MATAUPU 12

Ne a Mea ka Fesoasoani Atu ke Tumau Tou Sukesuke ki te Tusi Tapu?

FAKATAGI/PEI

A te sukesuke ki te Tusi Tapu se mea fakafiafia, kae e se faigofie faeloa ke fai penā. I nisi taimi, kāti ka mafaufau koe me e mata, ka mafai o tumau koe i te sukesuke ki te Tusi Tapu. Kaia e aoga malosi ei au taumafaiga ke fakatumau tau sukesukega? Ne a mea ka fesoasoani atu ke fakatumau faitalia a mea faiga‵ta?

1. Kaia e tāua ei a te sukesuke ki te Tusi Tapu?

“Te muna a te Atua e ola kae ‵mana.” (Epelu 4:12) E tāua ‵ki a te Tusi Tapu me e fakaasi atu ei a mafaufauga mo lagonaga o te Atua ki a koe. E fesoasoani mai ei ke maua ne koe a te iloaga kae penā foki mo te poto tonu mo te fakamoemoega. Kae sili atu i ei, e fesoasoani atu a te Tusi Tapu ke fai koe mo taugasoa o Ieova. Kafai e sukesuke koe ki te Tusi Tapu, ko talia ei ne koe ke fesoasoani atu a te ‵mana i ei ki te faiga ke momea aka te ‵lei o tou olaga.

2. Kaia e aoga ei ke iloa ne koe a te tāua o te munatonu i te Tusi Tapu?

A munatonu i te Tusi Tapu e fai pelā me ne koloa tāua ‵ki. Tenā te pogai e fakamalosi mai te Tusi Tapu ke “‵togi mai te munatonu kae ke mo a eiloa ma fakatau atu ki tua.” (Faataoto 23:23) Kafai e masaua faeloa ne tatou a te tāua o te munatonu i te Tusi Tapu, e taumafai malosi tatou ke tumau i te suke‵suke ki ei—faitalia a mea faiga‵ta e fe‵paki mo tatou.—Faitau te Faataoto 2:4, 5.

3. E mafai pefea o fesoasoani atu a Ieova ke tumau i tau sukesukega?

E pelā me ko tou Mafuaga mo tou Taugasoa malosi katoatoa, e manako a Ieova ke fesoasoani atu ki a koe ke tauloto e uiga ki a ia. E mafai o tuku atu ne ia ki a koe a ‘te fiafia mo te ‵mana ke galue.’ (Faitau te Filipi 2:13.) Tela la, i nisi taimi kafai e manako koe ki se fakamalosiga ke tumau tau sukesukega io me ke fakagalue aka au mea ne tauloto, e mafai o fesoasoani atu a ia. Kafai e manako koe ki se malosi fakaopoopo ke manumalo i fakalavelave io me ko ‵tekemaiga, e mafai o tuku atu ne ia. Ke akai atu faeloa ki a Ieova e auala i ‵talo ke fesoasoani atu ke tumau koe i te sukesuke ki te Tusi Tapu.—1 Tesalonia 5:17.

KELI MALOSI IFO

Tauloto ki auala e mafai ei o tumau koe i te sukesuke ki te Tusi Tapu faitalia tou fakalavelave io me ko ‵tekemaiga mai nisi tino. Ka oti ko mafaufau ei ki auala ka fesoasoani atu a Ieova ke tumau tau sukesukega.

4. Ke fakamuamua au sukesukega ki te Tusi Tapu

I nisi taimi ko tō fakalave‵lave tatou i mea o te olaga telā ko foliga mai me ko se lava ‵tou taimi ke suke‵suke ki te Tusi Tapu. Se a te mea e mafai o fesoasoani atu? Faitau te Filipi 1:10, ko sau‵tala i ei ki fesili konei:

Se a tau faka‵tau, ne a mea i te olaga “kolā e sili atu i te tāua”?
E fakamuamua pefea ne koe au sukesukega ki te Tusi Tapu?

Kafai e faka‵fonu ne koe se paketi ki one, kae taumafai o ‵fao a fatu ki loto ka se ofi a fatu
Kafai e ‵fao muamua ne koe a fatu ki loto, ka mafai o ofi a te ukega o one ki loto i te paketi. I se auala tai ‵pau, kafai e fakamuamua ne koe i tou olaga a “mea kolā e sili atu i te tāua” ka mafai o fakataunu ne koe a mea konā kae koi lava te taimi mō nisi mea

A te sukesuke ki te Tusi Tapu e fakama‵lie aka i ei a ‵tou manakoga faka-te-agaga—ko te manakoga ke iloa kae tapuaki atu ki te Atua. Faitau te Mataio 5:3, ko sau‵tala ei ki te fesili tenei:

E aoga pefea ki a tatou māfai e fakamuamua ‵tou sukesukega ki te Tusi Tapu?

5. Ke tumau i ei faitalia a ‵tekemaiga

I nisi taimi e taumafai a nisi tino o faka‵tuka koe ke mo a ma sukesuke ki te Tusi Tapu. Mafaufau ki te tala o Francesco. Pei te VITIO, ko sau‵tala ei ki fesili konei.

VITIO: Ne Taui Atu ki Tena Tumau i ei (5:22)

I te vitio, ne ‵saga atu pefea a taugasoa mo kāiga o Francesco i te taimi ne fakaasi ne ia ana mea ne tauloto?
Ne taui atu pefea ki tena tumau i ei?

Faitau te 2 Timoteo 2:24, 25, ko sau‵tala ei ki fesili konei:

Ne a lagonaga o ou kāiga mo taugasoa e uiga ki au mea e tauloto?
E ‵tusa mo fuaiupu konei, ne a au mea e ‵tau o fai māfai ko se fiafia se tino ki tau sukesukega ki te Tusi Tapu? Kaia?

6. Fakalagolago ki a Ieova ke fesoasoani atu

Kafai ko gasolo aka te ‵pili o te ‵tou va mo Ieova, ka gasolo aka foki te ‵tou fia fakafiafia atu ki a ia. Kae e mafai loa o faigata ki a tatou ke fakafetaui aka ‵tou olaga ki ana tulaga. Kafai e penā foki ou lagonaga ke mo a ma ‵fiu. Ka fesoasoani atu a Ieova. Pei te VITIO, ko sau‵tala ei ki fesili konei.

VITIO: E Fesoasoani Mai a Ieova ke ‵Fuli ‵Tou Olaga (3:56)

I te vitio, ne a ‵fuliga ne fai ne Jim ke fakafiafia atu ki a Ieova?
Ne a ana mea ne fai e ‵gali ki a koe?

Faitau te Epelu 11:6, ko sau‵tala ei ki fesili konei:

Ne a mea ka fai ne Ieova ki a latou kolā e “‵sala malosi ki a ia”—ko latou kolā e taumafai malosi ke iloa kae fakafiafia atu ki a ia?
Se a te mea e fakaasi mai i konei e uiga ki lagonaga o Ieova māfai ko kilo atu ki au taumafaiga ke sukesuke ki te Tusi Tapu?

MEA E FAI MAI NE NISI TINO: “Kaia e sukesuke ei koe ki te Tusi Tapu?”

Ka tali atu pefea koe ki ei?

MANATU AOGA

E tiga eiloa e se faigofie ke sukesuke ki te Tusi Tapu, kae e mafai o fesoasoani atu ke maua ne koe te ola se-gata-mai. Tumau i te fakalagolago ki a Ieova, kae ka taui atu ne ia ki a koe.

Fesili

Kaia e tāua ei ki a koe a muna‵tonu i te Tusi Tapu?
E fakamautinoa aka pefea ne koe a “mea kolā e sili atu i te tāua”?
Kaia e ‵tau ei o akai atu koe ki a Ieova ke fesoasoani atu ke tumau tou sukesuke ki te Tusi Tapu?

Taimi ne oti ei te vaega tenei:

Mea e Mafai o Fai

Ke fakatumau te faiga o tau akoga faka-te-Tusi Tapu fakatasi i te vaiaso. Kafai ko fakalavelave koe i te taimi e fai sāle ei, ‵sala a te suā taimi ke fai ei tau akoga.

Nisi mea:

Nisi mea e mafai o fai ne koe