ITYOUGH 12
Ka Nyi ia Wase U Ve U Gba Uwer u Henen Bibilo Ga?
Ka a inja u henen Bibilo kpishi. Nahan kpa, ashighe agen alaghga a taver we. Ashighe agen a lu u er u fatyô u zan hemen a Bibilo i henen ga nahan. Er nan i doo u u nôngo sha afatyô wou cii u za hemen u henen Bibilo? Shighe u u tagher a mbamtaver je kpa, ka nyi ia wase u ve u za hemen u henen Bibilo?
1. Ka a inja u henen Bibilo sha ci u nyi?
“Mkaanem ma Aôndo ma uma shi ka ma er tahav.” (Mbaheberu 4:12) Bibilo ngi a inja sha ci u i pase se er Aôndo a henen kwagh yô, kua er u doo un ishima la kpaa. Bibilo ia wase u u zuan a mfe man kwaghfan u mimi shi u lu a ishimaverenkeghen. Man u hemban cii je yô, Bibilo ia wase u u hingir ijende i Yehova. Aluer u ngu henen Bibilo yô, a hemba saan we iyol.
2. Er nan i gbe hange hange u se nenge mimi u Bibilo la ser ka kwagh u injaa?
Akaa a mimi a Bibilo i tese la nga er akaainjaa a doon nahan. Ka nahan ve Bibilo i we se kwagh ér, se ‘yam mimi, se de teen un ga’ ye. (Anzaakaa 23:23) Aluer se mba umbur er mimi u Bibilo la a lu kwagh u injaa yô, shighe u se tagher a mbamtaver kpa se nôngo kpoghuloo se za hemen u henen mimi la.—Ôr Anzaakaa 2:4, 5.
3. Yehova una wase u u za hemen u henen Bibilo nena?
Er Yehova Aôndo u a hembe agee cii la a gbe u shi a lu Ijende you yô, a soo ér una wase u, u hen kwagh na. Una fatyô u wasen we lun a “isharen kua tahav mbu eren kwagh” ne. (Ôr Mbafilipi 2:13.) Sha nahan yô, aluer ashighe agen iyol wa kpen we u henen kwagh shin dondon kwagh u u hen la je kpaa, una wase u. Aluer u tagher a mbamzeyol shin ahendan je kpaa, u sôn un yô, una seer nan we tahav sha er u taver ishima yô. Nahan eren msen hanma shighe, sônon Yehova wer a wase u sha er u za hemen u henen Bibilo yô.—1 Mbatesalonika 5:17.
HEN KWAGH I ZA SHIMI
Hen er u za hemen u henen Bibilo aluer ka u lu a akaa a eren kpishi shin ior mba hendan a we kpaa. Nahan nenge er Yehova una wase u, u za hemen u henen Bibilo yô.
4. Nôngo Bibilo i henen i lu u kwagh u vesen
Ashighe agen yô, alaghga a lu se inja er se ngee a akaa a eren je, se mba a shighe u henen Bibilo ga nahan. Ka nyi ia wase se? Ôr Mbafilipi 1:10, maa lam nen sha mbampin mban:
-
Ka akaa a nyi nahan u nenge wer ka akaa a a “hembe lun a inja” ken uma?
-
U er nan ve Bibilo i henen ia lu kwagh u vesen ken uma wouwe?
-
Aluer u vande haan waarawa shin bokoti yô, awen a ma a nyer shin bokoti shon la aa kera nyôr cii ga
-
Nahan kpa, aluer u vande wan awen shin bokoti yô, ian ia lu i u fatyô u haan waarawa kpishi shimi yô. Kape aluer u ver “akaa a a hembe lun a inja” la hiihii ken uma wou ve, u fatyô u eren a, shi zuan a shighe u eren akaa agen kpaa je la
I gba uumace a isharen i fan Aôndo shi civir un, nahan kpa, saa se hen Bibilo ve se fa un shi se civir un ye. Ôr Mateu 5:3, maa lam nen sha mpin ne:
-
Aluer Bibilo i henen hingir kwagh u vesen ken uma wase yô, a wase se nena?
5. Aluer mba hendan a we kpa de gbe uwer ga
Ior mbagen vea soo ér u hen Bibilo ga, nahan ashighe agen vea er akaa a nan we iyolkpen. Kpa nenge kwagh u orgen u yer iti ér Francesco ne yange er yô. Nenge VIDIO i i lu heen ne, maa lam nen sha mbampin mba ve dondo ne.
-
Ken vidio la, Francesco yange ôr azende a na man mba hen tsombor na ér un ngu henen Bibilo nahan, ve er nena?
-
Yange taver ishima nahan, zua a injar nena?
Ôr 2 Timoteu 2:24, 25, maa lam nen sha mbampin mban:
-
U ngu henen Bibilo nahan, mba hen tsombor wou man azende a ou nenge kwagh shon nena?
-
Avur a Bibilo ne tese ér, aluer kwagh u u lu henen Bibilo ne doo mba hen tsombor wou ga yô, u er nena? Man ka sha ci u nyi?
6. Suur sha Yehova a wase u
Ka sea kporom hen Yehova yô, i hemba saren se u eren kwagh u doon un cii. Kpa alaghga a taver se u den akaa agen ken uma wase, sha er se eren kwagh er Yehova a soo la. Aluer kape i lu u la yô, nôngon her. Yehova una wase u. Nenge VIDIO i i lu heen ne, maa lam nen sha mbampin mba ve dondo ne.
-
Ken vidio la, ka akaa a nyi nahan Jim yange sôr ken uma na sha er una er kwagh u doon Yehova?
-
Ka nyi i doo u ken kwagh u Jim yange er laa?
Ôr Mbaheberu 11:6, maa lam nen sha mbampin mban:
-
Yehova una er a mba ve “keren un sha mimi,” mba ve nôngon sha gbashima ér vea fa un shi vea eren kwagh u doon un la nena?
-
Kwagh ne tese ér Yehova nengen iniôngon you i henen Bibilo la nena?
ALAGHGA ORGEN NANA PINE ÉR: “U ngu henen Bibilo sha ci u nyi?”
-
U na mlumun wer nyi?
KA NYI U HENE?
Er ashighe agen ka i taver u henen Bibilo nahan kpa, aluer u gba uwer ga yô, kwagh la una wase u u va lun uma gbem sha won. Za hemen u suur sha Yehova, nahan una na u injar.
Mbampin mba umbur kwagh u i hen yô
-
Akaa a mimi a Bibilo i tese la, nga u a inja sha ci u nyi?
-
U er nan ve u ‘fa akaa a a hembe lun a inja laa’?
-
Er nan i doo u u sôn Yehova wer a wase u, u za hemen u henen Bibilo?
SEER HENEN KWAGH
Nenge akaa anyiin a a wase ior kpishi u eren kwagh a shighe ve sha inja yô.
“Er u Er Kwagh a Shighe Wou sha Inja Yô” (Awake!, Febewari 2014)
Nenge er Yehova yange wase kwase ugen u lu nôngon ér una er ishima i Yehova, kpa nom na gema kav kwagh shon ga yô.
Nenge er kwase ugen yange gba uwer u henen Bibilo ga ve, kwagh la wase nom na yô.
Ashighe agen ior ka ve kaa ér, Mbashiada mba Yehova ka ve va a mpav hen tsombor. Kpa kwagh la ka mimi?
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
