ЛЕКЦИЈА 12
Со ка поможинел туке те на чхинаве те проучине и Библија?
Бут тано корисно те проучине и Библија. Ама, адава шај нане те овел туке секогаш локхо те кере. Понекогаш шај ка пуче тут: „Дали шај те продолжинав те проучинав и Библија?“ Соске врединела понадари да те трудине тут те проучине и Библија? Со ка поможинел туке те истрајне чак кеда туке пхаро?
1. Соске врединела те проучине и Библија?
„Е Девлескоро Лафи тано џивдо хем силно“ (Евреите 4:12). И Библија тани бут скапоцено адалеске со сикавела со осетинела хем со мислинела о Девел баши туке. Ој на само со поможинела туке те сикљове бут буќа башо Девел, него исто аѓаар дела тут чачутни мудрост хем надеж. Ама сој панда поважно, и Библија поможинела туке те ове е Јеховаскоро амал. Кеда проучинеа и Библија, ту мукхеа ој те влијајнел упри туте хем те керел тло живото пошукар.
2. Соске тано важно те хаљове кобор тано вредно о чачипе тари Библија?
О чачипа тари Библија тане сар скапоцено барвалипе. Адалеске и Библија охрабринела амен те кина о чачипе хем никогаш те на бикина ле (Изреки 23:23). Ако хаљоваја кобор тане вредна о чачипа тари Библија, ка трудина амен понадари да те проучина ла, чак кеда ка појавинен пе аменге несаве предизвикија. (Читин Изреки 2:4, 5.)
3. Сар шај те поможинел туке о Јехова понадари да те проучине?
Сар семоќно Створители хем тло амал, о Јехова џанела тут најшукар хем мангела те поможинел туке те сикљове баши лесте. Ов шај те дел тут „сила“ те проучине лескоро Лафи. (Читин Филипјаните 4:13.) Адалеске, ако понекогаш шај нане те овел тут волја те проучине или ка овел туке пхаро те применине адава со сикљовеа, о Јехова ка поможинел туке. Исто аѓаар, ов шај те дел тут побари сила те накхаве о предизвикија или о противибе. Редовно молин е Јехова те поможинел туке понадари да те проучине и Библија (1. Солуњаните 5:17).
ДОЗНАЈН ПОВИШЕ
Сикљов сар шај понадари да те проучине и Библија чак кеда сиан бут зафатимо или кеда о јавера противинена пе туке. Пало адава, дикх сар о Јехова ка поможинел туке те истрајне.
4. Сар шај те сикаве кај туке бут важно тло библиско курси?
Понекогаш шај те мислина кај сием бут зафатиме хем кај нане амен време те проучина и Библија. Со шај те поможинел аменге тегани? Читин Филипјаните 1:10, а пало адава керен лафи башо акала пучиба:
-
Со мислинеа, кола тане несаве таро најважна буќа ко живото?
-
Сар шај те сикаве кај туке бут важно тло библиско курси?
-
(1) Ако прво пхереа и кофа пошикаја, а пало адава чхивеа о бара тегани о бара нане те ресен андре
-
(2) Ако прво чхивеа о бара ки кофа, тегани ка овел повише тхан те кхедел и пошик да андре. Слично аѓаар, ако чхивеа ко прво тхан о најважна буќа ко тло живото, ка овел тут време те кере на само адала буќа, него хем јавера да
Амен сар мануша иси амен потреба те пенџара хем те обожавина е Девле. Ако на кераја адава нашти те ова бахтале. Адалеске, ваљани те проучина и Библија. Читин Матеј 5:3, а пало адава керен лафи башо акава пучибе:
-
Соске тано важно о проучибе те чхива ле ко прво тхан?
5. Ачхов цврсто кеда ка овел тут противибе
Понекогаш, о јавера шај ка пробинен те обесхрабринен тут те шај те чхинаве те проучине и Библија. Те дикха о пример таро Франческо. Дикх о ВИДЕОКЛИПИ, а пало адава керен лафи башо акала пучиба:
-
Сар реагиринѓе е Франческоскири дај хем лескере амала кеда вакерѓа ленге со сикљовела?
-
Сар сине наградимо башо адава со ачхило истрајно?
Читин 2. Тимотеј 2:24, 25, а пало адава керен лафи башо акала пучиба:
-
Со мислинела тли фамилија хем тле амала башо адава со сикљовеа?
-
Спрема акала стихија, сар ваљани те реагирине кеда некој нане бахтало башо адава со проучинеа и Библија, хем соске?
6. Роде помош таро Јехова
Кобор попаше оваја е Јеховаја, добором повише ка манга те ова леске послушна. Сепак, шај ка овел аменге пхаро те кера несаве промене ко живото те шај те живина ко начин сар со родела ов. Ако понекогаш осетинеа тут аѓаар, ма откажин тут. О Јехова ка поможинел туке. Дикх о ВИДЕОКЛИПИ, а пало адава керен лафи башо акала пучиба:
-
Саве промене керѓа о Џим те шај те овел послушно е Јеховаске?
-
Со свиџинела пе туке највише таро лескоро пример?
Читин Евреите 11:6, а пало адава керен лафи башо акала пучиба:
-
Со ка керел о Јехова околенге „со родена ле ревно“, јавере лафенцар, околенге со трудинена пе те пенџарен ле хем те овен леске послушна?
-
Со сикљовеа таро акава башо адава сар осетинела пе о Јехова кеда дикхела кај трудинеа тут те проучине и Библија?
НЕСАВЕ ШАЈ ПУЧЕНА: „Соске проучинеа и Библија?“
-
Со ка вакере ту?
СО СИКЛИЛЕМ
Иако нане секогаш локхо, о проучибе и Библија шај те поможинел туке те ове бахтало засекогаш. Понадари да роде помош таро Јехова хем ов ка наградинел тут.
Сар ка одговорине?
-
Соске о библиска чачипа тане туке скапоцена?
-
Сар шај те сикаве кола буќа тане туке најважна?
-
Соске ваљани те роде помош таро Јехова те шај понадари да те проучине и Библија?
ИСТРАЖИН
Дикх штар методе со поможинѓе буте манушенге мудро те користинен пумаро време.
„Дали си во трка со времето?“ (Разбудете се! таро февруари 2014)
Дикх сар о Јехова поможинѓа јекхе ромњаке колакоро ром на хаљола сине адава со ој керела башо Девел.
Дикх сар јекхе роме сине ле корист таро адава со лескири ромни сине истрајно.
Понекогаш несаве кривинена е Јеховаскере сведокон кај растуринена о фамилие. Ама, дали адава тано чаче?
„Дали е Јеховаскере сведокија растуринена о фамилие или керена лен позорале?“ (интернет статија)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
