SAMBIRO 12
Kasi Ntchivichi Chingamovwirani Kuti Mulutilire Kusambira Baibolo?
Mungasanga chandulo para mukusambira Baibolo. Kweni ntchipusu yayi kusambira Baibolo. Nyengo zinyake mungamba kukayika usange mulutilirenge kusambira. Chifukwa wuli mukwenera kuŵikapo mtima kuti mulutilire kusambira Baibolo? Kasi ntchivichi chingamovwirani kuti muzizipizge masuzgo?
1. Chifukwa wuli kusambira Baibolo nkhwakuzirwa chomene?
“Mazgu gha Chiuta ngamoyo na ghankhongono.” (Ŵahebere 4:12) Baibolo ndakuzirwa chomene chifukwa muli maghanoghano gha Yehova agho wakuphalira imwe. Lingamovwirani kumanya vinjeru vya Chiuta kweniso ivyo wamulayizgani munthazi. Kweni chakuzirwa chomene ntchakuti lingamovwirani kuŵa paubwezi na Yehova. Para mukusambira Baibolo limovwiraninge kuti muŵe na umoyo uwemi.
2. Chifukwa wuli ntchakuzirwa kumanya unenesko wa mu Baibolo?
Unenesko wa mu Baibolo uli nga ni chuma cha mtengo wapatali. Lekani Baibolo likutichiska kuti “gura unenesko, ungawuguliskanga chara.” (Zintharika 23:23) Para tamanya kuti unenesko wa mu Baibolo ngwakuzirwa chomene, vitovwirenge kuti tilimbikirenge chomene kuliŵazga nanga tingatangwanika.—Ŵazgani Zintharika 2:4, 5.
3. Kasi Yehova wangamovwirani wuli kuti mulutilire kusambira Baibolo?
Pakuŵa Mlengi Wankhongonozose kweniso mubwezi winu, Yehova wakukhumba kumovwirani kuti musambirenge vya iyo. Iyo wangamupani “khumbo kweniso nkhongono kuti muchite vyose ivyo wakukhumba.” (Ŵazgani Ŵafilipi 2:13.) Wangamovwirani kuti muŵe na khumbo lakusambira na kulondezga ivyo mukusambira. Wangamupaniso nkhongono kuti mulimbane na masuzgo kweniso ŵanthu para ŵakumususkani. Lombani Yehova kuti wamovwirani kulutilira kusambira Baibolo.—1 Ŵatesalonika 5:17.
MANYANI VINANDI
Wonani ivyo mungachita kuti mulutilire kusambira Baibolo nangauli mungatangwanika chomene panji ŵanyake ŵangamususkani. Ndipo wonani umo Yehova wangamovwilirani kuti mulutilire kusambira Baibolo.
4. Muwonenge kuti kusambira Baibolo nkhwakuzirwa chomene
Nyengo zinyake tikutangwanika chomene mwakuti tingawona kuti tilije nyengo yakusambilira Baibolo. Kasi ntchivichi chingamovwirani kuti mulutilire kusambira Baibolo? Ŵazgani Ŵafilipi 1:10, kufuma apo dumbiskanani mafumbo agha:
-
Kasi mukuwona kuti “vinthu vyakuzirwa chomene” ni vichi pa umoyo?
-
Kasi mungachita wuli kuti kusambira Baibolo kuŵenge pakwamba pa umoyo winu?
-
Para mwamba kuŵika mchenga mu pelo, mbwenu malibwe ghanyake ghasoŵenge malo
-
Para mwamba kuŵika malibwe, mbwenu mchenga unandi unjirenge. Mwakuyana waka, usange mukuŵika pakwamba “vinthu vyakuzirwa chomene” pa umoyo winu, mbwenu muŵenge na nyengo yinandi yakuchitiraso vinthu vinyake
Para tikusambira Baibolo tikukhorweska njara yithu yauzimu, tikumumanya makora Chiuta ndipo tikumusopa. Ŵazgani Mateyu 5:3, kufuma apo dumbiskanani fumbo ili:
-
Kasi tingasanga chandulo wuli para kusambira Baibolo ndiko kukuŵa pakwamba pa umoyo withu?
5. Zizipizgani para ŵakumususkani
Nyengo zinyake ŵanthu ŵangamugongoweskani kuti muleke kusambira Baibolo. Mwachiyelezgero, wonani ivyo vikachitikira Francesco. Wonelerani VIDIYO, kufuma apo dumbiskanani mafumbo agha.
-
Kuyana na ivyo mwawona mu vidiyo, kasi ŵanyake ŵa Francesco kweniso ŵabali ŵake ŵakachita wuli wati waŵaphalira ivyo wakasambiranga?
-
Kasi wakasanga vitumbiko wuli chifukwa cha kuzizipizga?
Ŵazgani 2 Timote 2:24, 25, kufuma apo dumbiskanani mafumbo agha:
-
Kasi ŵanyinu kweniso ŵabali ŵinu ŵakumuwonani wuli para mukusambira Baibolo?
-
Kuyana na mavesi agha, kasi mungachita wuli usange ŵanyake ŵakukondwa yayi kuti mukusambira Baibolo? Chifukwa wuli?
6. Thembani Yehova
Para tamba kuŵa paubwezi na Yehova tikwamba kuŵikapo mtima chomene kuchita ivyo vingamukondweska. Kweni nyengo zinyake chingaŵa chakusuzga kusintha vinthu vinyake na kuchita ivyo vingamukondweska. Kweni kugongowa yayi usange mukuwona kuti vikumusuzgani. Yehova wangamovwirani. Wonelerani VIDIYO, kufuma apo dumbiskanani mafumbo agha.
-
Kuyana na ivyo mwawona mu vidiyo, kasi Jim wakasintha vichi kuti wakondweske Yehova?
-
Kasi ntchivichi chamukondweskani na umo wakachitira?
Ŵazgani Ŵahebere 11:6, kufuma apo dumbiskanani mafumbo agha:
-
Kasi Yehova wakuchita wuli na awo “ŵakumupenja na mtima wose” kung’anamura ŵanthu awo ŵakukhumba kumumanya na kumukondweska?
-
Kasi mukuwona kuti Yehova wakujipulika wuli para wakuwona kuti mukuŵikapo mtima kusambira Baibolo?
ŴANYAKE ŴANGAFUMBA KUTI: “Chifukwa wuli mukusambira Baibolo?”
-
Kasi mungazgora wuli?
MWAKUDUMURA
Nangauli ntchipusu yayi kusambira Baibolo, kweni kungamovwirani kuŵa ŵakukondwa kwamuyirayira. Lutilirani kuthemba Yehova, ndipo wazamumutumbikani.
Kuweleramo
-
Chifukwa wuli unenesko wa mu Baibolo ngwakuzirwa kwa imwe?
-
Kasi mungachita wuli kuti “musande ivyo ni vinthu vyakuzirwa chomene”?
-
Chifukwa wuli mukwenera kulomba Yehova kuti wamovwirani kulutilira kusambira Baibolo?
SANGANI FUNDO ZAKUSAZGIKIRA
Wonani vinthu vitatu ivyo vyawovwira ŵanthu ŵanandi kuti ŵagwiliskirenge ntchito mwamahara nyengo yawo.
“Kasi Mungachita Wuli Kuti Mugwiliskirenge Makora Ntchito Nyengo Yinu?” (Wukani!, Febuluwale 2014)
Wonani umo Yehova wakawovwilira mwanakazi munyake uyo mfumu wake wakapulikiskanga yayi chifukwa icho wakaŵikirapo mtima kukondweska Chiuta.
Wonani umo mwanalume munyake wakasangira chandulo chifukwa cha kuzizipizga kwa muwoli wake.
Nkhakhumbanga Kumanya Usange Ivyo Ŵakusambizga Ni Vyaunenesko (6:30)
Ŵanthu ŵanyake ŵakuti Ŵakaboni ŵa Yehova ŵakumazga nthengwa za ŵanthu, kasi mbunenesko?
“Kasi Ŵakaboni ŵa Yehova Ŵakumazga Panji Ŵakukhozga Nthengwa?” (Nkhani ya pa Intaneti)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
