LISON 13

Sé fo rèlijion-an ka sali non Bondié

KOUTÉ AN

Si Bondié sé lanmou, poutji rèlijion ki swadizan ka riprézanté’y, ka fè tousa bagay ki mové ? Sé paskè sé rèlijion-tala sé dé fo rèlijion ; yo ka sali non Bondié. Ki manniè yo ka sali non’y ? Sa Bondié ka pansé di sa ? Épi kisa i kèy fè yo ?

1. Ki manniè lansèyman sé fo rèlijion-an ka sali non Bondié ?

Sé fo rèlijion-an « bokanté lavérité Bondié kont mansonj » (Women 1:25). Pa èkzanp, près tout sé rèlijion-an pa ka ansénié non Bondié lakay-yo, alòs ki Labib ka di, sa plis ki nésésè itilizé non Bondié (Women 10:13, 14). Anplis, i ni chèf adan rèlijion ka di, lè an malè ka rivé sé volonté Bondié. Men sa, sa pa vré piès ! Bondié pa ka janmen fè moun ditò (li Jak 1:13). Malérèzman, sé mansonj-tala ka anpéché sé moun-lan enmen Bondié.

2. Ki manniè aksion sé fo rèlijion-an ka sali non Bondié ?

Sé fo rèlijion-an pa ni konsidérasion ba moun kon Jéova. Silon Labib-la, péché sé fo rèlijion-an « fini pa rivé jik an sièl » (Révélasion 18:5). Dépi sièktan, sé rèlijion-an ka mélé adan lapolitik, yo ka partisipé adan ladjè, épi yo rèsponsab ouben konplis lanmò milion moun. I ni chèf adan rèlijion ki ka mennen gran lavi, épi ka mandé sé fidèl-la lajan pou kontinié viv konsa. Manniè sé rèlijion-tala ka fè, ka montré yo pa konnèt Bondié, kifè, yo pa ni dwa riprézanté’y (li 1 Jan 4:8).

3. Kisa Bondié ka risanti lè i ka gadé sé fo rèlijion-an ?

Si ou ka lévé faché lè ou ka wè sa sé fo rèlijion-an ka fè, a jijé wè sa Jéova ka risanti ! I enmen lézòm, men i pa dakò épi lé chèf sé rèlijion-an ki ka mantjé’y rèspé épi ki ka maltrété sé fidèl-la. I ka pwonmèt ki sé fo rèlijion-an kèy détwi é ki « yo pé ké janmen wè [yo] ankò » (Révélasion 18:21). Talè, Bondié kèy fè tout sé fo rèlijion-an pran lavòl (Révélasion 18:8).

ANNOU PLI LWEN

Annou palé tibren plis asou sa Bondié ka risanti parapòt a sé fo rèlijion-an. Annou gadé tou plis bagay asou sa yo fè, é poutji sa pa pou anpéché nou aprann konnèt Jéova.

4. Bondié pa dakò épi tout rèlijion

Ni anlo moun ki konprann kisiswa rèlijion yo chwazi, yo tout sé chimen ka mennen a Bondié. Men ès sa vré ? Li Matié 7:13, 14 épi diskité kèsion-tala :

Kisa Labib-la ka di asou chimen-an ka mennen a lavi ?

Gadé VIDÉWO-a épi diskité kèsion-an ka vini an.

VIDÉWO : Ès Bondié dakò épi tout rèlijion ? (mòso) (3:22)

Ès Labib ka di i ni pliziè rèlijion ka fè Bondié plézi ?

5. Sé fo rèlijion-an pa ka imité lanmou Bondié

Sé rèlijion-an ka sali non Bondié pliziè manniè. Pa ègzanp, tout moun sav ki malérèzman yo partisipé adan ladjè. Gadé VIDÉWO-a épi diskité sé kèsion-an ka vini an.

VIDÉWO-a : Le rôle des Églises dans la Deuxième Guerre mondiale (2:22)

Kisa anlo Légliz fè pandan dézièm Gran Ladjè-a ?
Sa’w ka pansé di sa ?

Li Jan 13:34, 35 épi 17:16. Apré diskité sé kèsion-tala :

Dapré’w, sa Jéova ka risanti lè rèlijion ka mélé kòyo adan ladjè ?
Sé fo rèlijion-an fè anpil méchansté. Ès ou pé palé di an bagay larèlijion fè ki pa annakò épi lanmou Bondié ?

Sé fo rèlijion-an pa ka imité lanmou Bondié.

6. Bondié lé tiré moun adan sé fo rèlijion-an

Li Révélasion 18:4 a épi diskité kèsion-tala :

Lè ou ka wè Bondié lé endé moun sé fo rèlijion-an garé, kisa sa ka fè’w ?

7. Kontinié aprann konnèt vré Bondié-a

Sa sé fo rèlijion-an ka di épi fè, ès sa pou chanjé manniè ou ka wè Bondié ? Imajinen an gason ka rifizé kouté bon konsèy papa’y ka ba’y. I ka kité kay papa’y épi i ka mennen an vié lavi. Papa’y pa dakò épi sa i ka fè. Poutji sa enjis blanmé papa-a pou chwa yich-li ki ribélé kòy ?

Ès sa jis blanmé Jéova épi sispann aprann konnèt li palakòz sa sé fo rèlijion-an ka fè ?

NI MOUN KA DI : « Mwen pa lé tann palé di Bondié pas sé rèlijion-an ka fè twòp bétiz. »

Ès sé sa ou ka pansé tou ?
Poutji sa sé fo rèlijion-an ka fè pa pou chanjé lidé’w asou Jéova ?

SA’W APRANN

Sé fo rèlijion-an ka sali non Bondié pas yo ka ansénié bagay ki pa vré anlè’y épi yo ka fè anlo bagay ki mové menm. Bondié kèy fè disparèt tout sé fo rèlijion-an.