GURUY NI 12
Mang e Ra Ayuwegem ni Ngam Ulul ko Fol Bible?
Ba fel’ ni ngan fil e Bible, machane gathi gubin ngiyal’ nib mom ni ngan rin’ e re n’ey. Yu ngiyal’ e sana ga ra lemnag ko rayog ni ngam ulul ko fol Bible fa danga’. Machane mang nib ga’ fan ni ngam athamgil ni ngam ulul i rin’ e re n’ey? Ma mang e ra ayuwegem ni nge dab mu tal ni yugu aram rogon ni ga be mada’nag e magawon?
1. Mang nib ga’ fan ni ngan fil e Bible?
“Thin rok Got e ba fos ma ba’ gelngin ni ma maruwel.” (Hebrews 4:12) Ba ga’ fan e Bible ya be tamilangnag rogon laniyan’ Got nge rogon ni ma lemnagem. Gathi kemus nra ayuwegem ni nge yag e bin riyul’ e tamilangan’ ngom, ya ku arrogon e gonop nge athap. Ma bin th’abi ga’ fan riy e ra ayuwegem ni ngam mang fager rok Jehovah. Nap’an ni ga ra fil e Bible, ma aram e ga be pag gelngin e thin riy ni nge fal’eg e par rom.
2. Mang nib ga’ fan ni ngam nang feni ga’ fan e tin riyul’ u Bible?
Tin riyul’ u Bible e bod e machaf nib tolang puluwon. Aram fan ni be pi’ e Bible e athamgil ngodad ni ngad guyed rogon ni nge yag e tin riyul’ ngodad ma ‘dab da pied ni chuway’.’ (Proverbs 23:23) Faanra ud lemnaged feni ga’ fan e tin riyul’ u Bible, ma aram e gad ra athamgil ni ngad ululgad ko fol Bible ngki mada’ ko ngiyal’ ni kad mada’naged e magawon.—Mu beeg e Proverbs 2:4, 5.
3. Uw rogon nra ayuwegem Jehovah ni ngam ulul ko fol Bible ni ga be tay?
Bochan ni Jehovah e ir e En Ke Sunmiyem ni gubin ma rayog rok maku ir e Fager rom, ma baadag ni nge ayuwegem ni ngam fil murung’agen. Rayog ni nge ‘pingeg lanin’um ni nge m’agan’um ngay ni ngam fol ko tin ni be finey.’ (Mu beeg e Filippi 2:13.) Ere faanra bay yu ngiyal’ nib t’uf be’ ni nge pi’ e athamgil ngom ni ngam ulul ko fol Bible ara ngam fol ko n’en ga be fil, ma rayog ni nge ayuwegem. Ma faanra ba t’uf be’ ni nge pi’ gelngim ni ngam gel ko magawon ara togopuluw ni ga be mada’nag, ma rayog ni nge pi’ gelngim. Um meybil ngak Jehovah ni gubin ngiyal’ ni nge ayuwegem ni ngam ulul ko fol Bible ni ga be tay.—1 Thessalonika 5:17.
KUM FIL BOCH BAN’EN U MURUNG’AGEN
Mu fil rogon nrayog ni ngam ulul ko fol Bible ni yugu aram rogon ni boor pa’ u puluwom ara be togopuluw e girdi’ ngom, nge rogon nra ayuwegem Jehovah ni ngam ulul ko fol Bible.
4. Mu guy rogon ni ngari ga’ fan u wan’um e fol Bible ni ga ma tay
Yu ngiyal’ e rayog ni ngad lemnaged ni kaygi yoor pa’ nga puluwdad ndakuriy e tayim ni ngad filed e Bible. Ere mang e rayog ni nge ayuwegdad? Be yog e Filippi 1:10, NW ni “ngam mel’eg e tin ir e th’abi ga’ fan. Me yag ni um par ni kam gilaf nga orel ko urngin mit e kireb me yag ndab mu rin’ ban’en nra magawonnag laniyan’ be’ nge mada’ ko chirofen nra sul Kristus riy.” Mu weliyew e fulweg ko gal deer ni baaray:
-
Mang boch ban’en ni ga be lemnag ni “ir e th’abi ga’ fan” u lan e yafos rodad?
-
Uw rogon ni ngari ga’ fan u wan’um e fol Bible ni ga ma tay?
-
Ga ra suguy e yan’ nga lan ba pakit ngemu’ mag af e malang ngay, ma dabi taw fapi malang ngay ni urngin
-
Ga ra m’oneg e malang nga t’ay fare pakit, ma rayog ni nge taw yooren fapi yan’ nga langgin. Ere ku arrogon ni faan ga ra m’oneg e “tin ir e th’abi ga’ fan” u lan e yafos rom, ma aram e rayog ni ngam rin’ e n’en nib ga’ fan ni ngam rin’ miki yib e tayim rom ni ngam rin’ yugu boch ban’en
Gad ra fil e Bible, ma aram e gad ra nang Got ma gad liyor ngak, ma re n’ey e ban’en nib t’uf rodad. Mu beegew e Matthew 5:3, mi gimew weliy e fulweg ko re deer ni baaray:
-
Faanra ga’ fan u wan’dad e fol Bible ni gad ma tay, ma mang angin nra yib ngodad?
5. Dab mu tal ni yugu aram rogon ni yibe togopuluw ngom
Yu ngiyal’ e rayog ni nge guy boch e girdi’ rogon ni ngar muleged lanin’um ko fol Bible. Mu lemnag e n’en ni buch rok Francesco. Mu yaliyew e re VIDEO ney, mi gimew weliy e fulweg ko gal deer ni baaray.
-
Mang e rin’ e pi fager rok Francesco nge chitiningin u nap’an ni yog ngorad e n’en be fil?
-
Uw rogon nni tow’athnag ni bochan e de tal ko fol Bible?
Mu beegew e 2 Timothy 2:24, 25, mi gimew weliy e fulweg ko pi deer ni baaray:
-
Uw rogon u wan’ e tabinaw rom nge pi fager rom e n’en ga be fil?
-
Mang e susun ni ngam rin’ ni faanra dabun be’ ni ga be fil e Bible nrogon nib puluw ko pi thin ney? Mang fan?
6. Mu taga’ ngak Jehovah ni nge ayuwegem
Nap’an ni gad ra chugur ngak Jehovah, ma aram e gad ra adag ni ngad felfelan’naged. Yugu aram rogon ma rayog ni nge mo’maw’ ni ngad thilyeged boch ban’en u rarogodad ya nge puluw ko n’en nib m’agan’ ngay. Faanra buch e re n’ey rom ma dabi mulan’um, ya ra ayuwegem Jehovah. Mu yaliyew e re VIDEO ney, mi gimew weliy e fulweg ko gal deer ni baaray.
-
Mang boch ban’en ni thilyeg Jim u rarogon ya nge fel’ u wan’ Jehovah?
-
Mang e ga baadag ko n’en ni rin’?
Mu beegew e Hebrews 11:6, mi gimew weliy e fulweg ko gal deer ni baaray:
-
Mang e ra rin’ Jehovah ni fan ngak e “piin ni yad be gayiy,” ara piin yad be athamgil ni ngar nanged murung’agen mar felfelan’naged?
-
Ga be lemnag ma uw rogon laniyan’ Jehovah u nap’an nra guy ni ga be athamgil ni ngam fil e Bible?
RAYOG NI NGE GAAR BE’: “Mang fan ni ga be fil e Bible?”
-
Uw rogon ni ga ra fulweg?
N’EN KAN FIL
Yugu aram rogon ni gathi gubin ngiyal’ nib mom ni ngam fil e Bible, machane rayog ni nge ayuwegem ni ngam par ndariy n’umngin nap’an ni gab felfelan’. Mu ulul ni ngam taga’ ngak Jehovah me tow’athnagem.
Ngan Sul u Daken
-
Mang nib ga’ fan u wan’um e tin riyul’ u Bible?
-
Uw rogon ni “ngam mel’eg e tin ir e th’abi ga’ fan”?
-
Mang fan nsusun e nga mog ngak Jehovah ni nge ayuwegem ni ngam ulul ko fol Bible ni ga be tay?
MU GAY MURUNG’AGEN
Mu beeg murung’agen aningeg ban’en ni ke ayuweg boor e girdi’ ni ngar maruwelgad ko tayim rorad nib fel’ rogon.
Mu guy rogon ni ayuweg Jehovah be’ nib pin ni pumoon rok e da i tamilang u wan’ fan ni baadag ni nge rin’ e n’en nib m’agan’ Got ngay.
Mu guy angin ni yib ngak be’ nib pumoon ni bochan e de tal leengin ko fol Bible.
Bay yu ngiyal’ ni yima yog ni Pi Mich Rok Jehovah e yad ma wereg e tabinaw. Machane gur, riyul’ e re n’ey?
“Do Jehovah’s Witnesses Break Up Families or Build Them Up?” (Article ni bay ko website)
