ROSO 12
Qullaawa Maxaafa Xiinxalla Agurattokki Gede Kaaˈlannoheri Maati?
Qullaawa Maxaafa xiinxalla lowore kaaˈlitannoti egennantinote. Kayi togoo xiinxallo woˈmanka woyite shotate yaa diˈˈikkitino. Mito woyite, ‘Qullaawa Maxaafa agurummokki xiinxalla dandeemmokka?’ yite hedattoha ikkara dandaanno. Ikkinita ikkine agurrikki xiinxalla gaabbissannota diˈˈikkitino yineemmohu mayiraati? Qarrisannori heeˈrirono xiinxallo agurattokki gede kaaˈlannoheri maati?
1. Qullaawa Maxaafa xiinxalla lowore kaaˈlitanno yineemmohu mayiraati?
“Maganu qaali lubbo afiˈrinohonna loosannoho.” (Ibiraawoota 4:12) Qullaawu Maxaafi Maganu hedonna isi ate baxanno gara kulannohe daafira lowore kaaˈlannohe. Egenno afiˈratto gede calla ikkikkinni addu hayyonna hexxo heedhannohe gedeno kaaˈlannohe. Roorenka kayinni, Qullaawu Maxaafi Yihowa jaala ikkatto gede kaaˈlannohe. Qullaawa Maxaafa xiinxallatto woyite, Maganu Qaali wolqa heeshshokki seekkitanno gede assidhanni nootto.
2. Qullaawu Maxaafi halaali lowore ikkinota huwata hasiissannohu mayiraati?
Qullaawu Maxaafi giddo noo halaali muxxe jirooti. Qullaawu Maxaafi, “Halaale afiˈri ikkinnina huˈnitooti” yaannohu iseraati. (Lawishsha 23:23) Qullaawu Maxaafi halaali muxxe jiro ikkinota huwantummoro, guficho ikkannori heeˈriro nafa agurrummokki xiinxallate sharrammeemmo.—Lawishsha 2:4, 5 nabbawi.
3. Yihowa agurittokki xiinxallatto gede kaaˈlannohehu hiittoonniiti?
Yihowa Woˈmanka Dandaanno Kalaqaanchonna Jaalakki ikkino daafira, iso afatto gede kaaˈlahera hasiˈranno. Isi hasattono hasiissanno wolqano aahera dandaanno. (Filiphisiyusi Sokka 2:13 nabbawi.) Konnira, mito woyite xiinxallate woy rosoottore loosu aana hosiisate hasatto ajjuhero, isi kaaˈlannohe. Guficho ikkannore qeelate woy mannu giwannoheta dandaate wolqa ledahera huucciˈrittoro, isi aannohe. Qullaawa Maxaafa agurittokki xiinxallatto gede kaaˈlahera Yihowa ganyite huucciˈri.—1 Teselonqe 5:17.
LEDDE XIINXALLI
Loosu batiˈriherono woy mannu xiinxallattota giwirono Qullaawa Maxaafa agurittokki xiinxalla dandaatto gara rosi. Hakkiinni Yihowa xiinxallokki agurattokki gede kaaˈlannohe gara rosatto.
4. Qullaawu Maxaafi xiinxallokki balaxisiisi
Mito woyite loosu kokke iillannonke daafira, Qullaawa Maxaafa xiinxallate yanna noonkekkiha lawankera dandaanno. Hattoo woyite mayi kaaˈlankera dandaanno? Filiphisiyusi Sokka 1:10 nabbabbe; hakkiinni aante noo xaˈmuwa hasaabbe:
-
Heeshshonke giddo “woyyanno” woy roore hasiisanno coyi giddo mitu maa lawannohe?
-
Qullaawu Maxaafi xiinxallokki balaxisiisa dandaattohu hiittoonniiti?
-
Baaldete giddo balaxxe shaafa worte kaˈe kinna worate woˈnaalittoro, kinna woratto bayichi diheeˈranno
-
Balaxxe kinna worittoro kayinni, rooriidi shaafa woratto bayichi gatannohe. Hatteente gede, heeshshokki giddo roore hasiisanno coye balaxisiisittoro, hakkoye coye assiteenna wolurira ikkitanno yanna nafa gattannohe
Qullaawa Maxaafa xiinxallinummoro, ayyaanaamittete hasattonke yaano Magano afatenna magansiˈrate noonke hasatto woˈmitanno. Maatewoosi 4:4 nabbabbe; hakkiinni aante noo xaˈmo hasaabbe:
-
Heeshshonke giddo Qullaawu Maxaafi xiinxallo balaxisiisanke kaaˈlitannonkehu hiittoonniiti?
5. Xiinxallattota mannu baxa hoogirono kaajjite uurri
Mito woyite, mannu Qullaawa Maxaafa xiinxalla aguratto gede assate woˈnaalara dandaanno. Hanni Firansisko lawishsha laˈno. VIIDIYO laˈe; hakkiinni aante noo xaˈmuwa hasaabbe.
-
Tenne viidiyo giddo, Firansisko Maganu Qaalinni rosinore kulinsata jaallasinna maatesi hiitto ikkitino?
-
Isi kaajje uurrasinni baˈraaˈrinohu hiittoonniiti?
Layinki Ximootewoosi 2:24, 25 nabbabbe; hakkiinni aante noo xaˈmuwa hasaabbe:
-
Minikki manninna jaallakki, Qullaawa Maxaafa xiinxallitanni noottota laˈanno woyite mayitanno?
-
Kuni qummeeshshi kulanno garinni, mittu manchi Qullaawa Maxaafa xiinxallootto daafira hagiidha hoogiro maa assa hasiissannohe? Mayira?
6. Kaaˈlannohena Yihowa addaxxi
Yihowawa shinqummo kiiro, albinni roore iso hagiirsiisa hasiˈneemmo. Ikkirono, isi seeri garinni heeˈrate heeshshonke giddo mitore biddi assiˈra shota ikka hooggankera dandiitanno. Aterano hatto lawannoheha ikkiro, hexxo mudhitooti. Yihowa kaaˈlannohe. VIIDIYO laˈe; hakkiinni aante noo xaˈmuwa hasaabbe.
-
Tenne viidiyo giddo, Jiimi Yihowa hagiirsiisate maa maa agurino?
-
Isi xagge hedatto woyite dhagge ikkannoheri maati?
Ibiraawoota 11:6 nabbabbe; hakkiinni aante noo xaˈmuwa hasaabbe:
-
Yihowa iso afatenna hagiirsiisate sharramanno mannira maa assanno?
-
Ati Qullaawa Maxaafa xiinxallate assattore laˈˈanno woyite Yihowara mayi macciishshamannosiha lawannohe?
MITU MANNI TOGO YEE XAˈMARA DANDAANNO: “Yihowa Farciˈraasine ledo Qullaawa Maxaafa xiinxallitanni noottohu mayiraati?”
-
Mayite qolatto?
XAPHISHSHA
Mito woyite injaa hoogihero nafa, Qullaawa Maxaafa xiinxallakki hegerera hagiidhitanni heeˈratto gede kaaˈlitannohe. Yihowa addaxxa agurtooti; isi baˈraasannohe.
Kageeshsha Rosoottore
-
Qullaawu Maxaafi halaali muxxete yaattohu mayiraati?
-
Roore hasiisanno coye badde afittohu gedensaanni, maa assa hasiissannohe?
-
Qullaawa Maxaafa agurittokki xiinxallatto gede kaaˈlahera Yihowa huucciˈra hasiissannohehu mayiraati?
EGENNO LEXXI
Batinyu manni yannansa danchu garinni horoonsiˈranno gede kaaˈlitinota shoole hayyo wodanchi.
“Yannakki Hayyotenni Horoonsiˈra Dandaatto Gara” (Baqqi Yiiyye!, Ammajje 2014)
Mitte mancho minaannise, ise Magano hagiirsiisate sharrantanni noohu mayiraatiro leella hoogeennasi qarrisinose. Yihowa ise kaaˈlino gara huwati.
Mitto mancho minaamasi cincase kaaˈlitinosihu hiittoonniitiro wodanchi.
Mito woyite Yihowa Farciˈraasine maate diigganno yine kassansanni. Kayi hatti addaho?
“Yihowa Farciˈraasine Maate Diiggannonso Dhaabbanno?” (Webisayitenkera fultino borro)
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
