Anhein ínsiñeni lubéi Bungiu ani ariñagatu relihión ayanuha tan lidan liri Bungiu, ka uagu adügaaru lubéi saragu wuribani? Lidan murusun dimurei, ladüga mama lan inarünitu relihión burí to, wíyeda hamaali tábutigu liri Bungiu lau le harufudahabei luma le hadügübei. Ida? Ani ida liña ladügün katei le lun lasandiragun Heowá lungua? Kaba ladüga lun laransehani turobuli le?

1. Ida liña tawiyeduni relihión mama inarünitu liri Bungiu lau le tarufudahabei?

Ladüga sansi hamaali tábutigu relihión burí to “linarün Bungiu luagu iyeeni” (Rómana 1:25). Kéiburi tiibe-agei relihión to ídanboun marufudahóun lan liri Bungiu houn gürigia. Ánhounti Bíbülia, ariñagatu woun mosu lan wayusuruni liri Bungiu (Rómana 10:13, 14). Dan burí le lasuseredun somu lamiselu, añahein tábutigu ligilisi ariñagutiña ligía lan lugundanbei Bungiu. Iyeeni lira. Madurunti Bungiu luagu katei burí wuribati le asuseredubei (aliiha huméi Santiagu 1:13). Ma lirun adügaali lan iyeeni kéiburi le lun hadisedun gürigia luéi Bungiu.

2. Ida liña tawiyeduni relihión mama inarünitu liri Bungiu lau le tadügübei?

Tidan burí relihión to mama inarünitu, mouserúnwatiña gürigia kei lóuseruniña Heowá. Ariñagatu Bíbülia gíbeguaali lan tifigoun relihión mama inarünitu “darí lun lachülürün sielun” (Arufudúni 18:5). Lǘharu relihión ádaragua tungua lidoun polítika luma lidoun burí wuribu, adüga tuguya lun hóunwegun saragu gürigia. Añahein tábutigu relihión, rísihaña ani amuriahatiña seinsu hama tílana haligilisin lun hasigirun awinwanda ítara. Arufudati katei burí le hadügübei ibidiñe lan Bungiu houn, ida lubati hariñagun ayanuha hamá lidan liri Bungiu? (Aliiha huméi 1 Huan 4:8).

3. Ka lasandirubei Bungiu dan larihini katei burí le tadügübei relihión mama inarünitu?

Anhein adüga lubéi katei burí le tadügübei relihión mama inarünitu lun hagañidun, gúbumeti Heowá? Hínsiñetiña gürigia lun Bungiu, ani gáñiñu liña hama tábutigu relihión ha awiyedubalin liri, óusera hamaña gürigia wuriba. Füramaseti Bungiu lagumuchuba lan tau relihión mama inarünitu ani marihíndigiawaarume (Arufudúni 18:21). Málühali katei le asusereda (Arufudúni 18:8).

 SIGÍ HUMÁ AFURENDEIRA

4. Mama sun relihión lun lagundaaruba lan Bungiu tau

Saminatiña saragu gürigia ítara tiña lan relihión kei ámuñegueinarügü üma le anügübei lumoun Bungiu. Inarüni san le? Aliiha huméi Matéu 7:13, 14, ábameti hayanuhan luagu álügüdahani le:

• Según tariñaguni Bíbülia, ida liña üma le anügübei lidoun ibagari?

Ariha huméi BIDÉU, ábameti hayanuhan luagu álügüdahani le:

• Arufudahatu san Bíbülia gibe tan relihión to autu lagundaara Bungiu?

 6. Busenti Bungiu lesefuruniña gürigia tídangiñe relihión mama inarünitu

Aliiha huméi Arufudúni 18:4, a ábameti hayanuhan luagu álügüdahani le:

• Ida liña hasandiragun hungua lau hasubudiruni busén lan Bungiu lesefuruniña gürigia lídangiñe iyeeni le ídanbei takipuraña relihión mama inarünitu?

7. Sigí humá afurendeira luagu Bungiu le inarünibei

Lunti san hasaminarun wuriba luagu Bungiu ladügarügü katei wuribati le tadügübei relihión? Samina humá luagun aban isaani le máhabei gaganbadi lan lun lúguchi, aba lidin hábiñegiñe ani aba ladaagun saragu katei wuribati. Magundanti úguchili lau le ladaagubei lisaani. Garichati san lun liridahóun úguchili luagu luriban ibagari le lanügübei lisaani?

• Garichati san lun masigirun wamá afurendeira luagu Heowá ladügarügü le hadügübei tílana relihión mama inarünitu?

 LE HAFURENDEIRUBEI

Wíyeda taali burí relihión mama inarünitu liri Bungiu lau le tarufudahabei luma wuribani le hadügübei tílana. Málühali Bungiu agumucha tau sun relihión burí to.

Águyuguagüdüni

• Ka hasaminarubei luagu le tarufudahabei relihión mama inarünitu luma luagu le tadügübei?

• Ka lasaminarubei Heowá tuagu burí relihión mama inarünitu?

• Kaba ladüga Heowá tau burí relihión mama inarünitu?