqa Jehová Diosta kusichinanpaj?
-
¿Imataj Jimpa kausayninmanta astawan tʼukuchisunki?
Hebreos 11:6 leeriychej, chantá yachakojta tapuriy:
-
Jehová Diosta rejsinapaj, payta kusichinapaj ima kallpachakojtinchej, ¿imatá pay ruwanqa?
-
Bibliata estudianaykipaj tukuy atisqaykita ruwajtiyki, ¿Jehová Dios bendecisunkimanchu?
ICHÁ WAKIN TAPUSONQANKU: “¿Imaraykutaj Jehovaj testigosninwan Bibliata estudiashankiri? Paykunaqa umallaykita muyuchishasunku”, nispa.
-
Ajinata nisojtinku, ¿imatá niwaj?
¿IMASTÁ YACHAKUNCHEJ?
Kaypi yachakunchej Bibliata estudiayqa wiñay kausayta japʼinapaj yanapawasqanchejta. Chayrayku mana atikullajtinpis Bibliata estudiallaypuni. Jehová Dios yanapasunanpi atienekuy, paytaj bendecisonqa.
Yuyarikunapaj
-
¿Bibliaj yachachiykunasnin yanapawanchejchu?
-
¿Imastataj kausayninchejpi ñaupajman churana kasqa?
-
¿Bibliata estudianallapajpuni Jehovaman orakuy yanapawanchejchu?
ASTAWAN YACHAKUNAYKIPAJ
Imaschus ashkha runasta tiemponkuta mana usuchinankupaj yanapasqanta yachanaykipaj kayta leeriy.
“Cómo invertir sabiamente el tiempo” (¡Despertad!, febrero de 2014)
Uj warmeqa Bibliata estudiallarqapuni qosan mana munajtinpis. Jehová payta yanapasqanta yachanaykipaj kay videota qhawariy.
Jehová Diosqa llakiykunata aguantanapaj yanapawanchejpuni (5:05)
Uj warmeqa Bibliata estudiakullarqapuni. Chaytaj qosanta Bibliamanta yachakunanpaj yanaparqa. Astawan yachanaykipaj kay videota qhawariy.
Bibliaj nisqan cheqachus manachus kasqanta qhawarerqani (6:30)
¿Jehovaj testigosnin familiasta tʼaqanachinkuchu? Chayta yachanaykipaj kayta leeriy.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
