LEKSIYON 13
Kun Paano Irinarayo sa Diyos kan Palsong mga Relihiyon an mga Tawo
Kun itinutukdo sa sato nin Diyos na magpahiling nin pagkamuot, taano ta kadakul nin maraot na ginigibo an mga relihiyon na nagsasabing mga representante sinda nin Diyos? Saro lang an buot sabihon kaiyan: Palso an mga relihiyon na iyan; irinarayo ninda sa Diyos an mga tawo. Paano? Ano daw an namamatian nin Diyos sa bagay na iyan? Asin ano an gigibuhon niya sa palsong mga relihiyon?
1. Sa paanong paagi nararaot an reputasyon nin Diyos huli sa mga itinutukdo kan palsong mga relihiyon?
Sa mga tukdo kan palsong mga relihiyon, “mas pinili pa ninda an kaputikan kisa sa katotoohan mapadapit sa Diyos.” (Roma 1:25) Halimbawa, dai itinutukdo kan kadaklan na relihiyon sa saindang mga miyembro an pangaran kan Diyos. Pero sinasabi kan Bibliya na dapat gamiton an pangaran kan Diyos. (Roma 10:13, 14) May mga relihiyon na nagsasabi na pag may nangyaring maraot, kabutan daa iyan kan Diyos. Pero bako iyan totoo. An Diyos dai lamang magibo nin maraot. (Basahon an Santiago 1:13.) Nakakamundo ta dahil sa tukdo na iyan kan palsong mga relihiyon, nairarayo an mga tawo sa Diyos.
2. Sa paanong paagi nararaot an reputasyon nin Diyos huli sa mga ginigibo kan palsong mga relihiyon?
Bako nanggad arog kan pagtrato ni Jehova an pagtrato kan palsong mga relihiyon sa mga tawo. Sinasabi kan Bibliya manungod sa palsong mga relihiyon: “Nagkaparatong-patong na an saiyang mga kasalan na uminabot sagkod sa langit.” (Kapahayagan 18:5) Ginatos na taon nang hinihinguwa kan palsong mga relihiyon na impluwensiyahan an ginigibo kan mga gobyerno. Sinuportaran kaiyan an mga giyera asin pinangyari o inuyunan kaiyan an paggadan sa kadakul-dakul na tawo. May mga lider nin relihiyon na gustong yumaman kaya hinahagadan ninda nin kuwarta an mga miyembro ninda. Pinapatunayan kan mga gibo nindang iyan na dai talaga ninda midbid an Diyos, kaya lalo nang dai sinda maninigo na magin representante niya.—Basahon an 1 Juan 4:8.
3. Ano an namamatian nin Diyos sa palsong mga relihiyon?
Kun naaanggot ka sa mga ginigibo kan palsong mga relihiyon, kumusta pa kaya si Jehova? Namumutan niya an mga tawo, pero anggot siya sa mga lider nin relihiyon na nagtataram nin bakong totoo manungod sa saiya asin dai tinatrato nin tama an mga miyembro ninda. Nangangako siya na paparaon niya an palsong mga relihiyon asin “dai na [iyan] nuarin man manunumpungan.” (Kapahayagan 18:21) Madali nang tapuson nin Diyos an gabos na palsong relihiyon.—Kapahayagan 18:8.
ARAMON PA
Aramon pa kun ano an namamatian nin Diyos manungod sa palsong mga relihiyon, kun ano pa an mga ginibo kaiyan, asin kun taano ta dai iyan dapat makapadisganar saimo na mas mamidbid pa si Jehova.
4. Bako gabos na relihiyon inuuyunan nin Diyos
Dakul na tawo an naniniwala na an mga relihiyon garo manlain-lain na dalan na may saro sanang destinasyon—an Diyos. Totoo daw talaga iyan? Basahon an Mateo 7:13, 14, dangan pag-ulayan an hapot na ini:
-
Ano an sinasabi kan Bibliya manungod sa dalan pasiring sa buhay?
I-play an VIDEO, dangan pag-ulayan an hapot.
-
Sinasabi daw kan Bibliya na dakul na relihiyon an inuuyunan nin Diyos?
5. Dai mahihiling sa palsong mga relihiyon na an Diyos pagkamuot
Rinaraot kan palsong mga relihiyon an reputasyon nin Diyos sa dakul na paagi. An pagigin imbuwelto ninda sa mga giyera an saro sa hiling-hiling na patunay kaiyan. Para mahiling an sarong halimbawa, i-play an VIDEO. Dangan pag-ulayan an mga hapot.
-
Ano an ginibo kan dakul na relihiyon kaidtong Giyera Mundiyal II?
-
Ano an masasabi mo sa ginibo ninda?
Basahon an Juan 13:34, 35 asin 17:16. Dangan pag-ulayan an mga hapot na ini:
-
Ano sa hiling mo an namamatian ni Jehova pag nakikilabot sa giyera an mga relihiyon?
-
Kadakul na ginibong maraot an palsong mga relihiyon. Ano an nahihiling mong mga patunay na dai naipapahiling kan palsong mga relihiyon na an Diyos pagkamuot?
Dai ipinapahiling kan palsong mga relihiyon na an Diyos pagkamuot
6. Gusto nin Diyos na tabangan an mga tawo na makaluwas sa palsong relihiyon
Basahon an Kapahayagan 18:4, a dangan pag-ulayan an hapot na ini:
-
Ano an namamatian mo manungod sa bagay na gusto nin Diyos na tabangan an mga tawo na nadaya kan palsong mga relihiyon?
7. Padagos na kumua nin kaaraman manungod sa tunay na Diyos
Dapat daw kitang madisganar sa Diyos dahil sa palsong mga relihiyon? Isipon an sarong aki na dai nagsusunod sa marahayon na paggiya kan saiyang ama. Naglayas siya sa harong saka naggibo nin maraot na mga bagay. Dai gusto kan ama an mga ginigibo kan saiyang aki. Taano ta bakong makatanusan na basulon an ama sa nagin buhay kan rebelyoso niyang aki?
-
Makatanusan daw na basulon si Jehova saka magpundo na sa pag-adal manungod sa saiya dahil sa mga ginigibo kan palsong mga relihiyon?
MAY MGA NAGSASABI: “Habo kong pag-ulayan an manungod sa Diyos. Kadakul bagang nagigin problema dahil sa mga relihiyon.”
-
Arog man daw kaiyan an namamati mo?
-
Taano ta dai kita dapat madisganar ki Jehova dahil sa ginigibo kan palsong mga relihiyon?
SUMARYO
Nararaot an reputasyon kan Diyos huli sa salang mga itinutukdo saka marauton na mga ginigibo kan palsong mga relihiyon. Paparaon nin Diyos an palsong mga relihiyon.
Rebyu
-
Ano an masasabi mo sa mga itinutukdo saka ginigibo kan palsong mga relihiyon?
-
Ano an namamatian ni Jehova sa palsong mga relihiyon?
-
Ano an gigibuhon kan Diyos sa palsong mga relihiyon?
HILINGON MAN
Aramon an duwa pang rason kun taano ta dai inuuyunan nin Diyos an haros gabos na relihiyon.
“Parareho Daw an Gabos na Relihiyon? Gabos Daw Iyan Pasiring sa Diyos?” (Artikulo sa jw.org/bcl)
Taano ta gusto ni Jehova na sambahon ta siya kaiba kan iba pang mga nagsasamba sa saiya?
“Kaipuhan Daw na Magin Kabilang Ka sa Sarong Relihiyon?” (Artikulo sa jw.org/bcl)
Nadisganar an sarong padi sa saiyang relihiyon. Pero dai iyan nakapapundo sa saiya na aramon an katotoohan manungod sa Diyos.
“Kun Taano ta Naghali an Sarong Padi sa Saiyang Relihiyon” (Magmata!, Pebrero 2015)
Huli sa salang mga tukdo kan mga relihiyon sa haloy nang panahon, iniisip kan mga tawo na an Diyos mayong pakiaram saka maisog. Aramon an katotoohan manungod sa tulo sa mga salang tukdo na iyan.
“Taano ta Nadidipisilan an Iba na Kamutan an Diyos?” (An Torrengbantayan, Enero-Pebrero 2014)
a Para maaraman kun taano ta ikinukumparar kan libro nin Kapahayagan an palsong mga relihiyon sa sarong babayi na inaapod na Dakulang Babilonya, hilingon an Dagdag na Impormasyon 1.
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
