LESEN 12
Wanem Samting Bai Helpim Yu Long Stadi Yet Long Baibel?
Gutpela samting i save kamap long pasin bilong stadi long Baibel. Tasol i gat hatwok bilong en. Sampela taim yu tingting, bai yu inap stadi yet long Baibel o nogat? Wai na i gutpela long yu wok yet long stadi? Wanem samting bai helpim yu long stadi yet maski i gat hatwok?
1. Wai na i bikpela samting long stadi long Baibel?
“Tok bilong God i gat laip na i wok strong i stap.” (Hibru 4:12) Baibel i bikpela samting bikos em i kamapim tingting na filings bilong God long yu. Em i helpim yu long kisim save, na tu, kisim savetingting na bilip na wetim gutpela samting bai kamap. Na bikpela samting moa, Baibel i helpim yu long kamap pren bilong Jehova. Taim yu stadi long Baibel, yu larim strong bilong tok bilong en i stiaim ol samting yu mekim long laip bilong yu.
2. Wai na i bikpela samting long luksave long ol tok i tru bilong Baibel?
Ol tok i tru i stap long Baibel ol i olsem ol samting i dia tumas. Olsem na Baibel i kirapim yumi long “baim tok i tru na no ken salim.” (Provep 23:23) Taim yumi tingim tok i tru bilong Baibel i bikpela samting, bai yumi wok strong long stadi yet—maski yumi bungim ol hevi.—Ritim Provep 2:4, 5.
3. Hau bai Jehova i helpim yu long wok yet long stadi?
Jehova em Krieta i gat olgeta strong na Pren bilong yu, na em i laik helpim yu long kisim save long em. Em bai givim yu “dispela laik na strong long mekim ol samting.” (Ritim Filipai 2:13.) Tasol sampela taim sapos yu nidim yet dispela laik bilong stadi na bihainim ol tok yu lainim, em i ken helpim yu. Sapos yu nidim moa strong long winim ol hevi o pasin birua, em bai givim long yu. Long olgeta taim, beten askim Jehova long helpim yu long wok yet long stadi long Baibel.—1 Tesalonaika 5:17.
KISIM SAMPELA SAVE MOA
Kisim save long hau yu ken stadi yet long Baibel maski yu bisi tumas o ol narapela i birua long yu. Na skelim hau Jehova bai helpim yu long stadi yet.
4. Putim stadi bilong yu long Baibel i stap nambawan
Sampela taim yumi pilim olsem yumi bisi tumas na yumi no gat taim long stadi long Baibel. Wanem samting inap helpim yu? Ritim Filipai 1:10, na stori long ol dispela askim:
-
Yu ting wanem ol samting “i bikpela samting moa” long laip?
-
Hau bai yu inap putim Baibel stadi bilong yu i stap nambawan samting?
-
Sapos yu pulapim wesan long baket na bihain yu putim ol ston, ol ston bai no gat spes
-
Sapos yu putim ol ston pastaim, bai i gat spes long yu putim olgeta wesan i go insait. Olsem tasol, sapos yu putim “ol samting i bikpela samting moa” i stap nambawan long laip bilong yu, yu bai mekim ol dispela samting, na yu gat taim tu long mekim ol narapela samting
Pasin bilong stadi long Baibel i inapim laik bilong yumi long kisim save long God na lotuim em. Ritim Matyu 5:3, na stori long dispela askim:
-
Taim yumi putim stadi bilong yumi long Baibel i stap nambawan, dispela i helpim yumi olsem wanem?
5. Sanap strong taim ol man i birua long yu
Sampela taim, ating ol narapela i laik pasim yu long stadi long Baibel. Skelim eksampel bilong Francesco. Pilaim VIDIO, na stori long ol dispela askim.
-
Ol pren na famili bilong Francesco i mekim wanem taim em i tokim ol long ol samting em i lainim?
-
Em i sanap strong na wanem gutpela samting i kamap?
Ritim 2 Timoti 2:24, 25, na stori long ol dispela askim:
-
Ol famili na pren bilong yu i pilim olsem wanem long ol samting yu lainim?
-
Olsem ol dispela ves i kamapim, bai yu mekim wanem taim wanpela i no amamas long yu stadi long Baibel? Bilong wanem?
6. Trastim Jehova long helpim yu
Taim yumi go klostu long Jehova, laik bilong yumi long amamasim em bai kamap bikpela. Tasol bai yumi pilim hatwok yet long mekim sampela senis long laip bilong yumi na bai i stret wantaim ol tok bilong em. Sapos yu pilim olsem, no ken givap. Jehova bai helpim yu. Pilaim VIDIO, na stori long ol dispela askim.
-
Long vidio, Jim i mekim wanem ol senis bilong amamasim Jehova?
-
Yu laikim wanem samting long stori bilong em?
Ritim Hibru 11:6, na stori long ol dispela askim:
-
Jehova bai mekim wanem long ol man i “wok strong long painim em”—em ol man i wok strong long kisim save long em na amamasim em?
-
Dispela i givim wanem tingting long yu long hau Jehova i pilim taim em i lukim yu wok strong long stadi long Baibel?
SAMPELA MAN I TOK: “Wai na yu stadi long Baibel?”
-
Bai yu tok wanem?
OL BIKPELA POIN
Tru em i no isi, tasol pasin bilong stadi long Baibel bai helpim yu long stap amamas oltaim. Wok yet long trastim Jehova, na em bai blesim yu.
Riviu
-
Wai na ol tok i tru i stap long Baibel i olsem ol samting i dia tumas long yu?
-
Hau bai yu inap “skelim gut wanem ol samting i bikpela samting moa”?
-
Wai na yu mas askim Jehova long helpim yu long stadi yet long Baibel?
MEKIM WOK PAINIMAUT
Skelim 4-pela rot we i helpim planti man long yusim gut taim bilong ol.
“Hau Long Yusim Gut Taim Bilong Yu” (Kirap!, Februeri 2014)
Lukim hau Jehova i helpim wanpela meri em man bilong em i no kliagut long wai na em i wok strong long amamasim God.
Lukim hau pasin bilong wanpela meri long i no givap i helpim man bilong em.
Sampela taim ol man i sutim tok long ol Witnes Bilong Jehova olsem ol i save brukim famili. Yu ting dispela tok em tru?
“Ol Witnes Bilong Jehova i Save Brukim Ol Famili o Strongim Ol?” (Atikol long websait)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
