Manseren Allah ima isawarwar, mboi snonggaku ḇeyoḇe sna agama ma sisyom faro Allah, siso ḇefrur roi ḇeḇye ḇa na. Agama ḇeradirya nama agama ḇekaku ḇa nairya, kukro nafnai fa snonggaku sya skara sasar Manseren Allah. Moḇsa roi ine ryarirya rai? Rariso Manseren Allah myam roi sifrur nane rai? Ma rosai nari ifrur yoḇ si?

1. Rosai agama ḇekaku ḇa sfarkor fa nafnai ra skara sasar Manseren Allah?

Agama ḇekaku ḇa ’sfadwer fawawi ḇekaku ḇekur Manseren Allah ḇe farkarkor ḇekaku ḇa’. (Roma 1:25) Rupa ra, pendeta ḇebor sya sikofenḇair Manseren Allah snonsnon Ḇyeja ḇe kawasa sesya ḇa. Ine iḇese kaku ro rosai Refo ikofen ya. Refo ya doḇe fandun fa kofawi ma kap Manseren Allah snonsnon Ḇyedi. (Roma 10:13, 14) Pendeta sia sisya soḇe fafisu roi ḇeḇye ḇa kyur ko ido, ima Manseren Allah marisen Ḇyenairi. Ḇape roi sikofen anya nama anggarkar nairi. Roi ḇeḇye ḇa na ndramuma ro Manseren Allah ḇa. (Kowasya Yakobus 1:13.) Fama faḇye kaku, anggarkar ḇeraker manfarkin agama sya nafnai fa snonggaku sya sfanam faro Manseren Allah ḇa.

2. Rosai agama ḇekaku ḇa sifrur fa nafnai ra skara sasar Manseren Allah?

Agama ḇekaku ḇa sifrur pyum snonggaku sya raris moḇ Yahwe ifrur pyum si raya ḇa. Refo ya doḇe agama ḇekaku ḇa ”sasar ḇyena nkanamnam isof ro nanki”. (Fasasna 18:5) Ro swaf kawan kwar, agama ḇekaku ḇa sakso ro fararur polotik, sisaramper mamamun na, ma sifnai fa snonggaku ḇebor sya simar. Manfarkin agama sia sisya sikenem mararen ma sor pipi ro kawasa sesya fa sbukimam fandun ro kenem sena. Roi sifrur nane nfasnaiḇair sakfawi Manseren Allah ḇa. Inja sima sisyus ḇa kaku fa sikarem si ḇe Allah manfamyan Ḇyesi.​—Kowasya 1 Yohanes 4:8.

3. Moḇsa Manseren Allah myam agama ḇekaku ḇa na rai?

Wamewer kaku mam roi agama ḇekaku ḇa sifrur anna ke? Kwara ido, moḇsa Yahwe myam si rai? Allah Yahwe ima iswar snonggaku koine, ḇape imarisen ḇa kaku myam manfarkin agama sya sifrur pyum kawasa sesya ḇa ma sifnai fa snonggaku sya skara sasar Yahwe I. Yahwe ikofen kwar bo doḇe nari kyakok agama ḇekaku ḇa ma nari ’sisrow i wer ḇa’. (Fasasna 18:21) Fyoro wer ḇa nari Manseren Allah kyakokpres agama ḇekaku ḇa nakam.​—Fasasna 18:8.

 SWEWAR KAKU WER

4. Manseren Allah imarisen faro agama nakam ḇa

Snonggaku ḇebor sya sikyar bo soḇe agama-agama na namnis ra nyan ḇebor ḇesisye. Soḇe kokam kombran ro nyan ḇesisye, mboi nari kora kam ḇe Manseren Allah. Ḇape roi ine kyaku ke? Kowasya Matius 7:13, 14, raimnai kawos fakfuken ine:

• Rosai Refo ikofen ḇekur nyan ḇeyun ḇe kankenem ya?

Komam VIDIO, raimnai kawos fakfuken na.

• Refo doḇe Manseren Allah imarisen faro samsyom ḇaido agama nakam ke?

 6. Manseren Allah imarisen isaramper snonggaku sya fa simkei ro agama ḇekaku ḇa na

Kowasya Fasasna 18:4, a raimnai kawos fakfuken ine:

• Wafawi Manseren Allah imarisen isaramper snonggaku sya fa simkei ro farkarkor ḇemnis ra denem ḇero agama ḇekaku ḇa na, inja moḇsa ḇaḇir rai?

7. Farkor pdef fa wafawi Manseren Allah ḇekaku ya

Roi ḇeḇye ḇa agama ḇekaku ḇa sikofen ma sifrur na nafnai fa kwara sasar Manseren Allah ke? Kwarapan wos sarḇer ine. Romawa oso imewer ryower kmari wos anun ḇyena, mura ibur rum ḇyeja bo imbran ifnak sarbir kaku. Kmari imarisen ḇa kaku myam romawa ḇyedine roi ifrur nane. Radine ido, na kobuk sasar ya ḇe kmari faro romawa ḇyedine kenem ḇeḇye ḇa ḇyenane ke?

• Imnis rarirya, na kobuk sasar ya faro Yahwe I ma komnai kofarkor Refo kukro komam agama ḇekaku ḇa roi sifrur na ke?

 FARKARKOR ḆYENA

Agama ḇekaku ḇa sbuk farkarkor ḇesasar ma roi ḇeḇye ḇa sifrur na nafnai fa snonggaku sya skara sasar Manseren Allah. Manseren Allah nari kyakokpres agama ḇekaku ḇa na.

Waswarepen Kaḇer

• Moḇsa mam agama ḇekaku ḇa roi sfarkor na ma roi sifrur kwar na rai?

• Moḇsa Yahwe myam agama ḇekaku ḇa na rai?

• Rosai nari Manseren Allah ifrur faro agama ḇekaku ḇa na?