NÍ KASEMI 13
Bɔ Nɛ Lakpa Jamihi Gbeɔ Mawu He Guɛ Ha
Mawu ji suɔmi. Se sɔlemihi loo jamihi nɛ a deɔ ke a daa si ngɛ Mawu nane mi ɔ peeɔ yi wu tso níhi. Kɛ e ba lɛ kɛɛ nɛ a peeɔ jã a? Anɔkuale sane ji kaa, jami nɛ ɔmɛ ji lakpa jamihi. Jami nɛ ɔmɛ gbeɔ Mawu he guɛ. Mɛni blɔ nɔ nɛ a guɔ kɛ gbeɔ Mawu he guɛ? Kɛ jã nɛ a peeɔ ɔ haa nɛ Mawu nuɔ he ha kɛɛ? Nɛ mɛni Mawu maa pee ngɛ he?
1. Ngɛ mɛni blɔ nɔ nɛ lakpa jamihi ngɔ a tsɔɔmi ɔmɛ kɛ gbe Mawu he guɛ?
Lakpa jami ɔmɛ ‘ngɔ Mawu he anɔkuale ɔ kɛ tsake lakpa.’ (Roma Bi 1:25) Kaa nɔ hyɛmi nɔ́ ɔ, jamihi fuu tsɔɔ we a jami mi bi ɔmɛ Mawu biɛ ɔ. Se Baiblo ɔ tsɔɔ kaa e sa nɛ waa kɛ Mawu biɛ ɔ nɛ tsɛ lɛ. (Roma Bi 10:13, 14) Jehanɛ se hu ɔ, jami hɛ mi nyɛɛli fuu tsɔɔ kaa ke sane yobu ko ba a, Mawu lɛ ha nɛ e ba. Se e ji lakpa. Pi Mawu nɛ haa nɛ ní yayamihi baa. (Kane Yakobo 1:13.) Aywilɛho sane ji kaa, lakpa tsɔɔmi nɛ ɔmɛ haa nɛ e he waa kɛ haa nihi kaa a ma ná suɔmi kɛ ha Mawu.
2. Ngɛ mɛni blɔ nɔ nɛ níhi nɛ lakpa jamihi peeɔ ɔ gbeɔ Mawu he guɛ?
Lakpa jamihi je we suɔmi kpo kɛ tsɔɔ we nihi kaa bɔ nɛ Yehowa peeɔ ɔ. Baiblo ɔ tsɔɔ kaa lakpa jami ɔmɛ a he ‘yayami ɔmɛ a nya bua kɛ ya su hiɔwe tɔɔ.’ (Kpo Jemi 18:5) Jeha lafahi abɔ ji nɛ ɔ nɛ jamihi ngɔ a he kɛ wo ma kudɔmi sanehi a mi, a fĩ ta hwumi se, nɛ a ha nɛ nimli babauu gbo. Akɛnɛ jami hɛ mi nyɛɛli komɛ suɔ nɛ a ná ní he je ɔ, a ngɔɔ sika ngɛ a jami mi bi ɔmɛ a dɛ. A ní peepee nɛ ɔmɛ tsɔɔ kaa a li Mawu, enɛ ɔ he ɔ, a be nyɛe maa pee Mawu nane mi dali.—Kane 1 Yohane 4:8.
3. Kɛ níhi nɛ lakpa jami ɔmɛ peeɔ ɔ haa nɛ Mawu nuɔ he ha kɛɛ?
Ke níhi nɛ lakpa jami ɔmɛ peeɔ ɔ woɔ o mi mi la a, lɛɛ kɛ o susu kaa Yehowa hu maa nu he ha kɛɛ? Yehowa suɔ nimli, enɛ ɔ he ɔ, e bua jɔɛ jami hɛ mi nyɛɛli nɛ a tsɔɔ we e he anɔkuale ɔ, nɛ a waa a jami mi bi ɔmɛ yi mi ɔ a he. E wo si kaa lakpa jami hɛ mi ma kpata, “nɛ a be lɛ nae hu gblegbleegble.” (Kpo Jemi 18:21) E be kɛe nɛ Mawu ma kpata lakpa jamihi tsuo a hɛ mi.—Kpo Jemi 18:8.
MOO KASE BABAUU
Moo kase bɔ nɛ Mawu naa lakpa jamihi ha, níhi nɛ lakpa jamihi pee, kɛ nɔ́ he je nɛ́ e sɛ nɛ a ní peepee ɔ nɛ jɔ̃ o kɔni mi nɛ o kpa Yehowa he ní kasemi ɔ.
4. Pi jamihi tsuo nɛ Mawu kplɛɛɔ a nɔ
Nihi fuu he ye kaa jami ɔmɛ tsuo ngɛ kaa blɔ ekpaekpahi nɛ́ lɛ tsuo kɛ wɔ yaa Mawu ngɔ. Se anɛ e ji anɔkuale lo? Nyɛɛ kane Mateo 7:13, 14 ɔ, nɛ nyɛ susu sane bimi nɛ ɔ he:
-
Kɛ Baiblo ɔ kale blɔ nɛ kɛ nɔ yaa wami mi ɔ ha kɛɛ?
Mo je VIDEO ɔ, nɛ nyɛ susu sane bimi nɛ ɔ he.
-
Anɛ Baiblo ɔ de ke Mawu kplɛɛ jamihi fuu a nɔ lo?
5. Lakpa jamihi ha we nɛ nihi nɛ a na bɔ nɛ Mawu ngɛ suɔmi ha
Lakpa jamihi peeɔ níhi fuu kɛ gbeɔ Mawu he guɛ. A he nɛ a kɛ woɔ tahi a mi ɔ ji blɔ kake nɛ a guɔ nɔ kɛ peeɔ jã. Ke o suɔ nɛ o na enɛ ɔ he nɔ hyɛmi nɔ́ ɔ, mo je VIDEO ɔ. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.
-
Mɛni níhi nɛ sɔlemi ɔmɛ pee ngɛ Je Mi Ta Enyɔne ɔ mi?
-
Kɛ o naa nɔ́ nɛ a pee ɔ ha kɛɛ?
Nyɛɛ kane Yohane 13:34, 35 kɛ 17:16. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:
-
Ke sɔlemi ɔmɛ ngɔ a he kɛ wo tahi a mi ɔ, kɛ Yehowa nuɔ he ha kɛɛ?
-
Lakpa jami ɔmɛ lɛ a ha nɛ ní yayamihi fuu ngɛ nɔ yae ɔ nɛ. Mɛni ji ní komɛ nɛ jami ɔmɛ peeɔ nɛ o na nɛ tsɔɔ kaa a ha we nɛ nihi nɛ a na bɔ nɛ Mawu ngɛ suɔmi ha?
Lakpa jami je we Mawu suɔmi ɔ kpo
6. Mawu suɔ nɛ e ye bua nihi konɛ a je lakpa jami mi
Nyɛɛ kane Kpo Jemi 18:4 a ɔ, nɛ nyɛ susu sane bimi nɛ ɔ he:
-
Benɛ o ba le kaa Mawu suɔ nɛ e ye bua nihi nɛ lakpa jami sisi mɛ ɔ, kɛ o nu he ha kɛɛ?
7. Moo ya nɔ nɛ o kase anɔkuale Mawu ɔ he ní
Anɛ e sa kaa níhi nɛ lakpa jamihi tsɔɔ, kɛ níhi nɛ a peeɔ ɔ nɛ tsake bɔ nɛ o naa Mawu ha a lo? Ngɔɔ lɛ kaa niheyo ko bui e tsɛ ga womihi tue, nɛ e je we mi, nɛ e ya ngɛ ní yayamihi pee. Se tsɛ ɔ bua jɔɛ e bi ɔ je mi bami ɔ he. Anɛ wa ma nyɛ ma pia tsɛ ɔ ngɛ bɔ nɛ e bi ɔ ngɛ e je mi bae basabasa ha a he lo?
-
Anɛ e da kaa wa ma pia Yehowa, nɛ́ wa kpa e he ní kasemi ngɛ níhi nɛ lakpa jamihi peeɔ ɔmɛ a he lo?
NI KOMƐ DEƆ KE: “Jami ɔmɛ tsuo kake. Mɛ tsuo a tsɔɔ ní kpakpahi.”
-
Anɛ mo hu o he ye jã lo?
-
E ngɛ mi kaa jamihi fuu deɔ ke a tsɔɔ ní kpakpahi mohu lɛɛ, se mɛni he je nɛ pi mɛ tsuo nɛ Mawu kplɛɛ a nɔ ɔ?
NYA MWƆMI
Níhi nɛ lakpa jamihi tsɔɔ, kɛ níhi nɛ a peeɔ ɔ haa nɛ nihi náa susumihi nɛ dɛ ngɛ Mawu he. Mawu ma kpata lakpa jami ɔmɛ a hɛ mi.
Mi Nylɔmi
-
Kɛ o naa níhi nɛ lakpa jamihi tsɔɔ, kɛ níhi nɛ a peeɔ ɔ ha kɛɛ?
-
Kɛ níhi nɛ lakpa jami ɔmɛ tsɔɔ, kɛ níhi nɛ a peeɔ ɔ haa nɛ Yehowa nuɔ he ha kɛɛ?
-
Mɛni Mawu maa pee lakpa jami ɔmɛ?
NÍ KPAHI NƐ MAA YE BUA MO
Moo kane blɔ enyɔ komɛ a nɔ nɛ jamihi fuu guɔ kɛ peeɔ níhi nɛ sɛ Mawu hɛ mi ɔ he ní.
“Anɛ Mawu Kplɛɛ Jami Ɔmɛ Tsuo A Nɔ Lo?” (Munyu nɛ ɔ ngɛ Intanɛti ɔ nɔ)
Mɛni he je nɛ Yehowa suɔ nɛ waa kɛ ni kpahi nɛ bla kɛ sɔmɔ lɛ ɔ?
“Anɛ E He Hia Nɛ O Kɛ O He Nɛ Wo Jami Kuu Ko Mi Lo?” (Munyu nɛ ɔ ngɛ Intanɛti ɔ nɔ)
Osɔfo ko hao ngɛ níhi nɛ a peeɔ ngɛ e jami ɔ mi ɔ he, se lɔ ɔ ha we nɛ e kpa Mawu he anɔkuale ɔ kasemi.
“Nɔ́ He Je Nɛ́ Osɔfo Ko Je E Sɔlemi ɔ Mi” (O Hɛ Nɛ Tsɛ̃!, February 2015)
Jeha lafahi abɔ ji nɛ ɔ nɛ jamihi tsɔɔ nihi lakpa munyuhi kɛ kɔ Mawu he. Lakpa munyu nɛ ɔmɛ haa nɛ nihi susuɔ kaa Mawu be suɔmi, nɛ e kɛ adesahi a kpɛti kɛ. Moo kase anɔkuale nɛ kɔɔ lakpa munyu nɛ ɔmɛ a kpɛti etɛ pɛ he.
“Lakpa Munyuhi Nɛ Ha Nɛ Nihi Susuɔ Kaa Mawu Be Suɔmi” (Hwɔɔmi Mɔ, November 1, 2013)
a Ke o ngɛ hlae nɛ o le nɔ́ he je nɛ Kpo Jemi womi ɔ kale lakpa jami kaa yo nɛ e biɛ ji Babilon Ngua a, moo hyɛ Nyagbe Ningma 1 ɔ.
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
