Si tawii Alla ko giggol, fii honɗun diinaaji wi’ooji hiɗi waɗude piiji e innde Alla no waɗude boneeji buy ? Tigi tigi on ɗii diinaaji ko diinaaji fenaande, hiɗi janna penaale fii Alla. Ko honno ɗi woni e woɗɗinirde yimɓe e Alla ? Ko honɗun Alla miijii fii mun ? E ko honɗun o waɗata fii mun ?

1. Fii honɗun janndeeji diina fenaande woɗɗinirta yimɓe e Alla ?

Diina fenaande « lontinir[i] goonga Alla on fenaande » (Roomu 1:25). E piide misal, diinaaji buy jannaali tawaaɓe ka diina maɓɓe innde Alla nden. Kono Deftere Alla nden wi’i hiɗen haani huutorde innde Alla nden (Roomu 10:​13, 14). Hooreeɓe diina no wi’a si masiibo waɗii, haray ko muyɗe Alla. Kono ɗun ko fenaande. Alla wonataa sabu bone muk (janngee Yaaquuba 1:13). Ko satti kon, ɗee penaale diina woɗɗinii yimɓe e Alla.

2. Fii honɗun kuuɗe diina fenaande woɗɗinirta yimɓe e Alla ?

Diina fenaande dankortaa yimɓe no Yahuwah Alla dankorii ɓe non. Deftere Alla nden wi’i : « junuubaaji mayre ɗin dewnondirii haa ka kammu » (Feɲɲinannde 18:5). Gila ko neeɓi diinaaji no tawaa e politik, tammbitii gere e no woni sabu mayde miliyonji yimɓe maa hiɓe jaɓa ɗun. Hooreeɓe diina goo no faalaa wuurude e nder ngalu e ko sabu ɗun hiɓe lanndaade tawaaɓe ka diina maɓɓe kaalisi. Ɗee kuuɗe no holli ɓe anndaa Alla tigi tigi e ko ɗun waɗi ɓe haanaa haalude fii makko (janngee 1 Yuuhanna 4:8).

3. Ko honɗun Alla miijii fii diina fenaande ?

Si tawii ko diinaaji fenaande waɗata kon no metta on, e miijo mon, ko honno Yahuwah Alla wa’irta ? Himo yiɗi yimɓe kono himo monanii hooreeɓe diinaaji woɗɗinayɓe yimɓe e makko, e ɓe kippataa tawaaɓe ka diina maɓɓe. Himo fodi mulugol diina fenaande hara ka « yiitetaake hande kadi » (Feɲɲinannde 18:21). Neeɓataa Alla mula diina fenaande fow (Feɲɲinannde 18:8).

 LUGGINEE

4. Alla jaɓataa diinaaji ɗin fow

Yimɓe buy no hoolii diinaaji no wa’i wa laawi sertuɗi nawrayɗi ka Alla. Kono ɗun ko goonga ? Janngee Matta 7:​13, 14 e yewton fii ngal lanndal :

• Ko honɗun Deftere Alla nden haali fii laawol nawrayngol e ngurndan poomayankejan ?

Fijinee VIDIO on e yewton fii ngal lanndal :

• Hara Deftere Alla nden no wi’i diinaaji buy no woodi weltinayɗi Alla ?

 6. Alla no faalaa wallude yimɓe no ɓe yaltira e diina fenaande

Janngee Feɲɲinannde 18:4 a e yewton fii ngal lanndal :

• Ko honno wa’irton si on anndii Alla no faalaa wallude yimɓe fii no ɓe yaltira e diina fenaande ?

7. Jokkee janngugol fii Alla goongaajo on

Piiji bonɗi ɗi diina fenaande wowlata maa waɗata no battina miijo mon fii Alla ? E piide misal, si suka jaɓaali waajuuji moƴƴi ben makko ɗin, o yalta ka galle e o waɗa piiji bonɗi. Ben makko yiɗaa ko suka on woni e waɗude kon. Fii honɗun en haanaa felude ben suka on fii ko o murti kon ?

• Fii honɗun en haanaa felude Yahuwah Alla e acciten janngugol fii makko sabu kuuɗe diina fenaande ?

 RAWNOODE

Janndeeji e kuuɗe bonɗe diina fenaande woɗɗinii yimɓe e Alla. Alla mulay diina fenaande.

Ndartannde

• Ko honɗun miijiɗon fii janndeeji e kuuɗe diina fenaande ?

• Ko honɗun Yahuwah Alla miijii fii diina fenaande ?

• Ko honɗun Alla waɗata diina fenaande ?