ADESUA 12

Nzu Yeɛ Ɔkɔboka Wɔ Maa Ɛkɔhɔso Kosua Bible Ne Ɔ?

BƆ

Bible adesua so lé mvasoɛ paa, nakoso ɔtɔ mmerɛ bie a, ɔla ase koraa. Ɔtɔ mmerɛ bie a, ebia ekobisa wɔnwo kyɛ, aso ngɔhora ngɔhɔso ngɔsua Bible ne. Nzuati yeɛ yenwo hia kyɛ ɛbɔ mmɔden toa so ɔ? Nzu yeɛ ɔkɔhora kɔboka wɔ maa ɛkɔtoa so ɔmva yenwo kyɛ eyia ɔhaw ahoroɛ ne?

1. Nzuati yeɛ Bible adesua nwo hia ɔ?

“Nyameɛpiri dwirɛ lé ngõa na tumi wo nu.” (Hebrifoɛ 4:12) Bible ne sombo ofikyɛ ɔmaa enwu Nyameɛpiri nzusueɛ ne atenga bɔ olé ma wɔ ɔ. Nná nworɛ ngõme yeɛ ɔkɔmaa ekonya ye ɔ, na mmom nahorɛ nimdeɛ ne anyelasoɛ. Na bɔ yenwo hia paa ne, Bible ne kɔboka wɔ maa ɛkɔɔyɛ Yehowa damvo. Sɛ esua Bible ne a, tumi bɔ ɔwɔ nu ne kɔmaa w’asetena kɔyɛ wɛ́.

2. Nzuati yeɛ Bible nu nahorɛ bɔ ɔsombo bɔ ekonwui ne nwo hia ɔ?

Nahorɛ bɔ ɔwɔ Bible nanu ne tekyɛ nningyein bɔ ye nyɔboɛ yɛ se ɔ. Ɛhẽne ati yeɛ Bible ne hyɛ yɛ ngunaen kyɛ “yɛtɔ nahorɛ ne na nnɛmaa yɛtɔne ye ne.” (Anyandera 23:23) Sɛ yɛfa yesie y’adwene nu daa kyɛ nahorɛ bɔ ɔwɔ Bible nanu ne sombo a, yɛkɔhɔ so yɛkɔyere yɛnwo yekosua—ɔmva yenwo kyɛ yeyia ɔhaw ahoroɛ ne.—kenga Anyandera 2:4, 5.

3. Sɛɛ yeɛ Yehowa kɔboka wɔ maa ɛkɔhɔ so kosua ɔ?

Wɔ Damvo Abɔdeɛ mukoraati so tumvoɛ Yehowa pena kyɛ, ɔboka wɔ maa esua yenwo nikye. Ɔkɔhora kɔma wɔ “ɔpɛ ne tumi bɔ ɛkɔfa kɔ yɛ” ɔ. (Kenga Filipifoɛ 2:13.) Nahorɛ nu, sɛ ɔtɔ mmerɛ bie na ehia nguranhyɛ bɔ ɛkɔfa kosua nikye, ná ahora afa bɔ esua ne ayɛ adwuma a, ɔkɔhora kɔboka wɔ. Sɛ ehia anwoserɛ foforɛ bɔ ɛkɔfa koli wɔ haw anaa ɛpɔen ahoroɛ so a, ɔkɔhora kɔma wɔ bie. Bɔ Yehowa mbaeɛ daa kyɛ ɔboka wɔ ma ɛhɔso sua Bible ne.—1 Tɛsalonikafoɛ 5:17.

SUA PẼE BOKASO

Sua kyɛbɔ ɛkɔhora kɔhɔso kosua Bible ne ɔmva yenwo kyɛ ellé alagyé anaa eyia ɛpɔen fi afoforɛ berɛ ne. Na susu kyɛbɔ Yehowa kɔboka wɔ maa ekogyina yenoa ɔ.

4. Ma wɔ Bible adesua nwo hia wɔ

Ɔtɔ mmerɛ bie a, alagyé bɔ yellé ti ɔmaa yennya mmerɛ po na yafa yasua Bible ne. Nzu yeɛ ɔkɔhora kɔboka ɔ? Kenga Filipifoɛ 1:10, na afei susu nzɛmmisa hemɔ anwo:

Sɛɛ yeɛ ɛtengã wɔ “nningyein bɔ yenwo hia paa” wɔ asetena nu nanwo ɔ?
Ɛkɔyɛ sɛɛ na ama wɔ Bible adesua nwo ahia wɔ?

Sɛ ɛfa nnɛterɛ gua bokiti nu, na ɛbɔ mmɔden kyɛ ɛkɔfa nyɔboɛ kɔboka so a, nyɔboɛ ne ngɔhɔ so
Nakoso sɛ edimoa fa nyɔboɛ ne gua nu a, ekonya atẽe wonu bɔ ɛkɔfa nnɛterɛ pẽe ne kogua nu ɔ. Sɔ ala yeɛ ɔte ɔ, sɛ ɛfa “nningyein bɔ yenwo hia paa” ne dimoa wɔ w’asetena nu a, ɛkɔhora koli yenwo dwumaa, na ekosa konya mmerɛ kɔma nningyein foforɛ bɔ waha ne

Bible adesua ma yɛsa kã yɛ honhom fam ahiadeɛ—yɛ ahiadeɛ bɔ ɔmaa yenwui Nyameɛpiri na yɛsõ ye ɔ. Kenga Mateo 5:3, na afei susu sɔ nzɛmmisa hemɔ anwo:

Sɛ yɛmaa yɛ Bible adesua nwo hia yɛ a, mvasoɛ beni yeɛ yekonya yekofi so ɔ?

5. Gyina ɛpɔen biala bɔ eyia ne noa

Ɔtɔ mmerɛ bie a, afoforɛ kɔbɔ mmɔden kyɛ bekobu y’abanu wɔ Bible adesua bɔ yɛyɛ nanwo. Hyɛ Francesco nneasoɛ ne nzorɛ. Bɔ VIDIO ne, na susu nzɛmmisa bɔ oliso hemɔ anwo.

VIDIO: Mvasoɛ Bɔ Yekonya Yekofi Yɛnwo Mmɔden Bɔ Yɛkɔbɔ Naso Ɔ (5:22)

Vidio nanu ne, nzu yeɛ Francesco nnamvoa ne y’abusuafoɛ yɛle, mmerɛ bɔ ɔhãne bɔ osua nanwo dwirɛ hyirɛle bɛ ne?
Ɔhaw bɔ ogyinane nu ne, mvasoɛ beni yeɛ onya fili so ɔ?

Kenga 2 Timoteo 2:24, 25, na susu nzɛmmisa he anwo:

Sɛɛ yeɛ w’abusuafoɛ ne wɔ nnamvo te ngã wɔ bɔ esua nanwo ɔ?
Wɔ sɔ ngyekyemuɛ he anu ne, sɛɛ yeɛ odikyɛ ɛyɛ wɔ nikye mmerɛ bɔ ebie nye gye yenwo kyɛ esua Bible ne? Nzuati ɔ?

6. Fa wɔnwo to Yehowa so ma ɔboka wɔ

Sɛ yɛtwẽ yepingye Yehowa a, ɔmaa ɔpɛ bɔ yele kyɛ yɛkɔ sõ ye nanu yɛse. Nakoso, ɔkɔhora kɔyɛ se kɔma yɛ kyɛ, yɛkɔyɛ nzakraeɛ biewɔ y’asetena nu maa ɔne y’apɛdeɛ koyia ɔ. Sɛ ɛtenga sɔ a, nnɛmaa w’aba nu bu. Yehowa kɔboka wɔ. Bɔ VIDIO ne, na susu nzɛmmisa bɔ olili so hemɔ anwo.

VIDIO: Yehowa Boka Yɛ Maa Yɛyɛ Nzakraeɛ Ahoroɛ (3:56)

Vidio nanu ne, nzakraeɛ ahoroɛ beni yeɛ Jim yɛle bɔ ɔmaa ɔsɔle Yehowa nye ɔ?
Nzu yeɛ ɔhyɛle wɔ ngunaen wɔ ye nneasoɛ nanu ɔ?

Kenga Hebrifoɛ 11:6, na susu nzɛmmisa hemɔ anwo:

Nzu yeɛ Yehowa kɔyɛ kɔma bɛbɔ “bɛnye aboro bɛpena ye” ne—kyire kyɛ, mmenia bɔ bɛbɔ mmɔden kyɛ bekonwui na bayɛ bɔ ɔsɔ yenye ne ɔ?
Nzu yeɛ ɛhe ma enwu fa kyɛbɔ Yehowa kɔte ngã mmerɛ bɔ ɛbɔ mmɔden sua Bible ne?

EBIA EBIE KOBISA KYƐ “Nzuati yeɛ esua Bible ne ɔ?”