XOOK 12
Maʼ u xuʼulul a kaanbal tiʼ le Bibliaoʼ
Jach ku taasik utsil u xoʼokol le Bibliaoʼ. Chéen baʼaleʼ yaan horaeʼ maʼ chéen chʼaʼabil u xoʼokliʼ, le oʼolal jeʼel u tuklik máak maʼ tu páajtal u seguer u xokikeʼ. Pero, ¿baʼaxten kʼaʼabéet u seguer a xokik? ¿Baʼax jeʼel u yáantkech utiaʼal u seguer a xokik kex ka yanaktech problemaseʼ?
1. ¿Jeʼel wa u yáantkech u xookil le Bibliaoʼ?
«U tʼaan Dioseʼ kuxaʼan yéetel yaan u páajtalil» (Hebreos 4:12). Le Bibliaoʼ ku yaʼaliktoʼon bix u tuukul Dios yéetel baʼax ku yuʼubik t-oʼolal. Tsʼoʼoleʼ ku yáantkoʼon utiaʼal u yantal k-naʼat, utiaʼal k-chʼaʼtuklik baʼax maʼalob yéetel ku tsʼáaiktoʼon esperanza. Pero u maas maʼalobileʼ ku yáantkoʼon utiaʼal k-bisikba maʼalob yéetel Jéeoba. Cada ken k-xokeʼ k-chaʼik u yáantkoʼon ichil k-kuxtal.
2. ¿Bix unaj a wilik le baʼax ku kaʼansik le Bibliaoʼ?
Le baʼax ku kaʼansik le Bibliaoʼ jach koʼoj u tojol. Le Bibliaoʼ ku yaʼalik: «Man le u jaajiloʼ, yéetel mix bikʼin ka a kone» (Proverbios 23:23). Wa mantatsʼ k-kʼaʼajsik lelaʼ mix bikʼin kun xuʼulul k-xokik kex ka yanaktoʼon problemas (xok Proverbios 2:4, 5).
3. ¿Bix jeʼel u yáantkech Jéeoba utiaʼal u seguer a xookeʼ?
Jéeobaeʼ jach u kʼaj óoloʼon tubeel, tsʼoʼoleʼ taak u yáantkoʼon tumen letiʼ beetmiloʼon yéetel k-amigo. Maʼ u tuʼubultecheʼ jeʼel ‹u tsʼáaiktech u tsʼíibolalil yéetel u páajtalil a beetik wa baʼaxeʼ› (xok Filipenses 2:13). Jéeobaeʼ jeʼel u yáantkech utiaʼal ka taakchajak a xook yéetel utiaʼal ka a tsʼáa ichil a kuxtal le baʼax ka kanikoʼ. Tsʼoʼoleʼ wa yaantech problemas bey xan wa yaan máaxoʼob u pʼeek a xokik le Bibliaoʼ letiʼeʼ jeʼel u yáantkecheʼ. Maʼ u xuʼulul a kʼáatik tiʼ Jéeoba ka u yáantech utiaʼal ka seguernak a xokik le Bibliaoʼ (1 Tesalonicenses 5:17).
UTIAʼAL A MAAS NAʼATIK
Koʼox ilik baʼax jeʼel a beetik utiaʼal a xokik le Biblia kex óoliʼ minaʼantech tiempo yéetel kex yaan máaxoʼob u pʼeek a xokik. Tsʼoʼoleʼ yaan xan k-ilik bix ken u yáantilech Jéeoba.
4. Ilawil u kʼaʼanaʼanil a xokik le Bibliaoʼ
Yaan kʼiineʼ yoʼolal tuláakal baʼax ku beetik máakeʼ minaʼan tiempo tiʼ utiaʼal u xokik le Bibliaoʼ. Wa bey u yúuchultechoʼ, ¿baʼax jeʼel u yáantkecheʼ? Xokeʼex Filipenses 1:10, kéen tsʼoʼokkeʼ ka tsikbaltikeʼex lelaʼ:
-
Techeʼ, ¿«máakalmáak le baʼaloʼob maas kʼaʼanaʼantak» a wilkoʼ?
-
¿Baʼax jeʼel a beetik utiaʼal a wilik kʼaʼanaʼan u xookil le Bibliaoʼ?
-
Wa táanil ka láalik le arena ichil le nuʼukuloʼ maʼ kun páajtal u yokol tuláakal le tuunichoʼoboʼ
-
Wa ka woksik táanil le tuunichoʼoboʼ yaan u páajtal a láalik óoliʼ tuláakal le arenaoʼ; bey túun xanoʼ wa ka beetik táanil «le baʼaloʼob maas kʼaʼanaʼantakoʼ» yaan u páajtal a beetik uláakʼ baʼaloʼob
U xookil le Bibliaoʼ ku yáantkech utiaʼal a kʼaj óoltik Dios yéetel utiaʼal a adorartik. Xokeʼex Mateo 5:3, kéen tsʼoʼokkeʼ ka tsikbaltikeʼex lelaʼ:
-
¿Baʼax utsil jeʼel a kʼamik wa ka jóoʼsik tiempo utiaʼal a xokik le Bibliaoʼ?
5. Maʼ u xuʼulul a xokik le Bibliaoʼ
Maʼ xaaneʼ yaan u yantal máax aʼaliktech ka xuʼuluk a xokik le Bibliaoʼ. Ilawil baʼax úuch tiʼ Francesco. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax tu yaʼalaj u láakʼtsiloʼob yéetel u amigoʼob Francesco le ka tu yiloʼob táan u kaanbal tiʼ le Bibliaoʼ?
-
¿Baʼaxten maʼ chéen kunel úuchik u seguer u xookiʼ?
Xokeʼex 2 Timoteo 2:24, 25, kéen tsʼoʼokkeʼ ka tsikbaltikeʼex lelaʼ:
-
¿Baʼax ku yaʼalik a láakʼtsiloʼob yéetel a amigoʼob yoʼolal le baʼaxoʼob ka kanik teʼ Bibliaoʼ?
-
Jeʼex u yaʼalik le tekstooʼ, ¿baʼax unaj a beetik wa yaan máax maʼ u kʼáat ka a xok le Bibliaoʼ? ¿Baʼaxten bey ken a beetiloʼ?
6. Jéeobaeʼ yaan u yáantkech
Mientras táan a maas biskaba yéetel Jéeobaeʼ yaan u maas taaktal a kiʼimakkúuntik u yóol. Pero yaan kʼiineʼ maʼ chéen chʼaʼabil u tsʼáaik máak ichil u kuxtal le baʼax ku kanikoʼ. Wa bey u yúuchultechoʼ maʼ a tuklik, Jéeoba kun áantkech. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax kʼeexiloʼob anchaj u beetik Jim ichil u kuxtal?
-
Tiʼ le kʼeexoʼob tu beetoʼ, ¿máakalmáak maas jatsʼuts a wilkiʼ?
Xokeʼex Hebreos 11:6, kéen tsʼoʼokkeʼ ka tsikbaltikeʼex lelaʼ:
-
¿Baʼax ken u beet Jéeoba yoʼolal le máaxoʼob ku natsʼkubaʼob tu yiknaloʼ?
-
¿Bix wal ta tʼaan u yuʼubikuba Jéeoba le kéen u yil a tsʼaamaj a wóol a xok le Bibliaoʼ?
BAʼAX SUUK U KʼÁATAʼAL: «¿Baʼax oʼolal ka xokik le Bibliaoʼ?».
-
¿Baʼax jeʼel a núukikeʼ?
BAʼAX TSOʼOLI
U jaajileʼ maʼ chéen chʼaʼabil u xoʼokol le Bibliaoʼ, pero yaan u yáantkech utiaʼal u yantaltech kuxtal minaʼan u xuul. Wa ku seguer a confiar tiʼ Jéeobaeʼ yaan u bendecirkech.
Baʼax ta kanaj
-
¿Baʼaxten koʼoj a wilik le baʼax táan a kanik teʼ Bibliaoʼ?
-
¿Baʼax ken a beet le kéen tsʼoʼokok a wilik «máakalmáak le baʼaloʼob maas kʼaʼanaʼantakoʼ»?
-
¿Baʼaxten kʼaʼabéet a kʼáatik u yáantaj Jéeoba utiaʼal u seguer a kaanbal tiʼ le Bibliaoʼ?
KAN U MAASIL
Ilawil cuatro baʼaloʼob tsʼoʼok u yáantik yaʼab máakoʼob utiaʼal u meyajtiʼob maʼalob le tiempooʼ.
«Meyajnaktech maʼalob a tiempo» (¡Aajkech!, febrero tiʼ 2014)
Kex u yíicham maʼ uts tu tʼaaneʼ juntúul koʼoleleʼ seguernaj u meyajtik Dios. Ilawil bix áantaʼabik tumen Jéeoba.
Ojéelt bix áantaʼabik juntúul máak tumen u yatan.
Yaan máax aʼalikeʼ le Testigoʼob binoʼ ku beetkoʼob u jatskuba le familiaʼoboʼ. Chéen baʼaleʼ, ¿jach wa tu jaajil beyoʼ?
«U testigoʼob Jéeobaeʼ, ¿ku jubikoʼob le familiaʼoboʼ, wa ku yáantkoʼob?» (Xok teʼ jw.org)