LES 12
San o yepi yu fu tan studeri Bijbel?
A o tyari furu wini kon gi yu te yu e studeri Bijbel. Ma a no ala ten a makelek. Kande yu e aksi yusrefi son leisi efu yu musu tan studeri Bijbel. Fu san ede a bun fu meki muiti fu tan studeri? San kan yepi yu fu tan studeri awinsi yu e kisi problema?
1. Fu san ede a prenspari fu studeri Bijbel?
„A wortu fu Gado de na libi. A abi krakti” (Hebrewsma 4:12). Bijbel na wan prenspari buku fu di a e sori fa Gado e denki fu yu èn a e sori taki a lobi yu. Te yu o studeri Bijbel, dan yu no o kon sabi sani nomo, ma a o yepi yu fu kon koni. Boiti dati, yu o kon sabi sortu moi sani Gado o du gi wi na ini a ten di e kon. San moro prenspari na taki Bijbel e yepi yu fu tron wan mati fu Yehovah. Te yu e studeri Bijbel a o yepi yu fu abi wan moro bun libi.
2. Fu san ede den leri fu Bijbel musu prenspari gi yu?
Den leri fu Bijbel abi furu waarde. Dati meki Bijbel e gi wi deki-ati fu ’bai san tru èn fu no seri en’ (Odo 23:23). Te den leri fu Bijbel prenspari gi yu, dan yu o meki muiti fu tan studeri awinsi a no makelek.—Leisi Odo 2:4, 5.
3. Fa Yehovah kan yepi yu fu tan studeri?
Yehovah na yu Mekiman nanga yu Mati. A wani yepi yu fu kon sabi en moro bun. A kan gi yu „a firi nanga a krakti fu du sani di e plisi en”. (Leisi Filipisma 2:13.) Sobun, efu a muilek son leisi fu studeri noso fu du san yu leri, Yehovah kan yepi yu. Te yu e kisi tesi noso te sma e gens yu a kan gi yu a krakti fu go doro. Begi Yehovah ibri leisi baka fu yepi yu fu tan studeri Bijbel.—1 Tesalonikasma 5:17.
SORTU TRA SANI YU KAN LERI?
Wi o si san kan yepi yu fu tan studeri Bijbel awinsi yu abi furu fu du noso awinsi sma wani tapu yu fu studeri. Wi o si tu fa Yehovah o yepi yu fu horidoro.
4. Si a Bijbelstudie fu yu leki wan prenspari sani
Son leisi wi abi so furu fu du taki a gersi leki wi no abi ten fu studeri Bijbel. San kan yepi yu? Leisi Filipisma 1:10 èn taki fu den aksi disi:
-
San yu e si leki „den moro prenspari sani” na ini a libi?
-
Fa yu kan sori taki a Bijbelstudie prenspari gi yu?
-
Efu yu e furu na emre nanga santi fosi, dan den ston no o man go na inisei
-
Efu yu poti den ston fosi na ini na emre, dan yu o man poti bijna ala a santi. Na so a de tu taki te yu e du „den moro prenspari sani” fosi, yu o abi ten gi tra sani tu
Libisma abi Gado fanowdu. A Bijbelstudie o yepi yu fu kon sabi en èn fu anbegi en. Leisi Mateyus 5:3 èn taki fu na aksi disi:
-
Sortu wini wi e kisi te wi e meki ten fu studeri Bijbel?
5. Tan studeri awinsi sma wani tapu yu fu du dati
A kan taki son sma o wani tapu yu fu studeri Bijbel. Luku a tori fu Francesco. Prei a FELEM èn taki fu den aksi disi:
-
San den mati nanga den famiri fu Francesco du di a taigi den san a ben leri?
-
Sortu blesi a kisi di a go doro nanga a studie?
Leisi 2 Timoteyus 2:24, 25 èn taki fu den aksi disi:
-
Fa den famiri nanga den mati fu yu feni den sani di yu e leri?
-
Soleki fa a tekst disi e sori, dan san yu musu du te sma no breiti taki yu e studeri Bijbel? Fu san ede yu musu du dati?
6. Frutrow tapu Yehovah
O moro yu e kon lobi Yehovah, o moro yu o wani du sani di e meki a prisiri. Toku a kan muilek gi wi fu kenki wi libi èn fu du san a e aksi fu wi. Te yu e firi so, no gi abra. Yehovah o yepi yu. Prei a FELEM èn taki fu den aksi disi:
-
Sortu kenki Jim tyari kon fu plisi Yehovah?
-
San yu lobi fu na eksempre fu en?
Leisi Hebrewsma 11:6 èn taki fu den aksi disi:
-
San Yehovah o du gi den sma „di e suku en fayafaya”, dati na den sma di e meki muiti fu kon sabi en èn fu plisi en?
-
Te yu e luku a tekst disi, dan fa Yehovah feni en taki yu e du muiti fu studeri Bijbel?
WAN SMA KAN AKSI YU: „Fu san ede yu e studeri Bijbel?”
-
San yu ben o piki en?
SAN YU LERI?
A no ala ten a makelek fu studeri Bijbel, ma te yu e tan du dati yu kan kisi têgo libi. Frutrow tapu Yehovah, dan a o blesi yu.
Fa yu ben o piki den aksi disi?
-
Fu san ede den leri fu Bijbel prenspari gi yu?
-
Fa yu „kan kon sabi san na den moro prenspari sani”?
-
Fu san ede yu musu aksi Yehovah fu yepi yu fu tan studeri Bijbel?
TRA SANI DI YU KAN LUKU
Na artikel disi e taki fu fo sani di yepi sma fu gebroiki den ten na wan bun fasi.
Na ini a felem disi yu o si fa Yehovah yepi wan uma. En masra no ben frustan fu san ede a ben kenki en libi fu kan plisi Gado.
Na ini a felem disi wi o si fa wan man kon dini Yehovah fu di en frow tan studeri Bijbel.
Son sma e taki dati Yehovah Kotoigi e pori famiri. Ma a sani dati tru?
„Yehovah Kotoigi e broko osofamiri noso den e meki den kon moro tranga?” (Web-artikel)
