OCIPAMA 12
Nye ci ka ku Kuatisa Oku Amamako Oku Lilongisa Embimbiliya?
Oku tanga Embimbiliya ku sokisiwa lungende umue u sanjuisa. Pole, olonjanja vimue ka ca lelukile oku ci linga. Pamue, o kuata atatahãi nda okuti, o kamamako oku lilongisa Embimbiliya. Momo lie ci kuetele esilivilo oku likolisilako oku amamako oku ci linga? Nye ci ku kuatisa oku pandikisa ndaño lovitangi?
1. Momo lie ci kuetele esilivilo oku lilongisa Embimbiliya?
“Ondaka ya Suku yi kasi lomuenyo kuenda yi kuete unene.” (Va Heveru 4:12) Embimbiliya li kuete esilivilo omo okuti, li situlula ovisimĩlo via Suku leci a yevite catiamẽla kokuetu. Lekuatiso Liembimbiliya o ka lilongisa ovina viokaliye, o kuata olondunge viocili kuenda elavoko. Ocina ca velapo ceci okuti, Embimbiliya li ku kuatisa oku kala ekamba lia Yehova. Poku lilongisa Embimbiliya, wecelela okuti unene walio u pongolola ekalo liomuenyo wove.
2. Momo lie ca sungulukila oku tenda ocili Cembimbiliya ndocina ci kuete esilivilo?
Ocili ci sangiwa Vembimbiliya, ci sokisiwa ndovokuasi a kuete esilivilo lialua. Eli olio esunga lieci Embimbiliya li tu vetiyila ndoco: “Landa ocili kuenda lalimue eteke ku ka ci landise.” (Olosapo 23:23) Nda tua kapako esilivilo liocili Cembimbiliya, tu ka likolisilako oku amamako oku lilongisa ndaño ceci tu liyaka lovitangi.—Tanga Olosapo 2:4, 5.
3. Yehova o ku kuatisa ndati oku amamako oku lilongisa?
Ukuonene wosi haeye Ululiki kuenda Ekamba liove Yehova, o yongola oku ku kuatisa oku lilongisa catiamẽla kokuaye. Eye o pondola oku “wĩhi onjongole longusu yoku linga ovina.” (Tanga Va Filipoi 2:13.) Kuenje nda o sukila vali onjongole yoku lilongisa, ale oku kapako eci wa lilongisa, eye o ku kuatisa. Nda o sukila vali ongusu oco o yule ovitangi, ale elambalalo, eye o pondolavo oku linga esokiyo liaco. Olonjanja viosi, likutilila ku Yehova oco a ku kuatise oku amamako oku lilongisa Embimbiliya.—1 Va Tesalonike 5:17.
LILONGISA ONDONGOSI
Kũlĩhĩsa ndomo wamamako oku lilongisa Embimbiliya ndaño esokiyo liove liotembo ka lia lelukile, ale lelambalalo. Kũlĩhĩsavo ndomo Yehova a ka ku kuatisa oco ku ka liwekepo.
4. Lekisa okuti wa velisapo elilongiso liove Liembimbiliya
Pamue tu kuata asakalalo alua kuenje tu sima okuti, ka tu kuete otembo yoku lilongisa Embimbiliya. Nye ci kuatisa? Tanga Va Filipoi 1:10, noke konomuisa apulilo a kuãimo:
-
Nye o sima okuti, oco “ovina via velapo vali” komuenyo?
-
O lekisa ndati okuti wa velisapo elilongiso liove Liembimbiliya?
-
Nda wa seteka oku yukisa tete eseke vociyenjo noke o vokiyako ovawe, ocili okuti ka a suimo
-
Nda wa kapa tete ovawe, o pondola oku kapamovo eseke lialua. Cimuamue haico okuti, nda wa pitisa kovaso “ovina via velapo vali,” o ka vi tẽlisa loku kuata otembo yalua yoku linga ovina vikuavo
Oku lilongisa Embimbiliya, cupa enyona lietu konepa yespiritu ale esukila tu kuete lioku kũlĩha loku fendela Suku. Tanga Mateo 5:3, noke konomuisa epulilo li kuãimo:
-
Tu kuatisiwa ndati nda tu pitisa kovaso elilongiso lietu Liembimbiliya?
5. Pandikisa poku liyaka lelambalalo
Pamue, vakuetu va seteka oku tu yapuisa oco ka tu ka lilongise vali Embimbiliya. Kũlĩhĩsa ulandu wa Francesco. Tala OVIDEO, noke konomuisa apulilo a kuãimo.
-
Vovideo, akamba kuenda epata lia Francesco, nye va linga eci eye a va sapuila catiamẽla kueci a kala oku lilongisa?
-
Asumũlũho api eye a tambula omo lioku pandikisa?
Tanga 2 Timoteo 2:24, 25, noke konomuisa apulilo a kuãimo:
-
Epata, lakamba vove, nye va sima omo lieci o kasi oku lilongisa?
-
Ndomo ca lekisiwa vovinimbu evi, nye o linga nda umue ka sanjukila elilongiso liove Liembimbiliya? Momo lie?
6. Kolela okuti Yehova o ku kuatisa
Osimbu ukamba wetu la Yehova u pama, onjongole yetu yoku u sanjuisa yi livokiya. Lopo, ci tĩla oku linga apongoloko komuenyo oco tu ambate omuenyo ndomo a yongola. Nda o liyevite ndoco, ku ka liwekepo. Yehova o ku kuatisa. Tala OVIDEO, noke konomuisa apulilo a kuãimo.
-
Vovideo, apongoloko api Jim a linga oco a sanjuise Yehova?
-
Nye ci ku komõhisa kulandu waye?
Tanga Va Heveru 11:6, noke konomuisa apulilo a kuãimo:
-
Nye Yehova a ka lingila ku vana vo “sanda lutima wosi”—ale ku vana va likolisilako oku u kũlĩha loku u sanjuisa?
-
O sima okuti Yehova o kala ndati eci a limbuka alikolisilo ove oku lilongisa Embimbiliya?
UMUE PAMUE O PULA: “Momo lie o lilongisila Embimbiliya?”
-
Nda wa tambulula ndati?
NYE WA LILONGISA?
Ndaño pamue ka ca lelukile, oku lilongisa Embimbiliya, ci ku kuatisa oku sanjukila omuenyo otembo ka yi pui. Amamako oku kolela Yehova kuenje eye o ka ku sumũlũisa.
Oku Pitulula
-
Momo lie ocili Cembimbiliya ci kuetele esilivilo kokuove?
-
O lekisa ndati okuti wa kapako “ovina via velapo vali”?
-
Momo lie o sukilila oku pinga ku Yehova oco a ku kuatise oku amamako oku lilongisa Embimbiliya?
OCO O KŨLĨHE OVINA VIKUAVO
Kũlĩhĩsa ovina vikuãla via kuatisa valua oku talavaya ciwa lotembo yavo.
“Ndomo o Talavaya Ciwa Lotembo Yove” (Omasuli!, Kayovo 2014)
Ulume umue ka kuatele elomboloko lieci ukãi waye a likolisilileko oku vumba Suku. Tala ndomo Yehova a kuatisa ukãi waco
Tala ndomo ulume umue a kuatisiwa lepandi liukãi waye.
Pamue Olombangi Via Yehova vi lundiliwa okuti, vi tepa apata. Anga hẽ eci ocili?
“Olombangi Via Yehova vi Tepa, Ale vi Kapa Vomunga Apata?” (Ocipama ci sangiwa lika vo Internet)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
