YOOSOMA 12
Eseeni En’ya Wookhaliherani Ohihiya Onsoma Biibiliya?
Moohaakanyerya onsoma Biibiliya etthu yootthuneya ninreerela nhu opaka. Masi opaka elo kahiyo etthu yookhweya. Woonawene ivaara dhikina munnuupuwela akhala wiira nnoowerya ohihiya onsoma Biibiliya. Ndho seeni munreerela nnyu ohihiya onsoma Biibiliya? Eseeni en’ya wookhaliherani ohihiya onsoma Biibiliya hata nvirihaka mixankiho?
1. Seeni eraawa etthu yootthuneya onsoma Biibiliya?
“Nuulumo na Muluku nikumi, ni nookhalana owerya wuulupale.” (aHeeberi 4:12) Otthuneya-wa onsoma Biibiliya okhala wiira onninikhalihera odhuwela muupuwelo wa Muluku ni moopora owo onnoonela iye. Nkhaliheriwaka ni Biibiliya, nnoowerya ohudha itthu ipheya nkhama mooopora wookhalana ekumi yoohakalaliha ni moopora wookhalana nlipelelo na nhoolo. Nitho etthu yootepa otthuneya, okhala wiira Biibiliya onawookhaliherani okhala nxirikha a Yehova. Vaavo nninsoma nnyu Biibiliya, munnihiya wiira owerya wa Nuulumo na Muluku orukunuse ekumi nnyu.
2. Seeni eraawa etthu yootthuneya ovaha efaita ele Biibiliya onhudhiha iye?
Ikhweeli dha mBiibiliyani dhinlikana ni nhakhu. Tivondho Biibiliya onlotta iye wiira ‘nithume ekhweeli ni nihithumihe.’ (Miruku 23:23) Vaavo ninvaha nhu efaita ele Biibiliya onhudhiha iye ninniilipihera ohihiya onsoma Biibiliya, hata dhiniphwanyaka mixankiho.—Munsome Miruku 2:4, 5.
3. Yehova on’ya wookhaliherani dhai ohihiya onsoma Biibiliya?
Yehova Mpattusa oowerya dhootheene ni nxirika nnyu. Owo onnoodhuwelani saana waaxira atthu ootheene ni ontthuna wiira mmudhuwele. Yehova onawoovahani ‘otthuna ni owerya ovara nteko.’ (Munsome aFilipi 2:13.) Ndho, akhala wiira ivaara dhikina nnookhulumuwa mwaansomaka Biibiliya aahiidho wooliperani weettela ele nhudhenre nnyu mBiibiliyani, Yehova onawookhaliherani. Nitho akhala wiira nnootthuna ikuru wiira nvilele okhoottiheriwa onsoma Biibiliya ni mixankiho dhikina, Yehova onookhala ni nyuwo wiira ookhalihereni. Nhihiye onvekela Yehova wiira akookhaliherani ohihiya onsoma Biibiliya.—1 aTesaloonika 5:17.
NHUDHE ITTHU DHIKINA
Moone moopora mun’ya nnyu ohihiya onsoma Biibiliya hata atthu akinaku yookhottihakani aahiidho mwaattakana miteko. Nitho moone moopora Yehova on’ya iye wookhaliherani wiira nhihiye onsoma Biibiliya.
4. Nvahe efaita onsoma Biibiliya
Ivaara dhikina ninnaattana miteko nihikakhalana okathi wa onsoma Biibiliya. Ndho eseeni en’ya onikhalihera? Munsome aFilipi 1:10, nuuvinya mwaakhule makoho anttharelana:
-
Itthu seeni nnoona nnyu okhala “dhootepa otthuneya” mweekumini?
-
Mun’ya woonihera dhai wiira munniva efaita yoosoma nnyu ya Biibiliya?
-
Akhala wiira nnoopacera ohela mithaaka mpaaltini, nuuvinya nkahelamo maluku, maluku awo kan’yamo ootheene.
-
Masi akhala wiira mumpacera ohelamo maluku, mithaaka inooyamo dhootheene. Emodha-modharu, akhala wiira nnoopacera ovara ‘itthu dhootepa otthuneya’ dha mweekumini mwinyu, nnookhalana okathi wiira nvare itthu dhikina.
Onsoma Biibiliya onnimaliha ntthona nihu noonnepani, niire dho ondhuwela saana Muluku ni onkokhorela. Munsome Matheyo 5:3, nuuvinya mwaakhule nikoho ninttharelana:
-
Mireerelo seeni nin’ya nhu ophwanya navaha efaita yoosoma nhu ya Biiibiliya?
5. Nhaakhulele atthu akina woohihani onsoma Biibiliya
Ivaara dhikina, atthu akinaku pooti woohihanani onsoma Biibiliya. Moone ntakihero na Francesco. Moone EVIIDIYU, nuuvinya mwaakhule makoho anttharelana:
-
Nkhama monne nnyu eviidiyu, amudhi ni axirikha a Francesco yoonenle dhai noomala yeene waaleela itthu aakhupali iye?
-
Ndho ovilela-we waatthuveliwe dhai?
Munsome 2 Timootheyo 2:24, 25, nuuvinya mwaakhule makoho anttharelana:
-
Amudhi nnyu ni axirikha nnyu anoonela dhai itthu munhudhera nnyu?
-
Moovarihana ni iveersu idha, eseeni munreerela nnyu opaka akhala wiira ookhala ntthu ohindhiveliwa ni yoosoma nnyu ya Biibiliya? Mwaha wa seeni?
6. Nroromele wiira Yehova onawookhaliherani
Vaavo nintepa nhu omwaattamela Yehova, elo enniniiriha otthuna onhakalaliha. Masi hata eri dhiidho, pooti oniliperya opaka marukunuso mweekumini mwihu wiira nikhale moovarihana ni ele ontthuna iye. Akhala wiira nnoona dhiidho, nhooceye. Yehova onawookhaliherani opaka marukunuso wiira munhakalalihe. Moone EVIIDIYU, nuuvinya mwaakhule makoho anttharelana:
-
Nkhama moone nnyu eviidiyu, marukunuso seeni Jim aapanke iye wiira anhakalalihe Yehova?
-
Esseni yoodhivenleni ni yoowiraneya ya Jim?
Munsome aHeeberi 11:6, nuuvinya mwaakhule makoho anttharelana:
-
Yehova on’ya owiirelani atthu ale “animwaadhya ni nrima-ya wootheene”, niire dho, ale aniilipihera ondhuwela ni onhakalaliha?
-
Yehova onoonela dhai awoonakani mwiilipiheraka onsoma Biibiliya?
ATTHU AKINAKU YOOKOHANI WIIRA: “Etthu seeni eniwiirihani onsoma Biibiliya ni Anamoona a Yehova?”
-
Mun’ya waakhula dhai?
WUULUULA
Ekhweeli wiira onsoma Biibiliya wookhalana mixankiho. Masi opaka elo, enawookhaliherani okhala oohakalala mahiku ootheene. Nhihiye onroromela Yehova, owo onawooreelihani vawaatta.
Ipontu Dhuulupale
-
Seeni ikhweeli dha mBiibiliyani dhiri awa nhakhu nnyu muulupale?
-
Mun’ya woonihera dhai wiira munnivaha efaita ‘itthu dhootepa otthuneya’?
-
Seeni muntthuneya nnyu onvekela Yehova wiira ookhalihereni ohihiya Onsoma Biibiliya?
NTHOKODHE ITTHU DHIKINA
Nsome itthu sese dhakhalihenre atthu awaata orumeela saana okathi-ya.
“Moopora Woorumeela Saana Okathi Nnyu” (Despertai!, Fevereiro de 2014)
Mamune Grace khaadhuwela etthu yaawiiriha amwaariye otthuna onrumeela Muluku. Moone moopora Yehova onkhalihenre iye.
Yehova Onninivaha Ikuru Wiira Niwerye Ovilela Mixankiho Dhihu (5:05)
Moone moopora ovilela wa amwaariye wankhalihenre awa anlopwana.
Ivaara dhikina Anamoona a Yehova annootheriwa wiira annimwarya imudhi. Niire elo ekhweeli?
“Niire Anamoona a Yehova Anoomwarya Aahiidho Anawaataaniha Imudhi?” (Mwaha ori nsaaitini jw.org)
