LECCION 13
El Falso Religion Ta Habla Imbusterias Acerca con Dios
Si el Dios amor, porque ta hace manada maga mal cosas el maga religion quien ta clama que ta representa con ele? Cay falso este maga religion; ta habla sila imbusterias acerca con Dios. Paquemodo se sila ta hace? Cosa ta sinti el Dios acerca con ese? Y cosa le hay hace?
1. Paquemodo el falso religion ta habla imbusterias acerca con Dios por medio na diila enseñanza?
El falso religion ‘ya cambia con el verdad del Dios con imbusterias.’ (Roma 1:25) Por ejemplo, mayoria del maga religion gendeh ta enseña el nombre del Dios. Pero, el Biblia ta habla que debe usa con ese. (Roma 10:13, 14) El cuanto maga lider de religion ta habla que si tiene cosa malo ya sucede, querrer se del Dios. Pero un imbusterias se. El Dios nunca ta hace malo. (Le con el Santiago 1:13.) Por causa na este maga imbusterias, el maga gente ya queda lejos con Dios.
2. Paquemodo el falso religion ta habla imbusterias acerca con Dios por medio na diila maga accion?
El falso religion gendeh ta trata con el maga gente igual si paquemodo ta trata si Jehova kanila. El Biblia ta habla que el culpa del falso religion “ya man tumpuk hasta ya alcanza na cielo.” (Revelacion 18:5) Por manada siglo, el maga religion ya entramete na politica, ya suporta na maga guerra, y ya causa o ya aproba con el muerte del manada gente. El cuanto lider de religion quierre queda rico poreso ta colecta sila sen na diila maga miembro. Prueba este que no conoce gayot sila con Dios poreso nuay sila derecho para representa con ele.—Le con el 1 San Juan 4:8.
3. Cosa ta sinti el Dios na maga falso religion?
Si rabiao tu na cosas que ta hace el falso religion, cosa ya lang gaha si Jehova? Ta ama le con el maga gente pero rabiao le con el maga lider de religion quien ta habla imbusterias acerca con ele y gendeh ta trata bueno con el maga gente. Ya promete le que hay destroza con el falso religion y ‘gendeh mas hay mira con este oleh.’ (Revelacion 18:21) Gendeh dura, hay termina el Dios con el todo falso religion.—Revelacion 18:8.
APRENDE PA MAS
Aprende pa mas acerca si cosa ta sinti el Dios na falso religion. Sabe acerca si cosa este ya hace. Pero sabe tambien si porque gendeh este debe sangga contigo para conoce con Jehova.
4. Gendeh ta acepta el Dios con el todo religion
Manada gente el ta creé que el maga religion igual como maga diferente camino que igual lang todo ta guia para con Dios. Pero deverasan ba se? Le con el Mateo 7:13, 14 y despues, discuti con este pregunta:
-
Cosa ta habla el Biblia acerca na camino para na vida?
Man play con el VIDEO y despues, discuti con el pregunta.
-
Ta habla ba el Biblia que manada religion el aceptable con Dios?
5. El falso religion gendeh ta imita con el amor del Dios
El maga falso religion gendeh ta demonstra el deverasan personalidad del Dios. Un prueba de ese amo el diila participacion na guerra. Para mira un ejemplo, man play con el VIDEO. Despues, discuti con el maga pregunta.
-
Cosa ya hace el manada maga religion durante el Guerra Mundial II?
-
Cosa tu ta sinti na cosa sila ya hace?
Le con el Juan 13:34, 35 y 17:16. Despues, discuti con este maga pregunta:
-
Cosa gaha ta sinti si Jehova si ta participa el maga religion na guerra?
-
El falso religion amo el responsable na manada mal cosas que ya sucede. Base na cosa tu ya observa, na cosa maga manera sila nuay imita con el amor del Dios?
El falso religion gendeh ta imita con el amor del Dios
6. Quierre el Dios que ayuda con el maga gente para sale na falso religion
Le con el Revelacion 18:4 a y despues, discuti con este pregunta:
-
Cosa tu ta sinti cay quierre el Dios ayuda con el maga gente con quien ya influencia el falso religion?
7. Continua aprende acerca na verdadero Dios
Debe ba afecta el falso religion con el de tuyu mirada con Dios? Imagina con el un anak quien ya desobedece con el de suyu tata, ya sale na casa y ya hace maga bien mal cosas. Gendeh uyun el tata na cosa ya hace el de suyu anak. Porque gendeh justo que disculpa con el tata na maga cosas que ya hace el de suyu rebelloso anak?
-
Debe ba kita disculpa con Jehova y descanza aprende acerca con ele por causa na cosas ya hace el falso religion?
EL CUANTO TA HABLA: “Gendeh yo interesao na Dios cay el religion amo el causa del manada maga problema.”
-
Ansina ba tambien tu ta sinti?
-
Porque el maga accion del falso religion gendeh debe afecta con el diaton mirada con Jehova?
SUMARIO
El falso religion ta habla imbusterias acerca con Dios por medio na diila enseñanza y maga accion. El Dios hay destroza con el falso religion.
Repaso
-
Cosa tu ta sinti na cosa ya enseña y ya hace el falso religion?
-
Cosa ta sinti si Jehova acerca na falso religion?
-
Cosa hay hace el Dios con el falso religion?
SABE PA MAS
Sabe el dos cosas que ta hace el mayoria del maga religion que no quierre el Dios.
“Igual Ba el Todo Religion? Todo Ba Ese Puede Guia Kanaton Para con Dios?” (Articulo na website)
Porque quierre si Jehova que adora kita con ele junto con otro?
“Necesita Ba Queda Parte del un Organizao Religion?” (Articulo na website)
El un padre nuay gusta con el cosa ta hace el de suyu religion. Pero nuay se sangga con ele para aprende el verdad acerca con Dios.
“Si Porque el un Padre Ya Sale na De Suyu Religion” (Awake!, Febrero 2015)
Por manada año, el maga religion ta habla imbusterias acerca con Dios que ta causa con el maga gente para creé que gendeh le ta ama kanaton y nuay le lastima. Sabe el tres ejemplo de ese.
“Maga Imbusterias que Ta Hace Lejos con el Maga Gente con Dios” (The Watchtower, Noviembre 1, 2013)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
