WOTO 12
Andi o heepi i fii ta lei soni u Bëibel go dou?
Te i ta lei soni a di Bëibel, nöö a o tja sömëni wini ko da i. Ma an dë wan kösökösö soni hii juu. Kandë so juu i ta hakisi iseei ee joo sa lei soni u Bëibel go dou. Faandi mbei a dë fanöudu fii mbei möiti u lei soni u Bëibel go dou? Andi sa heepi i fii go dou aluwasi soni ta taanga da i?
1. Faandi mbei a dë fanöudu u lei soni u Bëibel?
U di „di wöutu u Gadu dë ku libi, nöö kaakiti dë nëën dendu.” (Hebelejën 4:12) Di Bëibel da wan fanöudu buku, u di a ta konda da i unfa Gadu ta pakisei, söseei unfa a lobi i tjika. Joo lei sömëni soni nëën, söseei a o heepi i fii ko köni tuutuu. Boiti di dë, a o heepi i fii ko abi di biibi taa woo feni gaan bunu a di ten di ta ko. Di möön fanöudu soni, hën da di Bëibel o heepi i fii ko toon wan mati u Jehovah. Te i ta lei soni u Bëibel, nöö a o heepi i fii ko abi wan möön bunu libi.
2. Faandi mbei a dë fanöudu u ko sabi di tuutuu lei u Bëibel?
Di tuutuu lei u Bëibel dë kuma wan gaan dii sitonu. Fëën mbei di Bëibel ta da u di degihati u bai di tuu tei, nöö wa musu sei ën (Nöngö 23:23). Te u ta hoi a pakisei taa di tuutuu lei u Bëibel sa mbei u feni libi, nöö woo mbei taanga moiti u lei soni u Bëibel go dou aluwasi soni ta taanga da u.—Lesi Nöngö 2:4, 5.
3. Unfa Jehovah sa heepi i fii sa lei soni u Bëibel go dou?
U di Jehovah, di Sëmbë di mbei i, da di möön makiti sëmbë, söseei u di a dë i mati, mbei a kë fii lei soni fëën. A sa da i di „fii ku di kaakiti u du soni di ta kai ku ën”. (Lesi Filipi 2:13.) Fëën mbei ee i abi taanga fanöudu so juu u lei soni u Bëibel, nasö u du dee soni dee i lei, nöö a sa heepi i. Ee i abi kaakiti fanöudu u pasa wan bookohedi nasö u hoi dou te sëmbë ta du ku i, nöö a sa da i ën. Hii juu i musu ta begi Jehovah ta hakisi ën faa heepi i fii lei soni u Bëibel go dou.—1 Tesalonika 5:17.
WOTO SONI DI I SA LEI
Woo luku andi o heepi i fii sa ta lei soni u Bëibel go dou, aluwasi i abi hia soni ta du nasö aluwasi sëmbë ta du ku i. Baka di dë, woo luku unfa Jehovah o heepi i fu ja disa.
4. Buta di lei di i ta lei soni u Bëibel a di fosu kamian a i libi
So juu u ta abi hia soni ta du sö tee taa a ta djei kuma wa abi ten tjika u lei soni u Bëibel. Andi sa heepi u? Lesi Filipi 1:10, nöö piki dee hakisi aki:
-
Andi ii ta si taa da so u „dee möön fanöudu soni” a di libi?
-
Unfa i sa lei taa di lei di i ta lei soni u Bëibel da wan fanöudu soni da i?
-
Ee i buta sandu a wan buketi, hën baka di dë, hën i buta sitonu go tu, nöö na hii dee sitonu o sa go a di buketi dendu
-
Ee i buta dee sitonu fosu go a di buketi, nöö joo sa buta gaansë u di sandu go a dendu. Sö nöö a dë taa te i buta „dee möön fanöudu soni” a di fosu kamian a i libi, nöö joo sa du de, söseei joo abi ten jeti u du woto soni
Te u ta lei soni u Bëibel, nöö u ta ko sabi Gadu, söseei u sa dini ën, u di wa sa libi söndo Gadu. Lesi Mateosi 5:3, nöö piki di hakisi aki:
-
Un wini u ta feni te u ta buta di lei di u ta lei soni u Bëibel a di fosu kamian a u libi?
5. Hoi dou aluwasi sëmbë ta du ku i
So juu woto sëmbë sa kë tapa i fu ja lei soni u Bëibel. Luku di woto u Francesco. Pëë di FËLÖN, nöö piki dee hakisi aki.
-
Andi dee mati ku dee famii u Francesco bi du di a konda da de andi a ta lei?
-
Un wini a bi feni di a bi hoi dou?
Lesi 2 Timoteo 2:24, 25, nöö piki dee hakisi aki:
-
Unfa dee famii fii ku dee mati fii ta pakisei u dee soni dee i ta lei?
-
Te i luku di tëkisi aki, nöö unfa i musu piki wan sëmbë di an ta wai ku i taa i ta lei soni u Bëibel? Faandi mbei?
6. Buta futoou a Jehovah taa a o heepi i
Möön u ta ko zuntu ku Jehovah, möönmöön woo ta kë du soni di ta kai ku ën. Ma tökuseei a sa taanga da u u tooka soni a u libi fuu sa libi kumafa dee wëti fëën ta taki. Ee i ta fii sö, nöö na lasi hati. Jehovah o heepi i. Pëë di FËLÖN, nöö piki dee hakisi aki.
-
Andi Jim bi tooka nëën libi, u libi fëën bi sa kai ku Jehovah?
-
Andi ta bigi da i a di woto fëën?
Lesi Hebelejën 11:6, nöö piki dee hakisi aki:
-
Andi Jehovah o du da dee sëmbë dee ta mbei taanga möiti u ko sabi ën, söseei u libi kumafa a kë?
-
Te i luku di tëkisi, nöö unfa Jehovah ta fii te a ta si di möiti di i ta mbei u lei soni u Bëibel?
WAN SËMBË SA HAKISI I TAA: „Faandi mbei i ta lei soni u Bëibel ku dee Jehovah Kotoigi?”
-
Andi i bi o piki ën?
ANDI I LEI?
Hii fa an dë wan kösökösö soni, ma di lei di i ta lei soni u Bëibel sa heepi i fii sa dë waiwai u teego. I musu ta futoou Jehovah go dou, nöö a o mbei i feni gaan bunu.
Andi i bi o piki?
-
Faandi mbei dee lei u Bëibel dë gaan fanöudu soni da i?
-
Unfa i sa buta „dee möön fanöudu soni” a di fosu kamian a i libi?
-
Faandi mbei i musu hakisi Jehovah faa heepi i fii lei soni u Bëibel go dou?
WOTO SONI DI I SA LUKU
A di fëlön aki joo si unfa Jehovah bi heepi wan mujëë di hën manu an bi ta fusutan faandi mbei a bi ta mbei möiti u libi kumafa Gadu kë.
A di fëlön aki joo si unfa wan womi bi ko dini Jehovah u di hën mujëë bi hoi dou
So sëmbë ta taki taa dee Jehovah Kotoigi ta booko wosudendu. Ma sö a dë tuu ö?
„Yehovah Kotoigi e broko osofamiri noso den e meki den kon moro tranga?” (Woto a di website fuu)