KAPITE 12
Kotea Ka Tokoni Atu Ke Hoko Atu Te Fai ʼo Tau Ako?
Ka ke faifolau, ʼe lahi te ʼu koga meʼa matalelei ʼe ke alu ʼo mamata. Kae ʼe mahino ia, ʼe ʼi ai anai he ʼu fihifihi ʼe feala ke ke tau mo ia. Pea ʼe toe feia pe mo te ako ʼo te Tohi-Tapu. ʼI ʼihi temi, ʼe feala ke ke feuiʼaki pe ʼe ke hoko atu anai. Kae he koʼe maʼuhiga ke ke hoko atu tau ako? Kotea ka tokoni atu ke ke kataki logo la te ʼu fihifihia?
1. He koʼe ʼe maʼuhiga te ako ʼo te Tohi-Tapu?
“Ko te folafola ʼa te ʼAtua ʼe maʼuli pea mo malohi.” (Hepeleo 4:12) ʼE maʼuhiga ia te Tohi-Tapu he ʼe fakaha ai te ʼu manatu ʼa te ʼAtua pea mo te ʼu meʼa ʼae ʼe ina logoʼi ʼo ʼuhiga mo koe. ʼE tokoni atu ke ke maʼu te ʼatamai malama, ʼo feia mo te poto pea mo he ʼamanaki. Pea ʼe toe tokoni atu ke ke kaumeʼa mo Sehova. Koia, ka ke ako te Tohi-Tapu, pea ʼe ke fiafia anai.
2. He koʼe ʼe tonu ke fakamaʼuhigaʼi te ʼu moʼoni Fakatohi-tapu?
He ʼe ko he ʼu koloa maʼuhiga ia. Koia ʼae ʼe ui fenei mai ai ʼi te Tohi-Tapu: “Totogi te moʼoni, pea ʼaua naa ke fakatau.” (Taʼaga Lea 23:23) Koia ʼe maʼuhiga te ʼu moʼoni Fakatohi-tapu. Kapau ʼe ke mahino ki te faʼahi ʼaia, pea ʼe mole he meʼa ʼe ina taʼofi anai te fai ʼo tau ako, maʼia pe ke tau mo ni faigataʼaʼia.—Lau ia Taʼaga Lea 2:4, 5.
3. ʼE tokoni feafeaʼi atu anai ia Sehova?
ʼE fia tokoni atu ia Sehova ke ke iloʼi ia ia he ʼe ko ia te Tupuʼaga Mafimafi pea ko tou Kaumeʼa. ʼE feala ke ina foaki atu “te fakaʼamu pea mo te malohi moʼo fakahoko ia meʼa fuli ʼae ʼe ina leleiʼia.” (Lau ia Filipe 2:13.) Koia, kapau ʼi ʼihi temi ʼe ke logoʼi ʼe ke fia tuku tau ako peʼe faigataʼa hau maʼuliʼi he manatu, ʼe tokoni atu anai ia Sehova. Faikole tuʼumaʼu kia te ia ke tokoni atu ke ʼaua naʼa ke lotovaivai kae ke hoko atu pe tau ako. Pea ʼe feala ke ina toe foaki atu te malohi moʼo tauʼi te fakafeagai peʼe ko ni fihifihia ʼe ke tau mo ia.—1 Tesalonika 5:17.
TA FAKALOLOTO
Ta vakaʼi pe ʼe ke lava hoko atu feafeaʼi tau ako logo la ʼe ke maʼumaʼua peʼe fakafeagai atu ʼihi. Pea ʼe ta toe vakaʼi pe tokoni feafeaʼi atu anai ia Sehova.
4. Ke takimuʼa kia koe te fai ʼo tau ako
ʼI ʼihi temi, ʼe lahi te ʼu meʼa ʼe tonu ke kita fai ʼo mole kei maʼu ai he temi ki takita ako. Kotea ʼe tonu ke kita fai? Lau ia Filipe 1:10, pea fai te ʼu fehuʼi ʼaeni:
-
Kia koe la, kotea “te ʼu meʼa ʼae ʼe maʼuhiga ʼaupito” ʼi te maʼuli?
-
Kotea ʼe feala ke ke fai ke takimuʼa ai kia koe tau ako?
-
Kapau ʼe ʼuluaki ʼai te moʼi one, ʼe mole hao anai te ʼu foʼi maka fuli
-
Kapau ʼe ʼuluaki ʼai te ʼu foʼi ʼmaka, ʼe hao fuli anai te moʼi one ki loto. ʼE toe feia pe, kapau ʼe ke fakamuʼamuʼa “te ʼu meʼa ʼae ʼe maʼuhiga ʼaupito,” ʼe ke lava fakahoko anai pea ʼe ke toe maʼu anai he temi ki te ʼu faʼahi fuli ʼae
ʼE maʼuhiga tatatou ako te Tohi-Tapu. Kotea tona tupuʼaga? He ʼe tou iloʼi ai te ʼaoga kia tatou te ʼu meʼa fakalaumalie, ko tona fakaʼuhiga te ʼaoga ʼae ke tou iloʼi te ʼAtua pea mo ʼatolasio kia te ia. Lau ia Mateo 5:3, pea fai te fehuʼi ʼaeni:
-
Kotea ʼe ke logoʼi moka ke fakamuʼamuʼa tau ako?
5. Ke ke kataki logo la te fakafeagai
ʼI ʼihi temi, ʼe faiga ʼihi ke natou fakalotovaivaiʼi koe ke tuku tau ako. Ta vakaʼi te faʼifaʼitaki ʼa Francesco. Vakaʼi te ʼATA VITEO, pea fai te ʼu fehuʼi ʼae ʼe hoa mai.
-
Neʼe kotea te manatu ʼa te ʼu kaumeʼa ʼo Francesco pea mo tana faʼe ʼi tana fakaha age te ʼu meʼa ʼae neʼe ina ako?
-
Kotea te ʼu lelei neʼe ina maʼu ʼi tana faʼa kataki?
Lau ia 2 Timoteo 2:24, 25, pea fai te ʼu fehuʼi ʼaeni:
-
Kotea te manatu ʼo tou famili mo ʼou kaumeʼa ki te ʼu meʼa ʼae ʼe ke ako?
-
ʼI tau lau te ʼu vaega ʼaeni, kotea ʼe tonu ke ke fai mo kapau ʼe ita he tahi ʼi tau ako te Tohi-Tapu? Kotea tona tupuʼaga?
6. Falala ki te tokoni ʼa Sehova
Ka ke fakaovi tuʼumaʼu kia Sehova, pea ʼe toe lahi age anai tau fia fakafiafiaʼi tona loto. Kae ʼe feala ke faigataʼa kia koe tau fakalogo ki ʼana lao pea mo fai ni fetogi ʼi tou maʼuli. Kapau koia, ʼaua naʼa ke lotovaivai he ʼe tokoni atu anai ia Sehova. Vakaʼi te ʼATA VITEO, pea fai te ʼu fehuʼi ʼae ʼe hoa mai.
-
Kotea te ʼu fetogi neʼe fai e Jim moʼo fakafiafiaʼi te loto ʼo Sehova?
-
Kotea ʼae neʼe malave kia koe ʼi tona hisitolia?
Lau ia Hepeleo 11:6, pea fai te ʼu fehuʼi ʼaeni:
-
Kotea ʼe fai e Sehova kia “natou ʼae ʼe natou kumi fakamalotoloto ia ia,” ia natou ʼae ʼe faiga ke natou iloʼi ia ia pea mo fakafiafiaʼi tona loto?
-
ʼI te vaega ʼaeni, ʼe leleiʼia koa e Sehova te ʼu faiga ʼe ke fai ʼo ʼuhiga mo tau ako? He koʼe ʼe ke manatu feia?
ʼE UI E ʼIHI: “He koʼe ʼe ke ako te Tohi-Tapu?”
-
Kotea anai tau tali?
MANATU TAFITO
Ka ke ako te Tohi-Tapu, ʼe ke maʼu ai anai te maʼuli heʼe gata. Kae ʼe ʼaoga ki ai ni faiga. Koia, falala tuʼumaʼu kia Sehova he ʼe ina tapuakinaʼi anai koe.
Fehuʼi Fakamanatu
-
He koʼe ʼe maʼuhiga kia koe te ʼu moʼoni Fakatohi-tapu?
-
ʼE feafeaʼi hau fakamuʼamuʼa “te ʼu meʼa ʼae ʼe maʼuhiga ʼaupito”?
-
He koʼe tonu ke ke kole te tokoni ʼa Sehova ke hoko atu tau ako?
TE TAHI ʼU MANATU
He ʼu pelesepeto ʼe fa ʼe tokoni ki te tokolahi ke natou fakaʼaogaʼi lelei tonatou temi.
“Comment bien gérer son temps” (Réveillez-vous !, février 2014)
Neʼe faiga he faʼe ke fiafia te ʼAtua, kae neʼe mole mahino ki ai tona ʼohoana. Neʼe tokoni feafeaʼi ia Sehova ki ai?
Te hisitolia ʼo he tagata neʼe kaumeʼa leva mo te ʼAtua ʼuhi ko te faʼa kataki ʼo tona ʼohoana.
ʼE tau tukugakoviʼi te kau Fakamoʼoni ʼa Sehova ʼuhi ko te mavetevete ʼo te ʼu famili. Kae ʼe moʼoni koa?