12 YACHACHIKUY
¿Imataq yanapasunki biblia estudiasqaykita mana saqinaykipaq?
Bibliamanta yachayqa sumaqmi, ichaqa wakinpiqa sasachakuykunapi kaspam saqiruchwan. Chaynaqa ¿imanasqataq hinalla kallpanchakunayki estudianaykipaq? ¿Imataq yanapasunki biblia estudiasqaykita mana saqinaykipaq? Chaykunamantam yachaykusunchik.
1. ¿Imanasqataq bibliamanta hinalla yachanayki?
“Diospa palabranqa kawsachkanmi hinaspa atiyniyuqmi” (Hebreos 4:12). Bibliapiqa willawanchikmi Diospa yachachikuyninkunamanta hinaspa kuyawasqanchikmanta. Bibliamanta yachasqaykiqa yanapasunkim yachayniyuq kanaykipaq hinaspa hamuq tiempopi kusisqa kawsakunaykipaqpas. Yanapasunkitaqmi Jehova Diosta astawan kuyanaykipaq hinaspa allintaña kawsakunaykipaq.
2. ¿Imanasqataq bibliamanta yachaynikita chaninchanayki?
Bibliapi yachachikuykunaqa quri-qullqi hinam ancha valorniyuq. Chaymi bibliapi kaynata niwanchik: “Chiqap yachachikuyta maskay, chaytaqa amapunim haykapipas rantikunkichu”, nispa (Proverbios 23:23). Chaymi ima sasachakuyña kaptinpas bibliamanta yachaytaqa mana saqinanchikchu (leey Proverbios 2:4, 5).
3. ¿Imaynatam Jehova Diosqa yanapasunki hinalla estudianaykipaq?
Taytanchik Jehova Diosqa paymanta astawan yachanaykipaqmi kallpanchasunki hinaspa atiyta qusunki (leey Filipenses 2:13). Wakinpiqa manañapaschá bibliamanta yachanaykipaq ganasniki kanqachu. Chayna tarikuptikiqa Diosqa kallpanchasunkim paymanta hinalla yachanaykipaq, hinaspa yachasqaykiman hina kawsakunaykipaq. Wakinpiñataqmi bibliamanta yachayqa sasa kanman sasachakuykuna kaptin utaq estudianaykita pipas mana munaptin, chayna tarikuptikiqa Jehova Diosmi atiyninwan yanapasunki. Chaynaqa Diostayá mañakuy biblia estudiaynikita ama saqirunaykipaq (1 Tesalonicenses 5:17).
ASTAWAN YACHAYKUSUN
Bibliamanta yachanaykita hukkuna mana munaptinkupas utaq mana tiempoyuq kaspaykipas bibliamanta hinalla yachaytaqa atiwaqmi. Jehova Diospas yanapasunkim paymanta hinalla yachanaykipaq. Chaymantam kaypi yachaykusunchik.
4. Imaña kaptinpas tiempochakusun bibliamanta yachanapaq
Wakinpiqa tukuy ima ruwayniyuq kasqanchikraykum tiempota mana tarinchikchu bibliamanta yachanapaq. Chaynaqa, ¿imataq yanapawachwan bibliamanta hinalla yachanapaq? Leeychik Filipenses 1:10 hinaspa qatiqninmanta rimariychik:
-
Qampaqqa ¿imakunataq “aswan allin”?
-
¿Imakunatataq ruwawaq imawanpas mana harkachikuspa bibliata hinalla estudianaykipaq?
-
Puntata aquta hinaruspa chaymanta rumita hinaptikiqa manam llapanchu yaykunqa.
-
Ichaqa puntata rumita hinaruptikim aqupas yaqa llapallan yaykunqa, chaynam “aswan allin” kaqkunata ruwanaykipaq puntata tiempochakuptikiqa huk ruwaynikikunapaqpas tiempoykiqa haypasunki.
Bibliata estudiayqa yanapawasunmi Jehova Diosmanta astawan yachanapaq hinaspa payta yupaychanapaq. Leeychik Mateo 5:3 hinaspa qatiqninmanta rimariychik:
-
¿Imaynataq kawsakusunchik imaña kaptinpas bibliamanta hinalla yachaspaqa?
5. Bibliamanta yachanaykipaq hinalla kallpanchakuy
Wakinqa nisunkim bibliamanta amaña yachanaykipaq. Chaynatam nirqaku Francescotapas. VIDEOTA qawaykuychik hinaspa qatiqninmanta rimariychik:
-
¿Ima nirqakum Francescota ayllunkuna hinaspa amistadninkuna bibliamanta yachayta qallaykuptin?
-
¿Imanasqataq ancha allin karqa bibliamanta hinalla yachasqanqa?
Leeychik 2 Timoteo 2:24, 25 hinaspa qatiqninmanta rimariychik:
-
¿Ima nisunkitaq familiaykipas hinaspa amistadnikikunapas biblia estudiayta qallaykusqaykimanta?
-
2 Timoteo 2:24, 25 nisqanman hinaqa pipas bibliamanta yachanaykita mana munaptinqa, ¿piñakunaykichu? ¿Imayna rimanaykipaqmi kallpanchakunayki?
6. Jehova Diosqa yanapasunkim
Bibliamanta yachaspaqa munanchikmi Diospa munasqanman hina kawsakuyta. Wakinpim ichaqa sasachakunchik, chayna tarikuspaykiqa ama hukmanyaychu, Jehova Diosmi yanapasunki. VIDEOTA qawaykuychik hinaspa qatiqninmanta rimariychik:
-
¿Jimqa imakunatam saqinan karqa Diospa munasqanman hina kawsakunanpaq?
-
Jimpa willakusqanqa, ¿imaynatam qamta yanapasunki?
Leeychik Hebreos 11:6 hinaspa qatiqninmanta rimariychik:
-
¿‘Tukuy sunqunkuwan maskaqkunataqa’ Jehova Diosqa qunqarunqachu?
-
¿Imaynataq Jehova Diosqa tarikun bibliamanta yachanaykipaq tiempochakusqaykiwan?
WAKIN RUNAKUNAM NISUNKIMAN: “¿Imapaqtaq bibliamanta yachachkanki?”, nispa.
-
¿Ima niwaqtaq?
YUYARIYKUSUN
Ima sasachakuykunaña kaptinpas bibliamanta hinalla yachaspaykiqa kusisqam kawsakunki. Jehova Diosqa manam qunqanqachu paymanta yachanaykipaq kallpanchakusqaykitaqa.
¿Ima niwaqtaq?
-
¿Imanasqataq qampaqqa ancha allin bibliamanta yachasqaykiqa?
-
Yacharunchikmi bibliamanta yachayqa ancha allin kasqanta. Chaynaqa, ¿imapaqmi hinalla kallpanchakunayki?
-
¿Imanasqataq bibliamanta hinalla yachanaykipaq Jehova Diosta mañakunayki?
ASTAWAN YACHANAYKIPAQ
Tiemponchikta mana usuchinapaq tawa yanapakuykunamanta kay yachachikuypi yachay.
“¿Imatam ruwachwan tiemponchikta mana yanqachanapaq?” (¡Rikchariy!, marzo-abril 2014)
Huk warmicham Diosta kasukuyta munarqa ichaqa qusanmi harkakurqa. Paytaqa Jehova Diosmi yanapaykurqa.
Sasachakuykunapi tarikuptinchikpas Jehova Diosqa yanapawasunmi (5:05)
Huk warmicham imaña kaptinpas bibliamanta hinalla yacharqa, chayraykum qusanpas bibliamanta yachayta qallaykurqa.
Runakunam ninku Jehova Diospa testigonkunaqa ayllukunata rakinachisqanchikta ¿chaynachu? Chaymanta yachanaykipaq kay yachachikuyta leey.
“¿Testigokunaqa rakinachinchu icha hukllawachinchu ayllukunata?” (Tarinkim jw.org nisqanpi)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
